#499  Hvað er að gerast í bakaríum? Það er stutt síðan brauðin kostuðu rúmlega 200 kr en nú fær maður varla brauð undir 400 kr, ekki er þetta gengi krónunnar að kenna, þar sem minnst af kostnaðnum við brauðið er sennilega hráefnið. Brauð eru hvergi á hærra verði en á Íslandi, tek dæmi: í Oddi bakara í Hafnarfirði kostar Graskerabrauð 459 kr og karmellumuffins 215 kr, þetta getur ekki talist eðlilegt. Reyndar finnst mér brauð almennt hafa hækkað í bakaríum á stuttum tíma. (nb. Heimsmarkaðsverð á hráefninu er að hækka, er þaggi? Er ekki það sama að gerast í bakaríum eins og alls staðar annars staðar - allt er á leiðinni upp upp upp!)

#498    Renndi yfir tilboðabækling Europris sem var dreift í hús í morgun (23.4.). Þar er auglýstur e.k. toppur eða nærbolur á 1190 kr. Sömu vöru sá ég fyrir rúmum þremur vikum í Europris á áttahundruð og eitthvað, líklega 890. Þá hefur Europris hækkað frostþurkað skyndikaffi um heilar 100 kr. úr 399 200gr. í 499 OKUR!

#497    Skil ekki alveg verðskrána hjá Aktu taktu. Ég fór þangað í hádeginu og ætlaði að fá mér pylsu og kók og þar sá að þau eru með “tilboð” á því þ.e pylsa, gos úr vél og prins póló á 449, en þar sem mig langaði ekki í gos úr vél þá bað ég um að fá það í dós og fékk að vita að það kostaði mig 59 kr meira eða 508 kr En þar sem mér langaði ekkert í prins póló þá bað ég bara um eina pulsu og kók í dós og þá kostaði það 340 kr  Svo tilboðið sem var upphaflega með pylsu, gos úr vél og prinspólói var 168 kr dýrara en það sem ég keypti, þá reiknast mér til að ég hefði borgað 168 kr fyrir eitt prins póló. Þetta kalla ég ekki tilboð !!!!

#496    Ég ákvað að kaupa mér Topp eftir sundferð í Sundlaugina v/Versali.  Á afgreiðsluborðið var límt auglýsingaspjald sem á stóð "Tilboð á Toppi, kr.99-". Starfsmaðurinn bar Toppinn upp að arfgreiðslukassanum og sagði svo: 124!  Nú, sagði ég þar sem ég stóð beint fyrir framan
auglýsinguna og benti á hana: Hér stendur kr. 99.-??  Þá tjáði starfsmaðurinn mér að það væri nýbúið að hækka þessa vöru hjá framleiðandanum og þetta væri bara handskrifað á auglýsingunni, það ætti bara eftir að breyta þessu.  Ég tjáði henni að almenna reglan væri sú að það ætti að greiða samkvæmt verðmiða. Þá sagði hún "Allt í lagi, þú færð hana þá á því verði" og reif svo
auglýsinguna af borðinu, pínu súr á svipinn. Í þessu tilfelli munaði bara kr. 24,- en ef varan hafði átt að kosta kr. 9.900 þá hefði hún kostað kr. 12.400 þegar maður hefði mætt með hana á kassann.  Tala nú ekki um ef það hefði verið kr. 99.000 og maður væri rukkaður um kr. 124.000.  Það er ansi mikil hækkun finnst mér. 

#495    Ég hef keypt heitan mat í Krónunni, Fiskislóð og fengið þar heita pörusteik á 698 kr./kg., sem verður að viðurkenna að er ansi lágt verð. Nú í dag (22/4) er verðið hins vegar komið upp í 1211 kr./kg!!!  Rúmlega 70% hækkun!

#494    Þurfti að kaupa kertaþræði í Lancer árg. 2000 um daginn. Hringdi í Heklu og verðið var 15.600 kr  Fór í N1 (Bílanaust) og fékk þá þar á 4.000 kr. 

#493    4 stykki af Gillette Fusion kosta 2200 kr út í Nóatúni.
Að kaupa 8 aukablöð af Gillette Fusion á Amazon:  $24.95 = 1850 kr
Að kaupa 16 aukablöð af Gillette Fusion á Amazon:  $37.95 = 2800 kr
Að kaupa 16 aukablöð + Mach 3 rakvél: $50 á amazon = 3700 kr (án aðflutningsgjalda og sendingarkostnaðar).
Þurfum við að ræða þetta eitthvað frekar? Maður var að kaupa þessa pakka á í kringum þúsundkallinn fyrir ekki svo löngu síðan. Líklega hagkvæmast að læra á gama góða rakhnífinn og taka ekki þátt í þessu brjálæði. BJAKK!
p.s.
Mach 3 rakar betur en Fusion, það er svo þröngt á milli blaða á Fusion að Gillette tróð aukablaði aftaná til að maður geti rakað efri vörina.
(nb. Jamm það er lúxus að raka sig og þetta er svo óumhverfislega verðlagt að oftast er jafn dýrt eða ódýrara að kaupa sér sköfu með nokkrum blöðum en stök blöð. Gilette eru náttúrlega alltaf að koma með framtíðarlegri blöð. Árið 2020 verður eflaust til Super duper ultra Mach 17 með 17 blöðum, sjálflýsingu og hristingi (á 700.000 geimkrónur pakkinn). Einn helsti skeggfræðingur landsins, Gauti hjá Herramönnum, sagði að þetta væri eintómt frat og gamla góða einblöðungsskafan gæfi alveg eins góðan rakstur. Gauti kennir mönnum að raka sig hér.)

#492    Fór um helgina í Holtagarða með familíuna. Þar er verslun sem heitir
Stubbasmiðjan og selur fáránlega dýr barnahúsgögn, t.d. kommóðu
með tveim skúffum sem kostar 230 þúsund. En ok, það sem böggaði mig
mest var litla kaffihúsið í miðri búðinni þar sem á að vera
sérlega hentugt að setjast niður með krakkana. Ég og konan fengum
okkur ofurlitla kökusneið sem kostaði 590 kr stk og þurftum að borða
með plasthnífapörum, kaffið í plastbollum sem kostaði jafn mikið og
á öðrum kaffihúsum samt sem áður. þegar kom að því að velja
eitthvað barnavænt þá var það svali og einhver barnamöffins sem
kostaði 290 kr (ein skitin möffins) sem var líka svo viðbjóðslega
vond að barnið hrækti henni út úr sér. Reikningurinn fyrir þessa
plastbolla og plasthnífa kaffihúsaferð var hreint okur, 2.310 kr. Ég
fer næst í Ikea.

#491    Ég ferðaðist með Herjólfi til Vestmannaeyja fyrir stuttu síðan. Ég er oftast sjóveik og finnst nauðsynlegt að hafa eitthvað til að drekka og hafði ekki athugað að kaupa drykk fyrirfram, svo ég neyddist til að kaupa ½ lítra af Egils kristal í kaffiteríunni og borgaði   370.- kr. fyrir og annað verðlag á staðnum var eftir því. Finnst ykkur þetta hægt?!!

#490    Við hjónin höfum undanfarið staðið í framkvæmdum við baðherbergið okkar og erum því búin að fara ófáar ferðir í Sorpu með ýmisskonar rusl. Við búum hér í Reykjavík og borgum hér fasteignagjöld og þar á að vera sorphirðugjald innifalið eða hvað, þurfum síðan að borga fyrir að losa okkur við rusl hjá Sorpu. Sem við keyrðum þangað sjálf, nota bene. Þetta finnst mér okur. Fyrir utan það að þetta er ekki sorphirða. Það sama gildir um blöð og fernur, flokkum og skilum er fínt og ég er mjög meðfylgjandi öllu sem viðkemur flokkun og skila sjálf inn batteríum, fernum, blöðum, fötum og kertavaxi og Guð má vita hverju. Þegar ég bjó í Svíþjóð fyrir rúmlega tuttugu árum síðan, safnaði maður blöðum í krossband og henti þeim út fyrir dyr á ákveðnum dögum og síðan kom bíll og sótti blöðin. Það mundi ég kalla SORPHIRÐU. Ekki þennan leigubílaakstur með rusl sem við borgum svo sjálf fyrir að losa okkur við þegar við komum í SORPU. Eru ekki fasteignagjöldin í Reykjavík ekki bara alveg nógu há?

#489    Ég gifti mig 1. mars 2008 við fórum svo í brúðkaupsferð nokkrum dögum seinna og vorum í 3 vikur. Þegar heim var komið fór ég að skoða vörur með því hugarfari að versla fyrir gjafabréfin sem við fengum að gjöf. Nú í Tékk-kristal kostaði stytta (búin að vera á tilboði svo mánuðum skiptir núna) rétt um 14.800 kr og er komin í 18.800 kr. Sama styttan sem er búin að vera uppá hillu hjá þeim ansi lengi. Hún getur ekki verið svo vinsæl að þau þurfi að panta í hverri viku svona styttu! Það er súrt að horfa upp á að gjafabréfin eru búin að rýrna ansi mikið!

#488    Lenti í Okri um daginn og varð að láta vita af þessu. Ég fór með félögunum á Classic Rock í Ármúlanum um daginn, það er ekki frásögu færandi nema af því að ég ákvað að vera pollrólegur og drekka bara Sódavatn... Keypti mér eitt glas, en svo kom reiðarslagið.... REIKNINGURINN. Ég var rukkaður um 550.- kr. fyrir skitið sódavatnsglas úr vél. Það kostar rekstraraðilann lítið sem ekkert glasið af sódavatni úr vél. Og mér hefði fundist 250 kall ALGJÖRT hámark, en ég borgaði 550 krónur fyrir glasið. Vildi bara vara fólk við, mun gáfulegra að drekka bjór og sterkadrykki, eða bara venja komum sínum eitthvað annað.

#487    Fór í Nóatún um helgina til að kaupa Béarneseessen sósukraft. Hann var verðmerktur 335 og ég keypti tvo. Þegar ég kom út í bíl sá ég á strimlinum að ég hafði borgað 429 kr. fyrir sósukraftinn. Hann hafði sem sagt hækkað um 28% í einu. Og svo er verið að plata mann með því að halda uppi gamalli verðmerkingu. Fór daginn eftir og fékk endurgreiddar 200 krónur. Það kostaði samt tíma og bensín fyrir mig að keyra í búðina. Verslunarstjórinn var ekkert hress og bauð engar aðrar skaðabætur heldur enn að fá greiddan mismuninn. Baðst afsökunar með fílusvip. Það sauð á mér eftir þessa reynslu.

#486    Ég keypti lyfið Melantonin fyrir nokkrum mánuðum (þá var það selt sem undanþágulyf, eða lyf án markaðsleyfis), þá kostuðu 100 töflur ca 2500 krónur. Um daginn fór ég svo í apótek og ætlaði að fá sama lyfið. Nema hvað að nú hefur verið fengið markaðsleyfi fyrir lyfinu og heitir það nú Ciradin. Ég var með lyfseðlil upp á 100 töflur og þurfti ég nú að borga um 8000 krónur í stað 2500!!! Ef þetta er ekki okur þá veit ég ekki hvað!!!

#485    Ég veit ekki af hverju, en ég ákvað að bera saman sömu Dell fartölvuna á ejs.is annars vegar og dell.co.uk hins vegar.
Þessi hér varð fyrir valinu: Verðið: 144.900. Það má þó auðvitað búast við að það hækki um 20-30% meðan þessi póstur er skrifaður vegna gengisbreytinga.
Ég fór svo á dell.co.uk og "bjó til" þessa sömu fartölvu (eitthvað sem vefverslanir á Íslandi bjóða ekki einu sinni upp á). Verðið: 75.725 (498.98 pund). MEÐ VAT (VSK í UK) OG Sendingu.
Verðmunur í krónum talið er 70 þúsund krónur.
Á þessum fartölvum er enginn munur nema sá að þessi sem EJS selur er með 3ja ára verkstæðisábyrgð meðan dell.co.uk er með 1 árs ábyrgð. Hægt er þó að kaupa 4 ára þjónustuábyrgð fyrir 100 pund sem er öflugri en nokkuð það sem EJS býður upp á fyrir hinn almenna neytanda. Það er því augljóst að EJS er í þeim business að kaupa sínar fartölvur af dell.co.uk og tvöfalda verðið fyrir mörlandann.

(ath: EJS er dreifingaraðili fyrir Dell á Íslandi. Sem dreifingaraðili þá kaupum við vörur inn á lager og erum því í stundum dýrari en þegar keypt er beint frá Dell. Oftast erum við þó með sambærileg verð en getum þó ekki keppt við Dell þegar þeir keyra niður verð í sértilboðum á afmörkuðum svæðum.  Viðskiptavinur getur því komið í verslanir okkar, keypt vélina og í lang flestum tilfellum fengið vélina afhenta samdægurs. Pantanir taka frá 2-4 vikur eftir verkefnastöðu hjá Dell ytra. 

Sé hins vegar pantað í gegnum vefsíður Dell má búast við afgreiðslufresti frá 1-4 vikum. 

Við ákváðum að fara og skoða verðmuninn á okri #485 enda höfum við hjá EJS reynt að stilla verði á Dell tölvum í hóf.  Samkeppni er gríðarleg á þessum markaði og því er okkur ekki stætt á að okra á viðskiptavinum okkar. 

Skv okkar athugunum þá er þetta munurinn á vélunum (án VSK): 

Þess má þar að auki geta að EJS er með sama verð á þessari vél og í mars áður en gengið hækkaði. Við tókum þá ákvöðun að hækka ekki gengið og leyfa viðskiptavinum að njóta. Vélin frá Dell UK er á sértilboði og var fyrir nokkrum dögum síðan 100 pundum dýrari. Ef þessi afsláttur væri ekki þá væri munurinn einungis 6 þúsund. 

Bestu kveðjur.
Bjarni Þór Sigurðsson
Sölu- og markaðsstjóri 
EJS hf)
 

#484    Vélin í Peougot mínum ofhitnaði uppúr öllu valdi í lausagangi á fimmtudaginn og fór ég með bílinn í Bernhard á föstudagsmorgni til að laga kælikerfið og skipta í leiðinni um bilaðan ABS skynjara við hægra framhjólið. Ég valdi Bernhard þar sem þeir eru umboðsaðilar Peougot og væntanlega með helstu Peougot sérfræðinga landsins innan sinna vébanda. Mér var tjáð að bílinn yrði tilbúinn fyrir fjögur.
Klukkan 15.49 var hringt frá Bernhard, ég náði ekki að svara en ég hringdi 4 mínútum síðar og talaði við konuna á símanum sem sagði mér að það væri viftan í kælikerfinu sem væri biluð, hún kostaði ný 55 þúsund kr en hún hefði ekki verið til,  frekar en abs-skynjarinn sem kostaði annars 24 þúsund kr. Svo tilkynnti hún að ég hefði 5 mínútur til þess að sækja bílinn því þeir væru að loka, ég sagðist ómögulega geta náð því á svo skömmum tíma og benti á að 11 mínútna fyrirvari væri ekki langur til að sækja bíl, bíllaus. Þá fullyrti hún að það þeir á verkstæðinu hefðu verið að reyna ná í mig af og til í allan dag. (sem var hrein og klár lygi enda enginn missed calls á símanum). Ég spurði hvort ekki mætti setja lyklana í bílinn og ég gæti sótt hann innan klukkutíma. Þá tjáði hún mér að það gengi ekki því ég þyrfti að gera upp...

-   Ha?, hváði ég, en þið gerðuð ekki við neitt?
-   Já, en það fóru 2 vinnutímar í þetta, sagði Bernhard-konan
-   Bíddu ertu að segja mér að það hefði tekið helstu Peugot sérfræðinga landsins, sem fengu það vita að kælikerfi bílsins væri í ólagi 2 klst að finna út að viftan í kælikerfinu væri sökudólgurinn?
-    Þeir gerðu meira en það, þeir þrýstiprófuðu, var svarið.
-    Nú jæja, og hvað á ég að borga? 
-    17.800 kr. Ég get farið með lyklana til varahlutaverslunarinnar, það er opið þar til 18:00 þú getur borgað þar.

17.800 kr þurfti ég að borga Bernhard fyrir að komast að eftirfarandi: 
* Bernhard lýgur að viðskiptavinum sínum um hvenær og hversu oft þeir hringja í fólk 
* Bernhard á afskaplega lélegan lager af varahlutum, af tveimur hlutum sem mig vantaði áttu þeir hvorugan. 
* Bernhard er með mikla sérfræðinga á sínum snærum sem borga þarf 17.800 kr fyrir að komast frá vitneskjunni: ,,kælikerfið í bílnum er bilað” yfir í ,,viftan í kælikerfinu er biluð”.
* Bernhard finnst 11 mínútur fínn fyrirvari fyrir fólk að geta sótt bílinn sinn á föstudegi. 
* Ég mun frekar eiga bílaviðskipti við Ástþór Magnússon og Osama Bin Laden en Bernhard í framtíðinni.

 Mér fannst þetta svo dásamlega absúrd, siðlaust og svæsið að ég ákvað borga peninginn athugasemdalaust og kaupa konfektkassa handa starfsmönnum Bernhard fyrir að leyfa mér að upplifa raunveruleika sem er fáránlegri en allar lygasögur um okur. 17.800 kr er kannski ekki svo mikið fyrir jafnfáránlega sögu og þessa.

#483    Ég ætlaði bara að koma með eina ábendingu til þeirra sem eru að kvarta
yfir háu verði á lífrænum vörum. Fjarðarkaup er með LANGBESTA verðið á
lífrænum vörum. Þó að þið þurfið að gera ykkur ferð í Hafnarfjörðinn þá
hugsa ég að það sé fljótt að borga sig upp ef þið eruð að fara kaupa
eitthvað að ráði. Þó að ég muni ekki nákvæmar tölur þá hef ég rekist á
yfir 100% verðmun á lífrænum ávöxtum og grænmeti á milli Fjarðarkaupa og
annarra verslana.

#482    Það er miklu dýrara að kaupa gjaldeyrinn í Leifsstöð heldur en í bankaútibúum Landsbankans hvað þá heldur annarra banka. Mér reiknast til ca 10% dýrara.
Munar um minna þegar gengið er svona óhagstætt.

#481    Þótt ég sé ekki með dæmi um að hækkun á allra síðustu dögum hefur mér alltaf þótt verð á bílastæðum við Leifsstöð vera algert OKUR! Það eru malbikuð þarna nokkur hundruð stæði, á hjara veraldar, á nokkurnvegin verðlausu landi. Svo er þetta skreytt með Securitas merkinu og kallað eftirlitsstæði, en örugglega 2 ár síðan skúr með mennskum vörðum var lokað og sjálfsafgreiðsla sett í staðinn. Fyrir þetta bílastæði borgar maður svo 630 kr á dag!  Og það þýðir ekkert að bera þetta saman við flugvallarstæði í stórborgum erlendis - þetta er örfoka hrauni og þangað til fyrir svona 10 árum var meira að segja frítt að leggja þarna.
Með fullri nýtingu á 5 stæðum fær maður 95.000 kall á mánuði. Getur leigt íbúið í 101 fyrir það og örugglega einbýlishús í Keflavík. Ætli þetta bílastæði sé bara ekki jafn mikils virði og allur miðbærinn eða jafnvel allur bærinn í Keflavík.

#480   Útgáfutónleikar Morðingjanna í Iðnó þann 25. apríl er ekki okur. Miði 
fyrir tvo á 1.200 kr. á www.midi.is. Svo er hægt að kaupa Áfram 
Ísland! á netinu, niðurhal og diskur í pósti (burðargjald innifalið) 
á 1799 kr á kimi.grapewire.net. Sem er svo sannarlega ekki okur.

#479    Síðasta sunnudag 13/4  keypti ég í Bónus í Smáratorgi kúmenkringlu poka með 4 kúmenkringlum í – hann kostaði þá 152,- (tek fram að hann var ekkert á tilboðsverði)  Núna rétt áðan 20/4 keypti ég aftur þessar 4 kúmenkringlur og hann kostar núna 179,-  OKURhækkun! 

#478    Var á ferð í Kaupmannahöfn í nóvember s.l. og hafði farið með lyfseðla með mér til að kanna hvort hægt væri að kaupa ódýrari lyfi þar ytra. Það reyndist vera rétt.  Lyfið Norvasc / Amló sérheitalyf á Íslandi en í Danmörku “Amlodipin Alpharma 100 x 5 mg”  kostað Dkk 70,85 á genginu 11,80 eða  Ísl. kr 836,00 Hér heima hafði ég verið að kaupa þetta lyf á kr. 2.827,- í September s.l.  OKUR!
Sama var einnig með lyfið Sivacor / Zocor, í Danmörku Simvacop 100 X 20 mg.  Í DK kostaði það Dkr. 65.- án lyfseðils eða ísl. kr 767,-  en hér heima var það selt á sama tíma á kr 2.635.-  OKUR!

#477    Langar að benda á ekki-okur á Pizzunni í Garðabæ. Þar er sama 
tilboðið búið að vera í að minnsta kosti ár, miðstærð pizza m/2 
áleggstegundum og 1.l gos á 1190 ef það er sótt og 16 tomma m/2 
áleggstegundum og 2.l gos á 1490. Ágætis pizzur.

#476    Dvel í Skotlandi sem stendur við nám og hef nýtt mér þjónustu Flugleiða við að ferja sjálfan mig, unnustu og börn okkar á milli Íslands og Skotlands. Þó nokkuð hefur líka verið um gesti og almennt hefur verð miða fyrir fullorðinn verið 24-30 þúsund krónur. Komst þó á milli um daginn fyrir 22.500 kr. Upprifinn eftir þá reynslu ætlaði ég að bóka aðra ferð heim í lok maí og hafa enn meiri fyrirvara (7 vikur). Þá er allt í einu engin leið að fá far undir 45.000 kr. Þeir dagar sem ég hafði í huga (25.-29. maí) bjóðast nú á 55 þúsund krónur (20.apríl kl. 15.20) . Á sama tíma er hægt að fá flug frá London og heim fyrir ca. 30.000 kall. Hvað veldur þessari hækkun? Fákeppnin? Reyndi að fá svör með því að senda ítrekaða fyrirspurn til info@icelandairgroup.is en þeir eru auðvitað ekkert að svara, hvað þá heldur að vísa á einhvern sem getur hugsanlega útskýrt þetta. OKUR? Sú staðhæfing stendur þar til einhver færir mér vitræna skýringu.

#475    Ég veit ekki af hverju, en ég ákvað að bera saman sömu Dell fartölvuna á ejs.is annars vegar og dell.co.uk hins vegar.
Þessi hér varð fyrir valinu: Verðið: 144.900.
Það má þó auðvitað búast við að það hækki um 20-30% meðan þessi póstur er skrifaður vegna gengisbreytinga.
Ég fór svo á dell.co.uk og "bjó til" þessa sömu fartölvu (eitthvað sem vefverslanir á Íslandi bjóða ekki einu sinni upp á). Verðið: 75.725 (498.98 pund). MEÐ VAT (VSK í UK) OG Sendingu.
Verðmunur í krónum talið er 70 þúsund krónur.
Á þessum fartölvum er enginn munur nema sá að þessi sem EJS selur er með 3ja ára verkstæðisábyrgð meðan dell.co.uk er með 1 árs ábyrgð.
Hægt er þó að kaupa 4 ára þjónustuábyrgð fyrir 100 pund sem er öflugri en nokkuð það sem EJS býður upp á fyrir hinn almenna neytanda.

#474    Þurftum að parketleggja. Keyptum parket á 3490 kr fm hjá Húsasmiðjunni. Þetta var 7. apríl. Viku seinna vantaði 2 pakka upp á að verkið gæti klárast. Þá hafði Húsasmiðjan blásið til "gólfefnadaga" og hækkað sama parket um 80 krónur, í 3570 kr fm. Þetta eru skítlegir verslunarhættir. Samt gott til þess að vita að þegar Húsasmiðjan blæs til sérstakra "daga" að það þýðir verðhækkun (en ekki lækkun eins og sauðsvörtum almúganum gæti dottið í hug).

#473    Just4Kids (gamli Leikbær sem var þekktur fyrir skefjalaust okur) skánar lítið. Mér blöskraði þegar ég sá í bæklingi frá þeim leikfang sem heitir Wurlybird þeytivinda sem kostar 69.980 kr. Er ekki í lagi? Þetta kostar 150 pund (22.500 kr á gengi 19. apríl) í Bretlandi og það í smásölu (sjá http://direct.tesco.com/q/R.203-4363.aspx) Þeir kaupa þetta líklega á heildsöluverði og fylla gám. Hvað útskýrir þennan verðmun? OKUR!!! (nb. Þeim finnst þetta líka svo geðveikt gott tilboð að þeir skella þessu á forsíðu bæklingsins! Hver eyðir annars 70.000 kalli í að gera krakkana sína ringlaða? Ég nota nú bara skrifsstofustólinn!) 

#472    Ég var að versla í Hagkaup áðan þegar ég rak augun í það að allt hefur hækkað svívirðilega. T.d kostar snúðurinn 169 kr, croissantið 249 kr og súkkulaðibitakakan 199 kr. OKUR! 
Kg af nammibarnum í Bónusvídeó kostar 1599 krónur (kostaði áður 1499 krónur) OKUR!
Drullusokkar undir bíl kosta 3.990 krónur í Brimborg en 4.450 í N1. N1 selur bara eftirlíkingar af drullusokk ekki orginalið eins og Brimborg. Þegar Bílanaust var og hét voru varahlutir yfirleitt ódýrari í Bílanaust en í umboðunun,. Það hefur heldur betur breyst síðan N1 kom til sögunnar. OKUR!
Ég hef verið að lesa comment frá viðskiptavinum Brimborgar um lélega þjónustu og hátt verð hér á síðunni þinni og verð ég bara að segja að ég sé ósammála þeirri ósanngjörnu gagnrýni sem þetta bílaumboð hefur þurft að þola. Þeir hafa staðið sig eins og hetjur og eru öðrum umboðum til sóma. T.d kynntu þeir druslutilboðið þ.e þú gast komið með hvaða druslu sem er í hvaða ástandi sem er og það myndi gilda sem 200 þ króna útborgun uppí nýjan bíl. Þetta vildu þeir gera til að minnka mengun og fegra umhverfið. Ekki síst til að gera fólki auðveldara með bílakaup.
Þeir þurftu ekki að gera þetta. Þeir kusu að gera þetta til að skara framúr og vera ávallt skrefi framar en keppinautarnir. Egill Jóhannsson er virkur notandi á vefsetrunum www.er.is og www.barnaland.is Hann svarar fyrirspurnum frá notendum er varða fyrirtækið og vörur þess þ.e Brimborg á hvaða tíma sólahringsins sem er. Ekki hef ég séð önnur umboð gera þetta eins og t.d Heklu, BogL og Toyota.
Við Brimborg mun ég framvegis versla. 
Ég las líka ósanngjarna gagnrýni um MAX1. Á max1 vinna eingöngu öðlingar. Sama á hvaða tíma þú kemur, hvernig veður er, þá eru Lúlli og félagar alltaf í góðu skapi, alltaf brosandi og alltaf til í að redda manni. Maður fer alltaf brosandi þaðan út (nema ef reikningurinn er hár :-) ) Áfram Max1!

#471    Nýlega gerði ég sennilega verstu kaup ævinnar. Kaffifíknin varð öllu öðru yfirsterkari við hlið númer 31 í Leifsstöð. Ég bað um tvöfaldan espressó, sem fljótlega var kreistur útúr sjálfvirkri vél í pappamál sem hefði rúmað 15 skammta. 490 krónur takk. Ég var semsagt krafinn um tvöfalda upphæð miðað við einfaldan espressó. OKUR!!!

#470    Einn líter af trópí appelsínusafa í plastflösku. 398 krónur í Melabúðinni. Kaupi þetta aldrei aftur! (ath: Ég borgaði 499 kr fyrir sama drykk í Samkaup Úrval. En núna er eitthvað tilboð og þá kostar hann bara 199 kr. Helvíti helvíti gott tilboð! En þegar tilboðið hættir þá hætti ég líka að drekka þennan ljúffenga safa.)

#469    Nokkur feit okur dæmi:
1. Pampers newborn bleyjur. 1100 kall í 10-11 en 450 í Bónus. Hressileg álagning þar sem þetta er nú í eigu sömu aðila og liggur á sama lagernum. 
2. Kristal kisusandur í Krónunni um 1000 kall en 480 í Bónus. Þetta er ekki sama vörumerkið en nákvæmlega sama budget varan. 
3. Venjuleg sótt pizza á Eldsmiðjuna fyrir tvo kostar núna yfir 2500 krónur. Manni svíður að sækja sjálfur brauð með sósu á því verði. (nb. Búðu pítsuna til sjálfur. Hundauðvelt og álíka gott, eða betra en pítsa úr pítsastað og miklu ódýrara!)

#468    Hérna er smápæling og örugglega gömul lumma:
Ég fjárfesti ekki oft í bensíni ýkja oft, bý í göngufjarlægð frá skóla, en
þegar það gerist hefur líterinn yfirleitt hækkað um nokkrar krónur.
Hvernig stendur á því að olíufélögin eru svona gríðarlega snögg að hækka
verðið, nánast um leið og fréttist að olíufötuverðið hefur hækkað? Það er
ekki eins og þau eigi ekki tugþúsunda lítra birgðir, sem eru keyptar fyrir
hækkunina. Síðan inn i á milli þegar olífötuverðið lækkar, gerist ósköp
lítið. Ætli einhver hafi svör við þessu...? Ætli þetta sé svona í fleiri
löndum en hér? Sko..ég segi bara eins og vinkona mín í gæðaþættinum
Svalbarða og slæ niður fæti: Hvað á þetta að þýða? (nb. Halló! Hvað er offsjalt svar við þessari mjög svo augljósu spurningu? Uhhh.. græðgi?)

#467    Ég ákvað að láta þig vita af svakalegri hækkun sem ég varð var við í Krónunni.
Þann 25.3 keypti ég Skólajógúrt Banana og kostaði stykkið 41 kr. Þann 9.4. keypti ég aftur sömu vöru í sömu búð á 52 kr stykkið sem er um 27% hækkun á ansi skömmum tíma. (nb. Mér skilst að verðin í Krónunni hækki og lækki oft á dag svo þetta er nú líklega mjög ónákvæmt dæmi...)

#466    Það er búið að hækka hádegismatinn á Maður Lifandi um 100 kall og súpuna líka um 100 kall.  OKUR! (nb. Þegar innkaupastjóri Haga, eða hver sem það var nákvæmlega, sagði viku fyrir páska: Við verðum að hækka allt um 30% og DV sló því upp á forsíðu: Gríðarlegar hækkanir eftir páska, þá ákváðu allir bara, Já, ókei! Við skulum hækka allt eftir páska og svo hækkuðu allir draslið sitt í búðunum og matsölunum – af því bara. Af því hinir eru að gera það. Taugaveikluð verðhækkanabylgja flæddi um allt þjóðfélagið – og það er ekki eins og hér hafi verið sanngjarnt verð í gangi áður enda okursíðan engin tilviljun. Okursíðan er löðrandi í dæmum af þessu og maður sér þetta sjálfur út um allt. Ég held maður verði að versla eingöngu við Jómfrúnna, Wilsons pítsu og Ikea hér eftir. Eiga lesendur dæmi af fleiri góðmennum sem hækkuðu ekki þegar "kreppan" reið yfir?)

#465    Eymundsson, Smáralind. Gjafapappír, voða þunnur, sjálfsagt agalega fínn. 5 "arkir" í pakka, 20"x26" stk (51cm x 66cm). Á pakkanum er prentað $2.75 (ca kr. 220 ef dollar færi í kr. 80). Verðmerking Eymundsson: kr. 760 !! (rúml. þrefalt dýrara en smásöluverð í USA) Okur! (nb. Alltaf gaman þegar erlendu verðin eru prentuð á draslið. Sannkallað salt í okursárið!)

$464    Maður er alltaf að reyna að spara. Er með yfirdrátt eftir gamalt neyslutripp eins og annar hver maður (ekki það ég geti sagt til um í hvað aurinn fór en það er önnur saga) og hafði heyrt að Netbankinn væri með skástu vextina. Sendi þeim bréf og fékk tilboð í yfirdrátt:

13,95% fyrstu 6 mánuðina. Vextir eftir þann tíma: 18.50%.

Fannst þetta mun skárra en díllinn í Landsbankanum og sótti um. Þegar ég var kominn með reikninginn var tilboðið orðið:

Tilboðsvextirnir eru 16,45% í 6 mánuði og eftir það 20,45%. 

Ég skrifaði alveg brjálaður og talaði um vörusvik, enda náttúrlega 2% munur á tilboðinu og raunveruleikanum. Svar kom frá framkvæmastjóranum:

Því miður hafa stýrivextir breyst tvisvar frá því að við gerum þér upphaflegt tilboð þann 25. mars. Vextir yfirdráttarlána eru ekki fastir og taka breytingum miðað við breytingar á markaði til hækkunar og lækkunar og það á líka við um tilboðsvexti. Þrátt fyrir þessa hækkun á vöxtum okkar eru vextir Netbankans samt betri en vextir á Gulldebet-reikningum annarra banka og sparisjóða eins og sést á eftirfarandi töflu:

Netbankinn - Gulldebet  20,45% 
Kaupþing - Gullkjarareikningur  23,70%
Landsbankinn - Vörðufélagar  24,65%
Glitnir  -  Gullvild 22,45% 
Sparisjóðurinn - Gulldebet 24,15%
SPRON - Gulldebet 22,75%
Byr - Gulldebet 23,70%

Ég neyðist því til að kokgleypa þetta tilboð nb þótt maður sé nú kannski ekkert að spara stóran pening. Segjum að ég sé með milljón í yfirdrátt og yfirdrátturinn sé í botni í heilt ár. Þá hirðir Netbankinn af mér 184.500 kall á meðan Landsbankinn myndi hirða af mér 246.500 kall. Jú jú það er alveg 62.000 kall, næstum því ein leðurlíkishulsa á Nissan Patrol. Hvað... 
En ég hreinlega gerði mér ekki grein fyrir því að þessir stýrivextir hans Davíðs kæmu svona beint inn í manns mál. Hafði ekki tengt þessar endalausu fréttir um stýrivextina við bankareikninginn minn. Takk, Davíð. Þú ert alveg að redda þessu. En það er náttúrlega algjört forgangsverkefni að losa sig við þennan helvítis yfirdrátt (já og Davíð líka auðvitað). 

(ath: Ég tók eftir því að þessi þarna hjá Netbankanum hefur alveg
"gleymt" að setja vextina hjá s24 (www.s24.is) inn í töfluna sína. Ég
er búinn að vera hjá þeim í nokkur ár og dettur ekki í hug að
skipta eins og staðan er í dag.)

(ath: Held þú ættir að kanna málið betur með vextina sem Netbankinn er að
bjóða þér. Þessi tafla sem hann sendi þér er algjört svínarí.

Netbankinn - Gulldebet  20,45%
Kaupþing - Gullkjarareikningur  23,70%
Landsbankinn - Vörðufélagar  24,65%
Glitnir  -  Gullvild 22,45%
Sparisjóðurinn - Gulldebet 24,15%
SPRON - Gulldebet 22,75%
Byr - Gulldebet 23,70%

Málið er að þetta eru opinberir vextir í vaxtatöflu bankanna og að
bera þá saman er algjört bull og mjög villandi.
Til dæmis er Vörðunni hjá Landsbankanum skipt upp í nokkra flokka og
bara sá versti gefin út útávið. Þá geta þeir útdeilt mismunandi
flokkum í Vörðunni til viðskiptavina án nokkurs gegnsæis. Þú og ég
gætum verið báðir í Vörðunni, þú margmilljóner og ég óbreyttur
láglaunamaður. Ég væri mjög ánægður með að vera í Vörðunni eins og þú
og pæli ekkert meira í því. Ef þú myndir mæta í Landsbankann og spyrja
af hverju þú værir ekki metin hærra en ég, þá myndu þeir draga fram
alvöru töfluna og sýna þér að þú ert jú í platínumvörðu með mun betri
vexti og allir sáttir. Kannski ekki gegnsæjasta kerfið fyrir kúnnann
en það er jú enginn að spyrja hvernig Bjöggarnir urðu ríkir þannig að
það fer jú væntanlega enginn að spyrja út í þetta.
Glitnir, Sparisjóðirnir þrír í þessu dæmi og Kaupþing eru með kerfi
sem gengur út á að veita afslætti eftir viðskiptaþáttum. Landsbankinn
í raun líka. Þannig að ef þú ert með þrjá eða fleiri þjónustuþætti,
t.d. debetkort, kreditkort og greiðsluþjónustu þá eru þeir líklegri
til að veita þér afslætti og lægri yfirdráttarvexti. Það er varla
nokkur maður sem ekki hefur klúðrað lífi sínu allsvakalega með
gullþjónustu í þessum bönkum lengur. Nema þeir sem halda ódrepandi
tryggð við bankann sinn og spyrja aldrei hvað bankinn geti gert fyrir
sig. Glitnir er með Vildina sína, Kaupþing er með Vöxtinn sinn og
Sparisjóðirnir eru með platinum, gull og silfurflokkana sína.
Málið er bara að fá tilboð frá þeim öllum og sjá hvað þeir keppast um
að bjóða út frá þér sjálfum, þínum umsvifum og þörfum. Best væri að
fara í gamla bankann sinn og segja "já sæll, ég er búinn að vera með
debetkort, yfirdrátt, greiðsluþjónustu, kreditkort, húsnæðislán osfrv.
osfrv. hjá ykkur. Þið eruð búin að græða feitt á mér ef tekið er
hlutfall ráðstöfunartekna minna undanfarin ár. Ég er búinn að sýna
ykkur hollustu í gegnum tíðina. Netbankinn er tilbúinn að eignast
þetta hlutfall í mér. Hvað ætlið þið að gera fyrir mig?" Og spyrja svo
hvernig Bjöggarnir urðu ríkir.
Mesta vitleysa sem viðskiptavinir bankanna gera í dag er að sýna þeim
hollustu bara vegna þess að þeir hafa alltaf verið í viðskiptum þar.
Farðu og nýttu þér samkeppnina Doktor. Og sendu snillinginum hjá
Netbankanum línu og segðu "vertu ekki að plata mig og ég kæri þig til
Neytendastofu fyrir villandi upplýsingar".
Svo er reyndar spurning hversu miklu samkeppnin og einkavæðingin hefur
áorkað. Ef þú vilt fá allra bestu kjörin þá borgar sig að þekkja
einhvern útibússtjóra eða öflugan þjónustufulltrúa. Sem er jú bíddu
við, alveg eins og í gamla daga þegar við vorum ennþá bananalýðveldi.
Þú segist ekki átta þig á stýrivöxtunum. Það gera það fæstir og þess
vegna er ekki stór mótmælaganga að Seðlabanka og Alþingi.
Stýrivextirnir hafa mest áhrif á fólk eins og mig og þig, ekki fólk
eins og Bjögga og Davíð Odds. Þeir eiga fullt af pening og njóta
svívirðilega hárra innlánsvaxta á meðan ástandið er eins og það er. Ef
ég væri Dabbi seðlabankastjóri myndi ég halda stýrivöxtum eins háum og
ég kemst upp með þar til fólk fer með heykvíslar út á götur vegna þess
að hvergi fengi ég jafn háa ávöxtun á eftirlaununum og
bankastjóralaununum sem ég skammtaði mér. Ef Dabbi þarf svo lán þá
tekur hann það í USA, Japan eða jafnvel Evrópu. Sem er svolítið fyndið
ekki satt, því Dabbi er á móti Evrópu?

#463    BT eru okrarar. Í BT blaðinu á heimasíðu þeirra er auglýst fartölva (LG E500) á 139.999 kr og boðið upp á að taka hana á 59 mánaða láni upp á 4120 kr á mánuði en það þýðir að heildar verð tölvunnar er þá orðið 243.080 kr! Það eru 103.000 kr. í vexti eða 74% vextir!!! (nb. Þú ættir þá að prófa að kaupa þér íbúð! Eru BT nokkuð að okra? Er það ekki bankinn sem lánið fer í gegnum? Annars held ég að þetta séu frekar 14.8% því þú þarft að deila í 59 mánuði. En jú, tölvan hækkar um 74% ef þú átt ekki fyrir henni.)

#462    Vildi bara benda ykkur á Wilsons's pizza. 16" pizza + 2 L kók + ostabrauðstangir á 1850 kall sótt. Búið að vera sama verð í meira en ár á meðan önnur fyrirtæki negla yfir okkur verðhækkunum með vísan í allt og ekkert. Fannst bara kominn tími á eitthvað hrós inná milli. Þessir menn eiga það skilið. 

#461    Fyrr í dag, föstudag, ákveð ég að nota hádegishléið í að slást í för
með samstarfskonu minni í Kringluna á Kringlukast í
barnafataversluninni Polarn & Pyret. Verslunin er þekkt fyrir gæðaföt
og ég ákveð að kíkja á úrvalið enda auglýstur 20-40% afsláttur af
flestu í búðinni. Ég ákveð að festa kaup á stuttermabol handa syninum
og kjól handa lítilli vinkonu sem á afmæli bráðum. Bolurinn er
verðmerktur á 2.200 kr., þ.e. þessi í ljósbláa litnum og einnig þeir
sem eru í rauðum lit en þeir sem eru í dökkbláum eru á 2.690 kr. Ég
álít sem svo að þessir í dökkbláa litnum hljóti að vera úr betra efni
og því dýrari, það hljóti a.m.k. að vera einhver ástæða fyrir
verðmuninum. Það er röð að búðarkassanum enda búðin líka þéttskipuð
fólki sem ætlar sér greinilega að gera góð kaup. Þegar ég hef borgað
rúmar 5.000 krónur fyrir flíkurnar tvær með 20% afslætti rek ég augun
í það á strimlinum að bolurinn hafði verið sleginn inn á 2.690 kr.
áður en afslátturinn var dreginn af honum. Ég bendi afgreiðslukonunni
á verðmiðann sem sýnir 2.200 kr. og þá segir hún: ,,Já, þetta er sko
gamla verðið". Afgreiðslukonan við hlið hennar bendir henni þá á að
hún verði að selja mér bolinn á verðinu sem stendur á miðanum þannig
að þá taka við útreikningar á upphæðinni sem ég á skilið að fá
endurgreidda. Á meðan rennur upp fyrir mér það ljós að ég hef heldur
betur keypt köttinn í sekknum, bolir og annar fatnaður sem merktur er
á 20% afslætti er í raun 20% afsláttur af nýju verði sem er meira en
20% hærra en gamla verðið (sem er örugglega ekki mjög gamalt) og
þannig er bara massívt verið að græða á þeim fjölda fólks sem leggur
leið sína í búðina til þess að kaupa vörur á afslætti. Vörurnar sem er
verið að selja eru síðan örugglega ekkert glænýr lager, a.m.k. eldri
en svo að gengisbreytingar hafi haft áhrif á innkaupsverðið. Þegar ég
var komin út úr búðinni, brennimerkt af kaupunum, leit ég aftur inn og
virti fyrir mér afsláttarskiltin sem hengu fyrir ofan fataslárnar. Ég
sá einungis miða sem sýndu 20% afslátt en ekki hærri. Ég spurði
samstarfskonu mína hvort hún hefði orðið vör við meiri afslátt því
vissulega hefði verið auglýstur allt að 40% afsláttur. Hún sagðist
hafa orðið vör við fataslá aftast í búðinni með gölluðum fatnaði sem
hefði verið á 40% og að sami afsláttur hefði líklega einnig átt við um
einn rekka sem einnig var þarna einhvers staðar innarlega. Sem sagt,
okur-útsala sem allt of margir létu ginnast til að mæta á og eflaust
fleiri gera núna um helgina! Hver vill fá 20% afslátt af vöru sem
fyrir nokkrum dögum kostaði nokkru minna en 20% af uppsettu verði?

#460    Hálfur líter af sódavatni í álfabakkabíó kostar 250 kr. Okur! (17.04.08)

#459    Fyrir sex árum síðan kom til sögunnar samkeppni í millilandaflugi til og frá Íslandi og þá kostaði flugmiði til London eða Köben (sem var nb ekki á tilboði) í kringum 18-20 þúsund með sköttum og aðrir áfangastaðir á bilinu 20-26 þúsund með sköttum. Mikið vatn hefur runnið til sjávar síðan þá. Iceland Express er hætt að skilgreina sig sem lággjaldaflugfélag og Icelandair eru búnir að kynna til sögunnar "sveigjanlegri" fargjöld sem hafa svo reynst átylla til að hækka fargjöldin upp úr öllu valdi. Lausleg verðkönnun á flugi þar sem "samkeppni" er til staðar, sló inn fyrstu vikuna í september (5 mánaða fyrirvari) og gaf nokkra daga í slaka til og frá þó að fæstir eigi kost á að sveigja til ferðadagana:

London: 31.560 - 58.160 kr. með Icelandair. 29.850 - 53.040 kr. með Iceland Express.
Stokkhólmur: 29.190 - 53.260 kr. með Icelandair. 33.350 kr. með Iceland Express (síðustu flug í ágúst) 
Köben: 28.140 kr. - 55.740 kr. með Icelandair. 28.250 kr. - 37.170 kr. með Iceland Express.

Ef við prófum svo áfangastaði þar sem er engin samkeppni erum við eiginlega komin aftur í gamla vistarbandið:

Amsterdam (Icelandair): 34.910 - 76.410 kr. (algengasta verð um 42.000 kr.)
Manchester (Icelandair): 32.080 - 61.850 kr. (happa glappa hvort maður fær miða fram og til baka á 32.000 eða 46.000 kr.)
Varsjá (Iceland Express): 56.000 - 59.020 kr. (þessir Pólverjar geta auðvitað bara aðlagast íslenskri menningu og hætt að fljúga heim)

Ath. öll sætin eru á almennu farrými, ekki business class. Mér reiknast að flugmiði á besta verði hafi hækkað um 55-75% síðan árið 2002 á meðan almennt verðlag hefur hækkað um 20,4%. Dettur einhverjum í hug orðin fákeppni eða jafnvel samráð hér? Eða bara OKUR!

#458    Fjölskyldan er að flytja og hefur þess vegna kynnst okri á mörgum vígstöðvum, fasteignasalinn fékk t.a.m. hálfa milljón fyrir að "selja" íbúðina okkar sem við létum upp í dýrari eign. Salan fólst í því að hann útbjó kaupsamning, hann þurfti aldrei að auglýsa hana, sýna hana eða hafa neitt fyrir henni.
Svo var komið að því að flytja. Þegar heimilisfangi er breytt hjá póstinum þarf núna að borga 990 kall fyrir það eitt að póstur sé áframsendur á nýtt heimilisfang. Þetta er lágmarksgjald fyrir 3 mánuði. Ef maður vill láta póstinn elta sig í heilt ár kostar það 6210!

#457    Vinkona mín ætlaði að halda smá veislu og var nýlega búinn að fá brochure
frá áhaldaleigu BYKO heim til sín. Þar var hún búin að sjá borð og stóla
sérstaklega til leigu fyrir veislur og samkvæmi. Kom það fram í blaðinu
smá verðdæmi um leigu á stólum. Hún ákvað að hringja til að vita hvort
stólar og borð væru til og að verðið væri það sama. Starfsmaður BYKO sagði
henni að hann ætti nóg af stólu og borðum en verðið hefði hækkað útaf
gengisfalli krónunar um 20% !! Alveg ótrúlegt.. Hvernig í ósköpum getur
þessi verslun verið svona kræf að hækka allt um 20% Og það gamla notaða
stóla sem er fyrir útleigu? Get allavega sagt BYKO mönnum að ég er enn að
segja þessa sögu þeim sem ég hitti. OG NEI, Ég reyni eftir bestu getu að
versla ekki neitt í BYKO eða Húsasmiðjunni. OKUR verslanir.

#456    Undanfarið hefur það ekki farið framhjá manni að verðlag í verslunum era ð hækka. Það liggur við að það sé dag frá degi. Eitt dæmi er frá Bónus, þarf hef ég verslað Andrex klósettpappír 9 rúllu pakkningu í gegnum árin. Ég er með kvittun frá 21.10.2006 þar sem pakkinn kostar kr 598-, kvittun frá 05.05.2007 er kr 639-, kvittun frá 29.03.2008 kr 695- og síðan en ekki síst kvittun síðan 13.04.2008 kr 789-.
Á fimmtán dögum er sem sagt 94 krónu hækkun og á tæpum 18 mánuðum hefur þessi pappír hækkað um 191 krónu.
Þetta er mínu mati ótrúlegt, ekki furða þó að matarkarfan hækki. 

#455    Langar að benda á okur hjá Nýherja. Nýherji er umboðsaðili fyrir Canon myndavélar á Íslandi. Þar af leiðandi eru þeir byrgjar fyrir ýmsar smávöruverslanir. Það vakti athygli mína þegar ég sá á þriðjudaginn eftir páska (fyrsti opnunardagur eftir páska) að þeir voru búnir að hækka allt draslið um helvítis helling. Og það gerðu þeir á undan flestum öðrum sem selja fyrir þá Canon vörur.
Dæmi um hækkun eru : canon eos 5D myndavél hækkaði úr 229.000 kr í 299.000 kr. og Canon ef 24-105 linsa hækkaði úr 99.000 kr í 149.900 kr. Geri aðrir betur.

#454    Ég fór með stelpuna mína í kringluna og við ákváðum að fá okkur ís á Ísbarnum. Við fengum okkur ís í brauðformi með eina kúlu eins og það er kallað. Mér brá ekkert smá þegar hún sagði verðið og tók við kortinu en þetta kostaði 690 kr. Ég kaupi ekki svo oft ís til að hafa samanburð en mér finnst þetta geðveiki. Ég hefði beðið hana að taka ísinn aftur ef að við hefðum ekki verið byrjaðar á honum. 

#453    Vildi deila með ykkur Okri sem börnin mín urðu fyrir í ísbúðinni á Glerátorgi á Akureyri þar hefur í einhvertíma kostað 100.- kr. að kaupa lítið krap í boxi en á einum sólahring hækkaði verðið frá 100 kr í 280 kr. Hvernig er þetta hægt ??? Starfsmaðurinn bar því við steinhissa að þetta hefði bara verið orðið svona dýrt þegar hún kom til vinnu. Börnin mín fengu hins vegar ekki krap þennann daginn en ágætis umræða spannst út um það hvernig er að láta ræna sig. 

#452    Regnboginn - Græna Ljósið - Tropa de Elite - 1.100 kr. fyrir eitt stykki bíómiða... Búið að brjóta þúsundkróna múrinn!

#451    Við hjónaleysin fórum á kaffihús í gær – Sólon – Fengum okkur Cappichino og ég kaffi Latte  einfaldana án áfyllingar – 750 kr ---hvað kostar kaffipakkinn í Hagkaup/Bónus/Krónunni/10-11/ o.s.fr.? Á matseðlinum stóð Cappichino 350 að mig minnir og Latte 350 kr... ég fjót að reikna uuu bíddu ég var ekki með tvöfaldan latte (sem var skráður á 400 kr) þá sagði afgreiðslumaðurinn – Já sko við erum búin að hækka verðið en við fáum ekki nýja matseðla fyrr en í næstu viku. Ég skora á ykkur að fara á Sólon og kaupa af matseðli og fylgjast vel með verðinu.

#450    Fór inn í Levi´s í Smárlind um daginn til að athuga skyrtur. Sá að Skyrturnar eru á 11.000 kall. Gallabuxurnar eru á 16.000 kall. Ég var fljótur að stinga af áður er afgreiðslumaðurinn kom. OKUR! Ég þarf ekki að fara á netið og athuga verðið úti. Er nokkuð viss um að það er ekki 11.000 og 16.000 kall. Hvað næst, verðum við rukkuð inn í verslanirnar? (nb. Góð hugmynd! Ég er viss um að það er hægt að kalla hækkun Evrunnar um það líka. Og fólk myndi örugglega borga sig þegjandi inn.) (ath: Ég var í New York í vikunni og sá að Levi's gallabuxurnar í Macy's voru á $32-46, eftir tegundum. "Suggested retail price" á Levi's 501 er $48, og er prentað neðst á miðann sem gefur upp stærðirnar. Það eru um 3600kr.)

#449    Í veikindum í vikunni ætlaði ég að hressa mig við með gömlum fóstbræðraþáttum frá Bónus leigunni hér í Þingholtunum. Þegar heim er komið sé ég að það er bara seinni diskurinn í hulstrinu (á hulstrinu stendur: „Sería 1, þættir 1 – 8“ s.s. ekki hægt að skilja það öðruvísi en báðir diskar séu í hulstrinu). Þegar ég svo segi stráknum í leigunni frá þessum mistökum tjáir hann mér að þetta sé venjan á öllum Bónus vídeóleigum, svona séu allir þættir leigðir út Nb. án þess að merkja það nokkuð eða segja viðskiptavinum frá! eftir situr viðskiptavinurinn með aðeins helming þeirrar vöru sem hann taldi sig vera að greiða fyrir.

#448    Ég er að standa í því núna þessa dagana að kaupa mér íbúð, það hefur náttúrulega verið okurverð á íbúðum undanfarinn misseri, en það er ekki það sem sló mig mest, ég vissi alveg af því áður en lagt var af stað.  Á íbúðinni var áhvílandi lán frá BYR með 4,2% vöxtum og þar sem konan er í BYR og hefur verið í viðskiptum við sama útibúið frá fæðingu þá vorum við nokkuð vongóð um að fá að yfirtaka lánið á þessum vöxtum.  En til að vera viss þá var hringt í bankann til að athuga málið.  Jújú, það átti nú ekki að vera mikið mál og við skrifum undir kaupsamning.  En þegar komið er í bankann til að ganga frá yfirtökunni þá fáum við þær fréttir að 4,2% vextirnir eru ekki lengur í boði heldur þurfum við að sætta okkur við 7,6% vexti...... 7,6%, er verið að gera grín að mér.....þetta er sko OKUR
Við gefum BYR bara puttan, tökum viðskiptin úr bankanum og tökum lán fyrir þessu annarsstaðar.
Svo til að toppa lélega viðskiptarhætti BYRs og hversu illa þeir koma fram við sína viðskiptavini þá kom í ljós eftir smá könnun að ef þetta hefði verið Landsbankinn eða Glitnir þá hefðum við fengið lánið á 4,2% vöxtum, 6,4% í Kaupþingi og 7,3% í SPRON, s.s. BYR er að bjóða sínum kúnnum uppá verstu kjörin á íslenskum bankamarkaði í dag.  Eitthvað sem þau geta verið stolt af.

#447    Hef nýtt mér þjónustu Garðlistar ehf ( www.gardlist.is ) undanfarin 3 sumur til að klippa runna, hreinsa beð og úða runna og eitt grenitré. Hef gert þetta vegna tímaskorts , er að vinna mikið sem og konan. Hef verið þokkalega ánægður með þjónustuna en þó fundist reikningarnir dálítið ríflegir en erfitt að röfla neitt þar sem þetta er yfirleitt unnið á þeim tíma sem maður er sjálfur í vinnu og því erfitt að meta hvert þeirra vinnuframlag er. 
Nú fyrir 3 dögum var ég heima þegar starfsmaður frá þeim kom og úðaði 1 grenitré sem er á stærð við meðal jólatré á íslensku heimili. Mér skildist að það væri of snemmt að úða runnana. Verkið tók innan við 10 
mín og ekki stóð á að reikningur bærist ( með gjalddaga 15.4 eða 2 dögum áður en hann barst í pósti og eindaga 27.4 ) .  Ég þarf að greiða kr. 8.283  ( inni  í því vsk. 1.593 og seðilgjald kr. 190 ). Þetta er okur. Ég veit vel að þetta er óhagkvæmara af því að um 1 tré var að ræða , kannski ekki kostað neitt mikið meira þó þetta hefðu verið 5 tré.
Ég get samt ekki kallað þetta annað en okur. Dæmigert að á heimasíðu fyrirtækisins er ekki verðskrá eða neinar upplýsingar um verð.

#446    Mig langar að benda á okur dauðans hjá Hróa Hetti á svörtum pipar. Ég gerði þau mistök einu sinni að gera ráð fyrir að hann væri frír (eins og á flestum stöðum) eða allavega ekki mjög dýr.  Svo kom í ljós að þeir rukkuðu mig um tæpar 150 kr fyrir hann (á 9" pizzu!). Þetta má sannreyna með því að fara á heimasíðu þeirra og búa til sína eigin pizzu, Þú getur þá t.d. séð að svartur pipar á 18" pizzu mun kosta þig 357 kr. 

#445    Ég er með tvö dæmi um okur í Elkó. 
Playstation 3 leikurinn Resistance Fall of Men
BT -> 2.999
Elkó -> 5.995
3000 kall í mun. Þetta finnst mér okur!

Playstation 3 Dark Sector
BT -> 5.499
Elkó -> 6.495

1000 kall í mun. Þetta finnst mér okur!
Síðan auglýsa þeir oft fín verð en eiga svo ekkert til þegar maður kemur. Tóku bara inn nokkra leiki til að sýna góð verð í auglýsingunni.

(ath: Rétt verð í Elko er Resistance 2995 & Dark Sector 5395
Vinnureglan hjá mér er sú að lækka verð á leikjum/dvd sem ég sé ódýrari hjá samkeppnisaðilum og lækkaði ég þessa leiki hjá okkur strax og ég sá bt blaðið í gær morgun.
Einnig auglýsti max leiki í gær sem ég lækkaði strax.
dæmi:
max auglýsti Unreal tournament fyrir pc í gær á 489 kr verð áður 4989 kr
hann kostaði 2995 kr hjá okkur fyrir og lækkaði ég hann í 475 kr
Þannig virkar Elko verðvernd eins og við höfum staðið fyrir í 10 ár.

Örn Barkarson
Innkaupafulltrúi Elko.)

#444    Fór í plokkun á augabrúnum  í Dekurhorninu Faxafeni í síðustu viku, á heimasíðunni stóð að plokkun kostaði 1.300 kr en ég var rukkuð um 1.650 kr (þrátt fyrir að þá væri ekki búið að breyta verðinu á síðunni hjá þeim). Ástæðan: Allt að hækka útaf gengi krónunnar! Það er ENGINN efniskostnaður við að plokka augabrúnir! og ef maður velur að láta vaxa þær þá er MJÖG lítið vax sem fer í það.

#443    SKO hækkar verðið úr 1.990 upp í 2.990 og kallar það bætta þjónustu við viðskiptavini:

#442    Fór í sápu búlluna Lush til að kaupa næringu fyrir makann sem hann vill eingöngu nota....3500 kall takk, fyrir 250 ml. Leið næstum yfir mig fannst þetta nógu dýrt fyrir mánuði síðan á rúman 2000 kr. Stelpu skinnið sá á mér fumið og brosti vandræðalega jú gengið hefur hækkað. Keypti árans næringuna en sá eftir þessum pening og skipaði manninum að fara með þetta eins og gull.  Ég gat ekki fengið þetta úr huganum og fór inn á Lush.com á bresku síðuna og fann sömu vöru á rúm 5 pund eða um þ.b. 800 kall !  Hvernig í ósköpunum útskýrir gengið þennan mismun?!  OKUR. Héðan í frá kaupi ég ekkert frá Lush á Íslandi...svei.
 

#441    Má til með að segja þér eina „okursögu“. Vinkona mín fór í verslun á Akureyri , sem heitir Siemens-búðin, fyrir stuttu síðan og ætlaði að kaupa sér Kitchenaid brauðrist en fannst hún heldur dýr eða tæplega 16.000,- svo hún fór heim og hugsaði málið hvort fjárveiting væri til á heimilinu fyrir þessu heimilistæki. Kom í ljós eftir nokkra umhugsuna að til var í veskinu fyrir þessu svo steðjað var aftur í Siemens-búðina nema hvað búið vara að hækka brauðristina í 28.400,-
ÉG segi nú bara ÞETTA ER EKKI Í LAGI. Þetta er svo gjörsamlega siðlaust að hækka vörurnar svona mikið og ef skýla á sér á bak við gengi og bla,bla,bla þá segi ég bara KJAFTÆÐI því þetta er svo óeðlilega mikil hækkun og það sér það hver manneskja að þarna er verið að taka okkur neytendur og rasskella á opinberum vettvangi.
Er ekki mál til komið að við setjum STOPP á svona, við neytendur getum gert það á mjög áhrifaríkann hátt. HÆTTUM AÐ KAUPA VÖRUR Á SVONA FÁRÁNLEGU VERÐI. Ef við höfum ætlað að kaupa heimilistæki, húsgögn, svo ég tali nú ekki um bíla og allt annað sem hækkað hefur svona gríðarlega þá er bara að hætta við um stundarsakir og gefa verslunareigendum langa fingurinn og segja svona á ekki að koma fram við okkur. 

#440    Fór í klippingu á rakarastofuna á Klapparstíg. Sat þar í 20 
mínútur... borgaði 4600 fyrir það + þvott.  Er ekki verið að grínast í 
manni?
Fattaði á leiðinni út afhverju stofan er hálftóm meðan það var erfitt 
að fá klippingu annarstaðar með stuttum fyrirvara (það voru _allir_ 
tímarnir lausir þann daginn)
Það ætlar enginn að segja mér að efniskostnaðurinn hafi verið svona 
gríðarlegur :) 2 grömm af geli, hálf lúka af sjampó, og ca 15 mínútur 
með skærum og rakvél.  Miðað við að klippa 2 á klukkustund fyrir 4600, 
þá erum við að tala um mögulega 9200 á tímann, eða 73600 á dag, 368000 
á viku, 1472þ á mánuði.

#439    Þegar Kristanía var og hét, var hægt að fá gramm af ágætis toppum, "böddum," "Skúnk," fyrir 50 krónur danskar. Íslenskir ræktendur og smásalar eru að selja grammið af grasblönduðum skúnk á 3000-3500 krónur. Er þetta ekki okur? Í Suður ameríku er hægt að fá bolta af hreinu kóki á $20 dollara. Á Íslandi er fyrir það fyrsta ekki hægt að fá hreint kók, heldur er verið að selja 8-15% hreint kók á 15.000 kall grammið, ef það er ekki okur þá veit ég ekki hvað. Í Svíþjóð kostar grammið af nánast hreinu spítti um 300 kall sænskar, á Íslandi kostar grammið 5.000 kall og gildir þá einu um gæði efnisins. Íslenskir dópsalar eru mestu okrarar í heimi. (nb. Já í steininn með þá alla saman. Og krakkar! Bara aumingjar og hálfvitar neyta eiturlyfja (nema þau séu félagslega ásættanleg og seld af Ríkinu). Gleðin er besta víman!)

#438  Gerði þau leiðu mistök að kaupa rándýra 30L Brabantia ruslafötu í
Húsgagnahöllinni á 15 þúsund kall haustið 2006. Þessi ruslafata er algjört
eldhússtáss, EN 15 ÞÚSUND KALL FYRIR RUSLAFÖTU! En þetta er nú einu sinni
Rollsinn í ruslafötunum þó að nafnið minni frekar á ónefndann
Austur-þýskann ekki-okur bíl.
Það að kaupa þessa ruslafötu er þó bara upphafið af okrinu eins og allir
prentaraeigendur þekkja mætavel. Húsgagnahöllin seldi ruslapokana á ca 500
kall fyrir 20 stk. en eru nú hættir að selja þá. Á sama tíma fengust
brúklegir pokar í tunnuna góðu í Sainsbury's á 2 pund. Svo fann ég þessa
ruslapoka í Byko á 6-700 kall, og ekki einu sinni orginal Brabantia,
heldur aðeins lélegri en þó fullkomlega brúklegir. Nú eru pokarnir
uppseldir í þessari stærstu verslun landsins og góð ráð dýr þar sem þetta
er heldur ekki til í Húsasmiðjunni og við erum með síðasta ruslapokann
okkar í fötunni akkúrat núna og erum að reyna að treina hann eins og við
getum. Í örvæntingu minni datt mér í hug að kíkja í Byggt og búið í
Smáralind í dag og mér til mikillar ánægju fann ég orginal Brabantia poka
í hillu sem var full af allskonar plastpokum, flestar rúllurnar á 3-400
kall - þvílík hamingja. Lét tékka á verðinu til öryggis og trúði ekki
mínum eigin eyrum, 999 krónur fyrir 20 ruslapoka - ALGJÖRT OKUR! Kvaddi
afgreiðslumanninn med det samme og gekk út án þess að versla, sætti mig
frekar við Napólí-ástand í eldhúsinu mínu en að láta bjóða mér ruslapoka á
50 kall stykkið! ALGJÖRT OKUR!!! (nb. Ég treð nú bara venjulegum innkaupapokum frá Bónus eða Krónunni í mína 30 L Brabanta-tunnu, sem virkar alveg. Ég trúi ekki að ég hafi keypt hana á 15 þúsund, bara hreinlega man það ekki afhverju þessi tunna er í eldhúsinu hjá okkur - vissi ekki að ég væri með hvílíkan eðal í höndunum! Kannast einmitt við þessa poka sem þú talar um (lengri og fittuðu náttúrlega við), maður gat fengið þetta víða um tíma. En ég er ekki svo dúndurhannaður að ég nenni að eltast við ruslapoka um allan bæ! Ef Arnar Gauti kæmi í heimsókn myndi ég samt kaupa alvöru poka, jafnvel á netinu, það er ljóst!)

#437    Ég sé að við erum búnir að vera að heyja sömu baráttuna ;) Kíktu endilega á Okurþráðinn minn á málefnin.com. Margt ótrúlegt okur og siðleysi komið þar fram undanfarna mánuði. http://www.malefnin.com/ib/index.php?showtopic=101666

#436    Fór í Kringluna í gær til að kaupa gallabuxur og skó með dóttur minni. Byrjuðum í Gallabuxnabúðinni, fengum þar frábæra þjónustu og tvennar flottar gallabuxur á ágætisverði. 
Svo var komið að skónum og hún var að spá í Hummel skó, svarta með silfurskrauti, verðið rétt tæpar 12.000 kr. Keyptum nú ekki skóna, svo haldið var í aðra búð, Marþon, þar voru sömu skórnir á tæpar 10.000 kr. Þarna var hægt að spara sér 2.000 kall með því að labba nokkra metra. Ætla svo ekki að hugsa um hvað þessir sömu skór gætu kostað á Strikinu í Köben, er ekkert á leiðinni þangað. En var með syni mínum þar síðast liðið vor og hann keypti skó á 6.000 IKR, sömu skór voru á 10.000 IKR í búð hér á þeim tíma. Það er náttúrlega hægt að spara ef maður er á ferðinni í útlöndum, það vitum við öll. 

#435 / 435    Mig langaði að benda þér á ansi hressilegt okur hjá Heimilistækjum.
Meðalverð á nýjum Technics SL-1210 MKII plötuspilara í Bandaríkjunum er $500, og hefur verðið haldist í kringum $500 í þau 30 ár sem spilarinn hefur verið á markaði. Ástæðan er sú að framleiðslan hefur haldist óbreytt síðan 1978, sem þýðir auðvitað sama verksmiðja, sama færiband, sömu tæki, og nokkurnveginn sami framleiðslukostnaður -- og sparnaðinum er skilað beint til neytenda. Þannig að þrátt fyrir gengissveiflur og þróun raftækja síðastliðin 30 ár hefur verðið alltaf haldist það sama.
Heimilistæki eru að selja sama plötuspilara á 75.000 krónur.
Meðalverð í USA er 37.500 krónur (m.v. gengi 74)
Meðalverð í Bretlandi er 47.000 krónur. (m.v. gengi 146)
Heimilistæki selja spilarann akkúrat tvöfalt dýrari en hann kostar út úr búð í Bandaríkjunum, og enn dýrari en það ef dollarinn verður lægri.
Vegna þess sem ég nefndi að ofan, er augljóst að þau 30 ár sem spilarinn hefur verið á markaði hefur hann aldrei kostað 75.000 krónur.
Svo langaði mig líka að hrósa einu íslensku fyrirtæki. Hrósið fær PFAFF (já, hið íslenzka). Þeir eru umboðsaðilar Ortofon, og nál (Ortofon 2M Red) sem kostar $99 í USA og 60GBP í UK, þ.e. 7.500 og 8.800 krónur, kostaði hjá þeim 5.700 kr. áður en hún kláraðist. Í morgun sagði starfsmaðurinn að það hefði "auðvitað verið fyrir gengishrun, og í dag mætti ég bæta í kringum 1.000-1.500 krónum við verðið". Það gerir nálina samt ódýrasta! Mér finnst það magnað. Mig dauðlangar að versla við Pfaff -- ekki bara því þeir eru ódýrir, heldur eru þeir sniðugir og sanngjarnir, a.m.k. hvað þetta varðar. Og það besta af öllu er að á vefsíðu Pfaff eru nálar/cartridge/pickupar kallaðir "hljóðdós".

#434    Þurfti að láta víkka leðurstígvél fyrir stuttu og verð fyrir þá þjónustu kostar 3790.- hjá skósmiðnum í Smáralindinni en 1800.- hjá Skóaranum Reykjavíkurvegi í Hafnarfirði.  Rúmlega 100% verðmunur.

#433    Sunnudaginn var keyptum við nokkur rúnnstykki í Björnsbakaríi við Hringbraut. Stykkjaverð er 92 krónur óháð stærð og þyngd. Myndin talar sínu máli:

(nb. Þú getur kannski reynt að selja þetta á Ebay sem minnsta rúnnstykki í heimi?)

#432    Mig langar að benda á verslun sem leynir á sér og býður fólki að viðhalda gamla gemsanum sínum með eðlilegri álagningu á GSM aukahluti. Batterí sem kosta 4900-5900 hjá umboðsmönnum fást á 1990-3490 og það er líka hægt að fá skjái frá kr. 1500 í gamla símann. Einnig GSM partasala.  Langbesta aukahlutaverð á landinu og ódýr minniskort. www.simabaer.is

#431    Meira okur hjá Ingvari Helgasyni (IH). Vinnufélagi minn á Nissan Patrol jeppa og var að leita að poka á varadekkið (leðurlíkishulsu). Við hringdum í IH þar sem þessi forláti poki var verðlagður á 66 þúsund! OKUR. Að gamni okkur spurðum við út í hvað plast skel utanum varadekkið var verðlögð á.... og OKRIÐ fór upp úr öllu valdi: rúm 200 þúsund. OKUR OKUR OKUR! Í okur-losti ákváðum við að hringja í Bílabúð Benna, Stillingu og N1. Verði þar á pokanum var um 8 þúsund, 5 þúsund og 10 þúsund. Eini munurinn á pokanum frá þessum þrem aðilum og IH er að IH pokinn er með NISSAN PATROL merki. IH er OKURBÚLLA!

#430    Vildi láta vita af okri á þurrmjólk.. s.s SMA fyrir ungabörn. Lítil dós kostar 398 kr í Bónus en í Lyfju 1405 kr sama dósin!!!

#429    Ég er ein af þeim sem eru óheppnir í held ég flestu........Keypti bíl og setti annan uppí...sem var búinn að vera á sölu í tæp tvö ár og lánaði vinkonu minni fyrverandi bílinn....og hún skildi eftir sig skuld uppá 325.þ....Setti hann uppí bíl hjá Brimborg og mér var sagt að Jenið og frakkin væru best.......Núna sit ég uppi með rok dýran bíl og get ekki selt......Vegna hækkanna hjá Avant útaf vísitölu segja þeir......og Brimborg fyrrar sig af allri ábyrgð.....fekk örorku styrk uppá....250.þ...svaka mikið....
Svo Brimborg okraði á mér vegna viðgerða á bíl og sölu á þessum og hafði af mér...í allt 500.þ
Avant okrar líka vegna vaxta....Og skíringar eru vegna hækkana sem ég botna ekkert í.....geta logið að mér öllu... Núna sit ég í okur láni með okur vöxtum...fari stjórnin hér fjandans til...þarf bara tvo svo hún falli....... Mun aldrei skipta við Avant eða Brimborg oftar!
(ath: Svar Brimborgar: Eftir nánari skoðun þá kom í ljós að umrædd kona hafði sent inn kvörtun til okkar 6. mars 2008. Þann 13. mars var búið að hringja í hana og fara yfir fjármögnun bílsins og var hún sátt við þær útskýringar. Ekki gerði hún þá neinar athugasemdir við uppítöku eldri bíls. Hún valdi á sínum tíma að fjármagna með myntkörfu. Myntkarfan þýðir að vextir eru lægri en gengisáhætta kemur í staðinn og eins og alþjóð hefur upplifað þá kemur það harkalega niður á afborgunum í kjölfar veikingar á krónunni. Við þessu getur Brimborg lítið gert.

Hún segir að hún hafi verið búin að reyna að selja eldri bíl í 2 ár en ekki gengið. Þá kemur hún með bílinn til Brimborgar sem tekur hann uppí nýja bílinn á verði sem báðir aðilar voru ásáttir um. Í raun fín þjónusta og allt eðlilegt við þau viðskipti.

Varðandi kvörtun um viðgerðir þá kom í ljós að nýi bíllinn bilaði hjá henni og kom hún til okkar með bílinn til viðgerðar. Kom í ljós að rafgeymir var gallaður og fjarstýring virkaði ekki sem skyldi sem líklega má tengja rafgeymabiluninni. Allar viðgerðir voru í ábyrgð og greiddi manneskjan ekkert fyrir viðgerðir og fékk að auki frían bílaleigubíl á meðan á viðgerð stóð. Því undrast ég þá fullyrðingu að Brimborg hafi okrað á konunni vegna viðgerða. Ef það er allt í einu orðið okur að fá hlutina frítt þá er mér öllum lokið.

Með kveðju
Brimborg ehf.
Egill Jóhannsson, forstjóri
 

#428    Þetta með gönguskóna (#405): Ég ætlaði sjálfur að kaupa Scarpa gönguskó í Útilíf og Intersport í febrúar. Vel að merkja fyrir hækkunarflóðbylgjuna sem skellur á okkur núna. Verðið á skónum var þá 28.900 kr. Ég fékk illt í boruna við tilhugsunina um að kaupa á þessu verði. Þar sem ég var á leiðinni til Köben tékkaði ég á verði á skóm þar. Sömu skórnir var hægt að fá 1.089 dkr. Eða 13.700 á þáverandi gengi. Ekkert bull með tolla og virðisaukaskatt.! Þessar búðir eru sjálfar búnar að borga svoleiðis sjálfar og ekkert mikið lægri en hér á Íslandi. Ef sendingarkostnaðurinn er málið þá þyrfti það að kosta 41.2 milljónir að senda einn andskotans 40 feta gám frá Dk til íslands. Þar sem mér reiknast til að einn gámur gæti tekið um 2600 pör. Þetta er helv. okur og jaðrar við glæpsamlegt athæfi.
Þetta er verðsamráð. Það er verið að vega að okkur neytendum með samanteknum ráðum, allir óbreyttir þegnar skulu mergsognir.!

#427    Ég er í HÍ og er blönk eftir því. Er að læra á Hlöðunni þessa dagana og þar sem mötuneytið þar er mjög dýrt (það er ódýrara að fara út á Select og fá sér að borða), þá tók ég með mér nesti (dugleg ég), meðal annars tók ég með mér samloku með skinku og osti og hugsaði ég hlýt að geta hitað hana en þegar ég fór í mötuneytið þá var hvorki rist né örbylgjuofn sem ég gat notað. Ég spyr stelpuna hvort það sé ekki eitthvert tæki sem ég get notað til að hita samlokuna mína og þá fæ ég þessi svör: jú það er örbylgjuofn og það kostar 50 kr. að nota hann. Svarið sem stelpan fékk var: Ha?? Og þá endurtók hún svarið sitt. 
Ég veit að 50 kr. er sossum ekki mikið en samt að rukka fyrir notkun á örbylgjuofni í mötuneyti! Hvergi á Háskólasvæðinu er rukkað fyrir notkun á örbylgjuofni nema á Þjóðarbókhlöðunni. Finnst þetta hallærislegt því Háskólinn reynir að hafa allt eins ódýrt og hann getur (t.d. er hægt að fá heita og góða máltíð á 550 kr. á Háskólatorginu sem er ekki mikið – miða við á Þjóðarbókhlöðunni kostar heit máltíð 850 kr), en að rukka fyrir notkun á örbylgjuofni finnst mér vera hneyksli! En til að ljúka sögu minni þá ætlaði ég sko ekki að borga fyrir að hita samlokuna mína svo ég borðaði hana bara kalda.

#426    Eitt mesta okur á Íslandi í dag er að finna nálægt Grindavík. Okkar frægasta heilsulind sem lifir á heitu vatni úr iðrum jarðar (sem allir ættu að eiga, ekki satt?) en Bláa Lónið rukkar inn 1.800 kr.- fyrir aðgang....OG ÞAÐ ER VETRARVERÐIÐ!!! Í sumar koma forsvarsmenn Bláa Lónsins til með að rukka 2.300 kr.- inn....þetta er ekki fyrir verð á hópa heldur einstakling!
Þarf eitthvað að segja meira? Segir þessi verðskrá ekki allt sem segja þarf? Hvernig á íslensk fjölskylda sem vill njóta „Bláa lónsins“ að geta baðað sig án þess að veðsetja húsið sitt?
Þetta er eitt það heimskasta sem ég veit um! (nb. Það hefur áður verið bent á okrið í Bláa lóninu - #250. Þetta hækkar náttúrlega bara og hækkar hjá þeim og það er geðsturlun fyrir Íslendinga að fara þarna, ergo: Bláa lónið er ekki fyrir Íslendinga, nema kannski nautheimska Íslendinga eða forríka. Hins vegar er búið að koma því inn hjá útlenskum ferðamönnum að Lónið sé málið og þeim finnst eflaust eðlilegt að borga svona mikið fyrir þetta - vita ekki betur greyin enda heitt vatn ekki eins auðfundið hjá þeim og hér. Út í hinum stóra heimi er líka yfirleitt rándýrt í svona "túristagildrur", ég fór t.d. í skitinn dýragarð á Spáni og borgaði 20 Evrur á kjaft og 15 fyrir soninn. Ég býst því við að túristarnir séu ekkert svo skelfdir yfir þessu þótt við fussum og sveium. Kannski ætti Bláa Lónið að vera með tvö verð, 300 kall fyrir "okkur" og 2000 aukatoll á útlendinga? Ég er að minnsta kosti ekkert að fara þarna í bráð!) 

#425    Símafyrirtækin rukka 6.000 á mánuði fyrir þokkalegt ADSL, heil 6-8 Mbps. Í Rotterdam er hægt að fá 20 Mbps á 20 evrur, ca 2.500 kr! Aðspurður segir Síminn “að þeir séu ekki að keppa á því markaðssvæði.” Hvað segir þetta? Öll sala á ADSL hérlendis er hreint okur.
SMS skeyti er selt á 15 kr. Það eru 160 stafir = 160 Byte eða 1280 bitar. Hver biti kostar þannig 0,011719 kr. Í tali eru sendir um 4000 bitar á sek. Ef talmínútan er seld á 15 kr, þá kostar hver biti þar 0,0000625 kr. Munurinn er 187 faldur ! Greitt er 187 sinnum meira fyrir SMS bita en talbita. Bitarnir ferðast saman um stengina og símafyritækin borga það sama fyrir að flytja báða. Er gjaldið fyrir SMS ekki OKUR?!

#424    Fór í Byko á Hringbraut í gær til að kaupa lím „superglue“ til að líma saman Pétur Pan plastkall sem 5 ára sonur minn á. Aðeins ein týpa af lími var til og ég fékk gott lím í góðri flösku með fínum tappa sem þarf ekki að taka af. Límið virkaði og sonur minn er ánægður. Gallinn er bara að fyrir þessa flösku sem er minni en naglalakks krús, borgaði ég rétt tæpar þúsund krónur!

#423    Var að kaupa Samsung 46" sjónvarp í  Danmörku á 14.195 dkr sem að  gerir 217.183 ísk miðað við gengi á kaupdag þann 11-04. Sama sjónvarp fæst hjá Bræðrunum Ormson á 499.000 ísk sem að gerir 32.6214 dkr. Hefði kannski átt að kaupa 2 stk.

#422    Hér er snöggsoðin úttekt á þróun bíómiða og gjaldi fyrir myndbönd: http://www.123.is/thorkell/blog/record/234167/

#421    Mér langaði aðeins að deila með ykkur hversu mikil okurbúlla Úrval Útsýn er, fyrir utan það hversu ólöglegt það er að nota myndir af Bruce Springsteen til þess að selja pakkaferðir. Einhvernvegin efast ég um að hann hafi verið beðin um leyfi ; )
Hér kemur það:
Úrval Útsýn eru að auglýsa tónleikaferðalag á Bruce Springsteen í Parken 27. - 30. júní. Innifalið í pakkanum er gisting á 3ja stjörnu hóteli og kostar hann 89.500kr. á mann í tvíbýli eða ss. 179.000 kr. fyrir par.
Miðarnir á tónleikana sem fylgja pakkanum kosta hinsvegar aðeins 500 danskar (og eru upp undir þaki Parken eins langt frá sviðinu og hægt er að komast.)
Ef miðagjaldið er dregið frá kostar ferð til Danmerkur með gistingu í þessum pakka 163.222 kr. fyrir par skv. genginu í dag.
Til samanburðar kostar flugferð fyrir 2 með Iceland Express 59.050 kr. fyrir sömu dagsetningar.

#420    Fór á Aktu taktu um daginn, fékk skyndilöngun í pylsu á Sæbrautinni svo ég
sveigði inn á planið hjá þeim. Meðan ég beið eftir "einari" með öllu þá varð
mér litið á matseðilinn þeirra, við erum sammála því flest að þessi búlla er
voðalega dýr en held að þeir hafi alveg farið overboard með verð á aukaáleggi
hjá þeim.

Auka álegg
Kál - 50 kr (hvað kostar heill kálhaus af iceberg?)
Ostur, aspas, ananas - 99 kr (ostsneið á 99? gætir örugglega fengið dós af hinu
á betra verði)
Hrár/steiktur laukur - 89 kr (hvað fær maður MARGA lauka fyrir 89kr og pokinn
af steiktum er sjaldnast dýrari en þetta, nema þá líklega í 10-11?)
Súrar gúrkur - 89 kr (heil krukka kostar líklega rétt rúmlega þetta)
Skinka, beikon, sveppir - 189.- (Ein skinkusneið?? Hvað mikið af beikoni og
sveppir?? Alveg í takt við sveppaumræðuokrið!)
Egg - 189 (Við erum alveg sammála um að þú getir fengið 10 egg fyrir sama verð)

Verðin eru heldur ekkert í takt, pylsan var á 200 kall en auka skinkusneið á
189? Meikar ekki sens fyrir mér. Þetta kalla ég bara djöfuls okur! Á eftir að halda í mér pylsulönguninni þangað til ég kem heim, því í Bónus get ég keypt 5 pylsur og pylsubrauð fyrir 300
kall, sem gerir eina og hálfa pylsu á Eikitt Teikitt.

#419    Já það alveg hrikalegt hvað það er okrað á manni nú til dags og maður veit varla hvar maður á að byrja. En mig langar til þess að nefna hér 2 dæmi.

Fór í Hagkaup í minni fávisku og ætlaði að kaupa barnatannkrem fyrir dóttur mína, 
og ég varð bara agndofa yfir því hvað þetta Colgate tannkrem kostaði 705 kr takk...705 kr VÁÁÁÁÁ....  og við hliðina á þeirri túpu var alveg sama túpann nema annað bragð og það kostaði 439 kr.....hvaða bull er þetta með verðið.

Auk þess langaði mig til að koma því áleiðis að fólk á að panta sitt fæðubótarefni að utan beint en ALLS EKKI versla við okurbúllur sem eru hér heima. Það er enginn tollur á fæðubótarefni heldur einungis 7% VSK svo ég skil ekki þessa álagninu hjá mörgum sem selja fæðubótarefni.

#418    Eg er tvisvar búin að lenda í því að vera borða úti á veitingastað þar sem ég fæ reikninginn vitlausan þar að segja samlagningin.  Það er rétt verð á matnum og víninu en þegar þú tekur tölurnar sjálfur og reiknar þá færð þú ekki það sama t.d: 

Pasta              2500
Fiskur            1990
Bjór                 650
Bjór                 650
Samtals        5790   þetta er rétt.

En svona:

Pasta              2500
Fiskur            1990
Bjór                 650
Bjór                 650
Samtals        6790   hefur verðið reynt að fá mig til að borga.

Og nei þetta var ekki handskrifaður reikningur heldur tölvuprentun. Þegar ég kvartaði var beðið afsökunar og reikningurinn tekin af mér og annar sóttur strax. Þegar fólk fer út að borða kíkir það á reikninginn og ath hvort allar tölur séu réttar en dettur ekki í hug að athuga hvort það sé rétt reiknað. (nb. Ókei muna: Taka vasareiknivél með út að borða.)

#417    Var að vandræðast með púst á Nissan Patrol jeppanum mínum. Hringdi í umboðið til að ath. hvað það kostaði fá orginal púst frá hvarfakút undir bílinn. Ræddi við starfsmann í varahlutaversluninni. Bara pústið (rústfrít) kostaði um 140.000 (selt í þrem aðskildumhlutum) síðan var  vinnan við að setja pústið undir bílinn var að lágmarki á 50.000 eða um 5 tíma (10.000 kall tímann) eða 190 þúsund. MEGA OKUR hjá Invari Helgasyni (IH), það mætti halda að pústið væri smíðað úr Gulli og skreyt Demöntum. Fékk púst hjá Pústþjónustu Einas, sérsmíðað á 42.000 kall undir bílinn komið. Mér er alveg sama þó IH selji orginal púst út rúsfríu stáli... það dugar bara í sex til 7 ár á meðan pústið frá Einari dugar í 3 til 4.... þá get ég látið Einar setja 4 púst undir hjá mér á meðan IH setur eitt..... þannig næ  ég 16 ára líftíma á meðan ég keyri pústið frá IH í 7 ár......... Ingvar Helgason er OKURbúlla......

#416    Verð að láta þig vita af okurbulli í Bónusvideo, Lönguhlíð.  Fór þangað til að kaupa Góu karamellur í poka.  Drengurinn í afgreiðslunni vissi ekkert hvað pokinn kostaði og fann hann ekki í tölvunni.  Hann tók því upp á því að blanda saman tveimur hlutum til að búa til verð á karamellupokann (án þess þó að benda mér sérstaklega á það). Hann semsagt mixaði verð út frá Mentos (120 kr.) og Góu súkkulaðirúsínum (175 kr.) og lét mig borga 295 kr. fyrir karamellupoka (sem kostar um 130 kr. í Bónus). Þegar ég spurði hann út í þetta ypti hann bara öxlum og sagðist vera að búa til þetta verð þar sem þetta væri ekki til í tölvunni.  Þar sem konan mín beið heima spennt eftir karamellunum sá ég mig tilneyddan til að kaupa téðan poka, en er enn að svekkja mig á þessu og mun beina viðskiptum mínum annað í framtíðinni. (nb. Aldrei að láta undan karmellusjúkum eiginkonum!)

#415    Fór í Bakarameistarann um daginn, gerðist sekur um að eiga þátt í okri aldarinnar, 165 krónur fyrir minnstu rice crispies köku sem ég hef séð á ævinni.

#414    Okurbland í poka: Versla nú alltaf í Bónus en vantaði Sojamjólk eina helgina og lokað í Bónus, þá fór ég í 10/11 Glæsibæ og borgaði eilar 259 krónur, en hún kostar 139 krónur í Bónus!!!
Mér hefur reynst best að versla við Garðsapótek – ég talaði bara beint við apótekarann og sagðist skyldi beina öllum mínum viðskiptum hans, er reyndar með einn fjölskyldumeðlim sem nota dýr flogaveikilyf, en ég fæ extra viðbótarafslátt af öllu sem ég kaupi þar. Eitt dæmi: Body Fantasies ilmspray kostar 315 í Garðsapóteki en nálægt 600í Lyfjubúðunum – fer ekki inn í þær lengur.
Með svona aðhaldi í heimilisrekstri hefur mér tekist að spara 200 – 400. þús á ári, enda förum við oft til útlanda á hverju ári.

#413    Forvitnaðist um verð á 3/4 síðum herra rykfrakka í Herragarðinum  Kringlunni Verð kr 89.900 Undrandi yfir verði var mér sagt að um væri að ræða ull. Ætti að segja: um er að ræða okur!

#412    Af því þú mælir nú með Mosfellsbakarí langar mig að benda þér á að ég fór þangað í hádeginu og keypti mér súpu og hafði hún þá hækkað um lítil 60% frá því í síðustu viku, eða úr 750 krónum í 1200 krónur.

#411    Ég bý á Akureyri og fer þess vegna stundum í Bakaríið við brúnna sem er afar gott bakarí. Brauðið þar er hins vegar fjandi dýrt (hálft matarbrauð 190 kall).
Steininn tók þó úr um helgina þegar ég asnaðist til að taka með mér ÓVERÐMERKTAN stauk með 36 tegrisjum. Verðið á honum var næstum því 1400 krónur!!! Tebollinn því á næstum því 40 krónur heima í eldhúsi. Þetta er okur.

#410    Pítsuát er alltaf jafnvinsælt en vanda verður valið ef menn vilja ekki
fara á hausinn við að panta ofan í fjölskylduna. Ef e-r hefur farið
nýlega á Hróa hött ætti viðkomandi að vita hvað ég er að tala um.
Hakkið þeirra hlýtur að vera búið til úr Kobe nautgripum og
pepperoníið úr afrískum villisvínum, a.m.k. ef verðið á að endurspegla
gæði vörunnar. Meira að segja Domino's-búllan kemur vel út úr
verðsamanburði við Hróa hött. Hér eru tvær algjörlega sambærilegar
pítsur frá sitthvorum staðnum:
Domino's - 15" Domino's Extra (pepperoni, skinka, nautahakk, græn
paprika, laukur, sveppir, svartar ólífur, extra ostur): 2.590 kr.
(Heill helvítis hellingur en samt hreint og beint ódýrt í samanburði
við ...)
Hrói höttur - 15" Supreme (pepperoni, skinka, nautahakk, paprika,
laukur, sveppir, ananas, extra ostur): 3.790 kr. (Ekki nema helmingi
dýrari en keppinauturinn!)
Hvaða heilvita maður kaupir annars brauð með áleggi á tæpan 4000
kall?! Þetta er algjör bilun! Sem betur fer sá ég þetta á netinu áður
en ég fór á staðinn, annars hefði maður farið fýluferð því þetta er
ekki hægt að láta bjóða sér. 

#409    Nokkrir vel valdir okurpunktar: 
Ég verð að segja þér að ég er ekki alveg sammála þér með að það séu ódýrar lífrænar vörur í Yggdrasill. Mér finnst ansi dýrt að þurfa að borga 400 krónur fyrir lítinn poka af þurrkuðum ávöxtum. Eða þá 200-300 krónur fyrir pinkulitla flösku af lífrænum ávaxtasafa. Mér finnst Heilsuhúsið lítið skárra, verra ef eitthvað er. Svo er starfsfólkið í báðum búðunum yfirdrifið fúlt og leiðinlegt og segir ekki einu sinni góðan daginn. Maður ætti ekki að versla á svona stöðum en mér finnast lífrænir ávextir bara algjört sælgæti. Það er til skammar hvað lífrænar vörur eru dýrar hér á landi. 
Lítill kassi með Draumabitum frá Freyju kostar 599 krónur í 10-11. OKUR!
Mér finnst mjög gaman að sauma út og fer yfirleitt í Erlu á Snorrabraut, krúttleg búð og fínt verð. Ég prófaði samt að kíkja í Nálina á Laugavegi um daginn þar sem ég átti leið þar hjá. Það er okur. Mynd af stillimyndinni á Rúv kostaði 6.000 krónur hvorki meira né minna. Aðrar myndir voru ódýrari en samt of dýrar að mínu mati. Ég ætla héðan í frá að halda mig við Erlu.
Ég fór í daginn í N1, var á hraðferð annars hefði ég farið í bónus. Keypti eina appelsínu, eina peru og trópí. Þetta kostaði hvorki meira né minna en 364 krónur. OKUR!
Ég er ekki mikill aðdáandi James Blunt og skil þar af leiðandi ekki hvaða heilvita maður myndi kaupa miða á tónleikana hans hér á landi í sumar á 14.900 krónur! Það er fyrir besta svæðið. Annars er það 12.900, 9.900 og 5.900 krónur. Algjört okur fyrir tónlistarmann sem er ekki merkilegri en þetta. Ég myndi kannski borga svona upphæðir fyrir gullaldarhljómsveitir eins og Eagles eða eitthvað álíka, en ekki James Blunt!
Mér finnst fáránlegt að Heimsferðir hækki ferðir sem maður er búinn að borga staðfestingargjald á sökum gengisfellingar krónunnar. Krónan er búin að hækka eftir þessa hækkun - lækka Heimsferðir verðið þá aftur? Nei auðvitað ekki. Það er alveg pottþétt að ég ferðast ekki með Heimsferðum aftur. Og ég vil hrósa Úrval--Útsýn og dótturfyrirtækjunum tveimur, Sumarferðum og Plúsferðum fyrir að hafa verðið hjá sér óbreytt.
Fyrir svolítið löngu síðan fór ég á Toni and Guy í klippingu. Ég hafði heyrt góðar sögur af þeim og vildi prófa þó ég vissi að það myndi vera dýrt. 6.600 krónur þurfti ég að borga fyrir sítt hár og útkoman var alls ekki eitthvað "spectacular". OKUR!

#408    Keypti ís í boxi um helgina í ísbúðinni í Smáralind.  Stærri gerðina af boxi og heita sósu, bað um svolítið vel af sósunni. 560 krónur þurfti ég að borga fyrir ísinn.  Ég spurði hvort einn ís kostaði virkilega 560 kr. "já" svaraði afgreiðslustúlkan "það er sko heita sósan". Hef ekki athugað hvað svona ís kostar annars staðar en mér finnst þetta okur.

#407    Eftir langan og strangan lærdómsdag í Háskólanum fórum ég og vinur í 10/11
matvörubúð sem er staðsett miðsvæðis á Stúdentagörðunum. Okkur langaði til
að baka Betty Crooker súkkuladiköku og fórum í téða verslun fullir
tilhlökkunar. Þar sem að kremið á kökuna var ekki til í búðinni ákváðum
við að henda okkur í bónus laugarvegi. Ég veitti þó verðinu í 10/11
eftirtekt þar sem mér fannst það skammarlegt, heilar 579 krónur. Í bónus
fékkst grunur minn um okur staðfestur þar sem sama kaka kostaði 249
krónur. Um það vil 100% verðmunur. Eftir þetta hef ég ekki stigið fæti inn
í þessa 10/11 búð og mun koma til með að sniðganga hana að eilífu. Þessi
búð er staðsett þarna fyrir fátæka Háskólanema og er alltaf aveg troðfull
af fólki að versla inn heilu máltíðirnar. Flestar vörur þarna eru a.m.k
50% dýrari en í Bónus. Í þessum töluðu er ég að búa til “flyera” sem ég
mun skilja eftir fyrir utan búðina með nokkrum vörum og verðsamanburði og
vonast ég til þess að menn vakni af þessum blundi. Að menn skuli vera
svona agalega sinnulausir gagnvart okrinu er til skammar og það virðist
vera sem það sé orðin einhverskonar hefð hjá neytendum á Íslandi að láta
fara svona illa með sig. Eins og þetta sé bara vani og ekkert sé hægt að
gera í málunum. Burt með þessa helvítis búð og í fangelsi með þessa
glæpamenn. (nb. Tja, það eru reyndar þeir sömu "glæpamennirnir" sem eiga 10/11 og Bónus svo það er bara að velja þá hendi sem stríkur þér en ekki þá sem slær þig.)

#406 / 406    Ég fór í Bónusvideo í árbænum um daginn og ætlaði að leigja mér mynd og var nú fljótur að labba út aftur þegar það kom í ljós að þeir ætluðu að rukka mig 700kr. fyrir, málið er að 2min í burtu er Skalli í hraunbæ og þar kosta ný+gömul kr.400.-

#405    Ég hef núna í nokkurn tíma verið að leita mér að gönguskóm. Svona hard core gönguskóm sem þola nánast hvað sem. Þannig að ef mig langar að fara og þramma eitthvað lendi ég ekki í því eins og s.l. sumar þegar ég skellti mér upp að Glym að vera nálægt því að fótbrjóta mig í stórgrýttri urð vegna þess hversu illa ég er skóaður. Strax í upphafi var ég með ákveðna skó í huga vegna góðrar fyrri reynslu af þeim.
Það er skemmst frá því að segja að ég var fljótur að finna rétta stærð og spotta út 2 verslanir sem selja þessa skó og komst að því að báðar verslanirnar voru með þá á sama verði, 24.990. kr. Annars vegar í Útilífi þar sem ég fékk nú fyrir rest alveg ágætis þjónustu hjá manni sem samt vissi nánast ekkert um vöruna sem hann var að selja. Hinsvegar í Intersport hvar fýlan og leiðinn lak af miðaldra starfsmanni sem vissi nákvæmlega allt um það sem hann var með í höndunum.
Þetta var í vikunni fyrir páska. Svo ákveð ég að salta málið í bili og athuga hvort ég finni skónna e.t.v. ódýrari annars staðar eða jafnvel aðra skó sem gætu líka hentað mér.
Svo í síðustu viku var ég á ferð og ákvað að skella mér í Útilíf og versla mér skónna sem ég var orðinn harðákveðinn í að eignast. Ég vatt mér inn og rak augun í verðmiðann 29.990 kr. 20% hækkun á skóm sem voru til í svo miklu magni í einni Útilífs búð fyrir páska að nægt hefði til að skóa vel stóra björgunarsveit. Í mínum villtustu órum get ég ekki ímyndað mér að salan á svona skóm sé slík að þeir hafi verið búnir að torga fjallinu sem ég sá í Kringlunni fyrir páska á 3 vikum. Nei, ég ætlaði sko ekki að versla við svona siðlausa verslunarmenn sem hlaupa til og hækka í skjóli hækkunnar gengis verðið á gömlum lager. Í Intersporti skyldi ég kaupa þessa skó og hana nú.
Daginn eftir lá svo leið mín þangað til að ná í skóna. Brá þá svo við að sami fýlukarlinn var öllu argari í þetta skiptið og skórnir líka búnir að hækka hjá honum þannig að ég eiginlega lippaðist niður með skottið á milli fótanna. Ó, aumur ég. Ég neyddist til að halda leit minni að heppilegu skótaui áfram enn um sinn.
Jæja. En það er ekki allt svo svart eftir allt. Því ég held að ég sé bara hreinlega búinn að finna lausn á skó hallærinu og eigi nú tvenna en ekki eina skó sem henta við sin hvorar aðstæðurnar og til samans kosta ekki nema 28.990 kr.

#404    Vantaði nýjan rafgeymi fyrir vespuna mína hann kostar 8.105 kr. hjá Rafgeyma sölunni. 
Sami geymir komstar 24.99 pund á Englandi sem sagt 3600 kr á geningu í dag. OKUR!!!!!!!!

#403     Hér er sú hækkun sem ég tók mest eftir. Þannig er mál með vexti að ég versla gjarnan barnaföt í Benetton í Smáralind. Mig rak í rogastans um daginn þegar ég komst að því að það virtist að allar vörur höfðu hækkað um 40 til 50% á afar skömmum tíma. Ég hafði skoðað sömu vörurnar nokkrum vikum áður og keypt m.a. nokkra hluti. Sem dæmi má nefna að bolur sem var á 995 er kominn í 1395, sokkar úr 495 í 895, leggings úr 1195 í 1745 eða 1795 o.s.frv. Hef hvergi séð svona hækkun annars staðar. Ég get ekki ímyndað mér að fólk versli mikið þarna þegar það áttar sig á þessu, a.m.k. þakkaði ég pent fyrir mig og fór út með ekkert.

#402    Sá auglýsingu í DAGSKRÁ VIKUNNAR frá því í febrúar frá versluninni HREYSTI um tilboð á á nýrri kynslóð Slendertone tækja. Þetta kostar nú sitt þannig ég var svona að hugsa málið. Sama auglýsing er í apríl tölublaði og hafa öll tilboðin hækkað um c.a.4000kr. Vá þvílík tilboð hehehe. RUGL. Ætli maður þurfi ekki bara að fara að hreyfa á sér rassgatið það kostar ekki neitt :)

#401  Var verið að taka fjölskyldu myndirnar í gegn, og þurftum við 10 albúm að við héldum fórum í Bónus Laugarvegi og fengum 200 mynda albúm á 379 kr  vantaði 2 albúm í viðbót og við förum í Hans Petersen 699 kr sama albúm "okur", ok,   svo fundum við að sjálfsögðu enn fleiri myndir og við förum aftur í Hans Petersen því við vorum orðin frekar sein, þetta er daginn eftir,  þá var komið tilboð borgar fyrir 2 albúm en færð þrjú,  sem hljómar ágætlega, nema hvað það var búið að hækka albúmið úr 699 kr í 1200 kr og búið til tilboð... OKUR ef ekki bara svik og prettir

Okur #367 - 400 eru hér.

Veistu um viðbjóðslegt okur? Láttu vita!