Shaun of the Dead --> dvd XXX
Fínt stöff en kannski ekkert jafn ógeðslega æðislegt og margir vilja meina.

Ricky Garvais live Animals --> dvd XXX
Skemmtilegt standöpp frá þessum asnalega meistara. Hefði kannski verið enn betra með texta, er bara ekki sleipari í talaðri ensku en þetta.

Crimson Rivers 2 --> videó X
Lélegt. Sofnaði tvisvar við að reyna að horfa á þessi leiðindi.

Ladykillers --> videó XXX
Byrjar mjög hressilega en slappast svo aðeins niður. Kannski ég bara þreyttur. Allavega fínasta mynd frá Coen bræðrum, sem rísa nú upp eftir Intolerable leiðinda myndina sína.

Open Water --> bíó XXX
Bandarískt par er skilið eftir á hafi úti og hákarlarnir synda allt um kring. Bara nokkuð spennandi og flott þótt Jón Gnarr hafi skemmt allt með því að segja hvernig myndin endar í Tvíhöfða.

Dís --> videó XX
Ágætt miðað við íslenskan standard, klisjur (ekkert nema listamenn og snillingar í Rvk - já einmitt, þið meinið á Skólavörðustíg...) og týpur og ekki beisinn eða frumlegur söguþráður (það var ljóst frá fyrstu mínútu að Árni Tryggvason myndi hrökkva upp af), en það má alveg horfa á þetta svo sem. Voðalega íslenskt eitthvað. Virkar kannski sem landkynning eins og 101 rvk, sem var með svipuðum 101 fílingi.

Respiro --> videó XXX
Gerist á einhverri lítilli eyju við Ítalíu. Krakkar æslast í sífelldri sól, mamman er flippuð og á undir högg að sækja meðal jarðbundinni þorpsbúa sem vilja senda hana á hæli. Myndin líður vel og þér líður vel að horfa á þetta og vilt komast í heitara umhverfi.

Sannleikurinn um Ísland, alfræði Baggalúts --> bók XXX
Þeir spruttu upp fyrir nokkrum árum, karlarnir í Baggalút, með spéspegil á íslenskan raunveruleika í dulargervi vísindamanna á 19.öld. Mjög sniðug nálgun, oft helvíti fyndið hjá þeim og allt í sjálfboðavinnu. Svo kom niðurlægingartímabilið á Rás 2, frekar slappt glens og bitlaust þegar maður nennti að hlusta (maður setti það ekki á stundarskrána eins og að heimsækja heimasíðuna), en þar eru þeir blessunarlega hættir og byrjaðir aftur að snillingast á heimasíðunni sinni. Nú er komin fyrsta bók (ISBN 9979-2-1811-8) þeirra í fullri stærð (224 bls í Demy broti) og er hún miklu betri en ég þorði að vona, enda engin hundleiðinleg lög eða vísur í bókinni.
Bókinni er skipt í 5 hluta: Íslendingar / Íslensk arfleifð / Framfarir og atvinnulíf / Lífríkið Ísland / Dulheimar. Í hverjum kafla er fjöldi lítilli pistla, oft með mynd, ekki ósvipað fyrirkomulag og á heimasíðunni góðu, nema hvað hér er oft notast við neðanmálsgreinar. Margt er hér dillandi skemmtilegt og bráðsniðugt, en ekki alveg allt, eins og gengur og gerist. Þetta rennsli er brotið upp með "blaðaúrklippum" og drepfyndnum listum, sem eru hæglega það best heppnaðasta í bókinni. Bókina góðu les maður varla í einum rikk nema maður sé eitthvað skrýtinn, en gott er að hafa hana t.d. á klósetti og glugga í henni þar eða á kaffiborði, sbr. vísindaheitið "coffee table book". Sannleikurinn um Ísland er svo sannarlega jólagjöfin í ár og ætti að hitta í mark hjá öllum með þokkalega kímnigáfu. Karlarnir á Baggalút eiga greinilega mikið eftir sem er geðsýkislega unaðsleg staðreynd.

Múrinn í Kína e. Huldar Breiðfjörð --> bók XXX
Las "Góðir Íslendingar" í honeymooninu mínu á Hawaii. Það var ágætis bók. Hér er Huldar með ferðasögu af því þegar hann gekk, fór með rútum, hjólaði o.s.frv. meðfram megninu af Kínamúrnum. Kína er manni frekar hulin en bók Huldars lýsir aðeins upp fyrir manni landinu. Fátækt, óþrifnaður, flokkshollustuheilaþvottur, karókí. Eitthvað er um listrænt rugl í Huldari, eitthvað taut um dreka sem ég skyldi ekki og fleira, líklega til að lyfta bókinni upp á eitthvað plan. Það er þessi listræni rembingur sem gerði einmitt illt verra í Niceland og hinni myndinni sem hann skrifaði og betra væri ef hann hætti þessu rúnki og tæki bara raunveruleikann á það. Yrði miklu skemmtilegra. Þessi bók er engu að síður hin fínasta lesning og Kína verður nær en áður. Get samt ómögulega sagt að mig langi mikið þangað. Spurning um að tékka á Norður Kóreu frekar.

Elf --> videó X
Æ eitthvað svona barnajólagrín. Svosem sæmilegt ef maður er í stuði fyrir svona. Mér finnst Will Farrell ekkert sérlega fyndinn.

Love Actually --> videó XX
Hin árlega enska konumynd og bara alveg ókei. Öllum leikurum Englands hrúgað saman og svo fylgjumst við með ýmsu ástardótinu. Allt endur svo auðvitað vel og áhorfendur koma út glaðir í jólin. Þunnt Feel good, en fínir sprettir eins og hjá gamla rokkaranum.

Serge Gainsbourg, A fistful of Gitanes --> bók XXX
e. Sylvie Simmons. Gainsbourg var snillingur og það er gaman að lesa þessa bók. Er þó frekar þunn og ekki mikið kjöt á beinunum. Vantar meiri djúsí sögur og díteila. Dálítið í kynningarstíl, verið að kynna meistarann fyrir enskumælandi. Maður fær örugglega ekkert kjöt fyrr en maður lærir frönsku og fær sér innanlandsbók.

Starsky & Hutch --> videó XX
Ben Stiller enn á ferð, en þótt þetta sé ágæt mynd er hún ekkert yfirþyrmandi fyndin. Fínt í þynnku með djönkfúddi.

Dodgeball --> bíó XXX
Mjög helvíti fyndin mynd enda Ben Stiller traustur. Næstum því sami söguþráður og í Kingpin, en það kemur í ljós þegar maður sér þessa mynd í annað sinn hvort hún sé 100% klassík.

Old Gods Almost Dead --> bók XXXX
Stephen Davis (hefur líka skrifað bækur um Jim Morrison, Aerosmith og Led Zeppelin) er mjög þéttur rokkhöfundur og hér segir hann sögu Rolling Stones á lifandi og hressilegan hátt. Hann er aldrei með stjörnur í augunum yfir viðfangsefninu, sem gerir söguna ómærðarlega og ekta, en of margir vilja falla í pytt oflofsins.

The Butterfly Effect --> dvd XXX
Fínasta mynd þó sæta ógeðið Kusher sé í henni. Della auðvitað, en alveg fín engu að síður.

Pönkið og Fræbbblarnir --> bíó XXXX
Bráðskemmtileg og fyndin heimildarmynd um frábæra hljómsveit og góða tíma í íslensku rokki. Nostalgískt ævintýri sem hægt verður að ylja sér við lengi!

Blindsker --> bíó XXX
Dáldið kaos, dáldið hrátt, dáldið ónákvæmt, en engu að síður skemmtilegt, enda Bubbi eini Bubbi landsins og frábær sem slíkur.

Io non ho paura --> videó XXXX
Eða "I'm not scared" eins og hún heitir á umslaginu. Ítölsk mynd um strák sem finnur strák sem er haldið í holu. Gerist í sveit og er hæg en gríðar spennandi og í flesta staði flott mynd. Er víst byggð á sönnum atburðum. Fór í 4 videóleigur áður en ég fann hana (Sólvallagötu), ætli ítalskar myndir séu ekki of framandi fyrir venjulegar videóleigur.

The Dish --> videó XXX
Ástralskt feelgood grín um mennina sem sáu um að manna gerfihnattardiskinn sem fylgdist með Neil Armstrong og kó þegar þeir fóru til tunglsins.

The Corporation --> bíó XX
Sett fram einum of líkt 60 minutes eða eitthvað. Ég var allavega ekkert ægilega upprifinn, en svo sem alltaf þörf á að minna mann á að allt er að fara til fjandans.

The Yes Men --> bíó XX
Gaurar með boðskap rugla í liði, virðist samt ekki vera neitt topp lið bara einhverjir grandvaralausir Finnar og eitthvað.

The Shape of things --> videó XXX
Neil LaBute er samur við sig og nastí að vanda. Hér er það listagella sem fer illa með nörd. Gaman að því.

The Day after Tomorrow --> videó XX
Allar stórslysaklisjurnar í einum pakka með rétthugsandi í pokanum. Skemmtileg tilviljun að í The Day After var paranojan kjarnorkusprengjan, en nú er það gróðurhúsaógnin. Í báðum myndunum borða menn súkkulaði en þessi endar á miklu jákvæðari nótum en hin. Samt, frekar slappt stöff, The Day after var betri!

Secret Window --> videó XX
Fattaði plottið snemma sem er lélegt því oftast fatta ég ekkert. Þokkalegt engu að síður.

Taking lives --> videó XX
Allar fjöldamorðingjaklisjurnar á einum stað í mynd sem byrjar vel en lognast smám saman út af og endar í algeru rugli.

Triumpf des Willens --> bíó 0
Hálfvitar marsera um í lúðrablæstri með útréttar hendur og glápa hrifnir á eins eistna baulandi dverg með asnalegt yfirvaraskegg. Hræðilega leiðinlegir tveir klukkutímar en Bæjarbíó er frábært bíó þó maður fái æðatappa af gamaldags þrenglum.

Supersize me --> bíó XXX
Fróðleg og nokkuð almennileg mynd. Spurlock er skemmtilegur gaur. Fékk mér samt alveg McDonalds nokkrum dögum eftir, það er ekki það.

The Bounty Trilogy (Mutiny on the Bounty / Men Against the Sea / Pitcairn's Island) e. Nordhoff & Hall --> bók XXX
Loksins e. ca 6 mánuði er ég búinn með þennan doðrant og er það vel. Uppreisnin á Bounty er stórfengleg harm- og ævintýrasaga og gaman að segja frá því að afkomendur uppreisnarmanna frá 1789 eru ennþá á eyjunni. Spennandi og sígilt stöff.

L'Appartement --> videó XXX
Franska myndin (1996) sem þessi Wicker Park (örugglega rusl) er gerð eftir. Þessi er fín framan af en endirinn er dálítið upp úr þurru, en kannski alltílagi. Góð afþreying, eins og sagt er.

The Bourne Supremecy --> bíó XXX
Fín spennumynd já já.

Gothika --> videó XX
Draugaþvæla og rugl. Sæmileg spennumynd með hefðbundnum bregðuatriðum.

C'era una volta il West --> dvd XXXX
Eða Once upon a Time in the West. Frábær spaghettívestri og algerlega augljóst hvaðan Quentin stelur mestu. Gargandi snilld!

Capturing the Friedmans --> bíó XXXX
Óþægileg mynd, en stórgóð. Sannleikurinn er blaut tuska framan í áhorfendur. Nema þeir finna ekki tuskuna undir borði efans. Eða...

Coffee & Cigarette --> bíó XXX
Stuttmyndir um lið að rövla reykjandi yfir kaffibolla. Sumar myndirnar eru fínar, ein er frábær (Molina og Coogan - enda Coogan algjör snillingur), en margt er líka frekar langdregið, leiðinlegt og artí fartí.

Touching the Void --> videó XXXX
Stórkostleg fjallgöngumynd sem heldur athyglinni 100% og fær rasshárin til að rísa. Æðisleg mynd!

School of Rock --> videó XXX
Það má oftast hafa gaman af látunum í Jack Black jafnvel þó það sé barnamynd. Þetta er með því skárra í þeim bransa enda um rokk.

Fahrenheit 9/11 -- bíó XXXX
MM sýnir það sem allt eðlilegt fólk á að vita: GWB er fífl, félagar hans sturlaðir græðgispungar, stríð er viðbjóður og ekkert annað en fátæklingar að drepa aðra fátæklinga svo hinir ríku verði ríkari. Ríkisstjórn Íslands mun brenna í helvíti fyrir stuðning sinn við Íraksstríðið (nema það er ekkert helvíti svo ekkert verður af því, en einhvern tímann kemur þetta illilega í bakið á þeim eins og Kárahnjúkar) og ef smjörstykkið Kerry tekur þetta ekki í nóvember mun ástandið ekkert nema versna. Jæks. Sprenghlægileg hryllingsmynd og ekki jafn mikið tilfinningaklám og ég bjóst við. Einungis sálarlaus fífl munu hafa lyst á að styðja Bushdraslið eftir þessa mynd.

Runaway Jury --> videó XX
Gene Hackman er vondi spillti kallinn. Eftir réttardama með jor onor, sustained og fleiri gamalkunnum frösum fær Gene Hackman makleg málagjöld. Til hvers er maður að leigja svona myndir? Ég skil það ekki!

Along Came Polly --> videó XXX
Í Hollívúdd virðast bara vera til nokkur handrit sem eru notuð aftur og aftur eftir því hvernig mynd er verið að gera. Hér er "rómantíska gamanmyndar" handritið notað enn og aftur og því fylgt í æsar. Ekkert í söguþræði kemur á óvart en hér eru snillingar eins og Ben Stiller. Hank Azaria og PSHoffman, svo þetta verður eins gott og það verður. "Fín afþreying" eins og sagt er.

Goodbye Lenin --> bíó XX
Hruni kommúnismans er haldið leyndu fyrir kerlingu sem liggur í kóma meðan múrinn fellur. Nostalgísk gamanmynd og þokkaleg sem slík. Vekur upp spurningar um komm/kapí og þá staðreynd að undir oki komm virtust allir vera gáfaðri en vitleysingarnir í kapí. Eftir að múrinn hrundi hafa svo gömlu vitru komm breyst í nýríka vitleysinga eða krimma. En hún er svo sem rétt spurningin sem kapítalistar héldu uppi í kalda stríðinu, sú hversvegna enginn flýði til kommúnistaríkjanna meðan liðið streymdi þaðan. Það bannar manni enginn að lifa sem í kommúnistaríki væri og þar liggur líklega hundurinn grafinn í þessu dóti. Samt alltaf fyndin þessi kaldastríðsár eftir á og kommúnisminn þrælfyndið fyrirbæri þannig séð. Því er gerð nokkuð góð skil í þessari mynd, sem var meira hugljúf en öskrandi skemmtileg, en maður hafði á tilfinningunni að hægt hefði verið að gera betur. Salurinn var fullur af gömlum kommum í nostalgíu og það var einna fyndnast.

The Cooler --> videó XX
Þokkaleg Las Vegas-mynd. Alls ekkert spes.

Dreamcatcher --> videó XX
Byrjar ágætlega (sambland af Evil Dead og Stand by me ) en leiðist út í tóma geimþvælu. Horfði þó alveg á hana alla.

Lost in translation --> videó XXX
Fólk vafrar um í stílhreinu tilgangsleysi í Tokíó. Það er betra að látast sér leiðast með einhverjum öðrum virðist vera pointið með myndinni.

Spiderman 2 --> bíó XXX
Lói tuskast á milli blokka, mænir á Kristínu Dönst og lúskrar á Dr. Októpöss. Oft gaman, stundum teygjulopi.

Eternal sunshine of the spotless mind --> bíó XXXX
Ægilega frumlegt og nokkuð skemmtilegt en ekkert svakalega eftirminnileg. Meira stílæfing en heilsteypt snilld.

In America --> videó XXX
Allt er í steik hjá írskri fjölskyldu í ameríku... en vonin lifir. Vel leikin melódrama. Ég felldi tár.

Schlock! The secret history of American movies --> dvd XXX
Ágætis heimildarmynd um B- 50s geimhrylling og B- 60s klám og ofbeldismyndir.

Thirteen --> videó XX
Þrettán ára stelpa sukkar voða mikið þegar hún kemst í vondan félagsskap. Þokkalegt svo sem.

Monster --> videó XXX
Velleikin feel-bad mynd um lánlausa hóru. Skilur ekki mikið eftir sig, en var allavega ekki leiðinleg.

Stuck on You --> dvd X
Ég er farinn að hafa áhyggjur af Farrellybræðrum. Vissulega hefur grínið verið heimskulegt en það hefur flestum verið fyndið. Hér er síamstvíburagríninu blóðrúnkað og vandamálið bara að þetta er alls ekki gegnheil fyndin mynd þótt annars slagið megi brosa. Það er ekki nóg þegar um grínmyndir er að ræða og maður á að venjast því betra úr þessari átt. Gef þó Farrelly séns enn um sinn.

Dirty Pretty Things --> videó XX
Þokkalegur líffæraþriller með ólöglegum innflytjendavínkli.

Duplex --> videó XXX
Frekar fyndin meinstrím mynd og vel 90 mínútnanna virði. Ben Stiller er traustsins verður.

Flirting with disaster --> videó XXXX
Helv kúl mynd og frumleg, enda eftir sama gaur og gerði Three Kings. Fyndin og fersk og ekki verra að hún er aukamynd á flestum leigum. Möst sí.

Elephant --> videó X
Mynd sem margir sögðu geðveika en mér fannst slöpp. Áhrifin engin. Helmingurinn af myndinni sýnir krakka ganga á skólagöngum og úti fyrir, sem mörgum asna hefur eflaust fundist mjög töff. Vonbrigði.

Kill Bill 2 --> bíó XXX
Betri en fyrri myndin. Mjög góð fyrir hlé, frekar langdregin eftir hlé. Gólandi Ennio Morricone stuð og Tarantino hressleikinn enn við líði.

All or Nothing --> videó XXXX
Dapurt lágstéttarfólk finnur sig í blokk dauðans. Mike Leigh í góðum gír. Leiðinleg á yfirborðinu en ljómandi góð og krúttleg mynd engu að síður.

Selkirk's Island e. Diana Souhami --> bók XXX
Frekar þurrkuntulegar lýsingar af atburðunum í kringum tæplæga 5 ára dvöl Selkirks á Juan Fernandez eyju, sem síðar varð fyrirmyndin að Robinson Crusoe. Selkirk þessi gat juðast á geitunum en Robinson fékk Frjádag. Finnst nú að þessi bók hefði getað verið betri.

50 first Dates --> bíó XX
Þokkaleg rómantísk gamanmynd. Þokkalega fyndin. Rostungar og mörgæs, steríótýpur og Rob Snæder er ókei. A.Sandler er eins og í öllum öðrum myndum og Drjú voða sæt. Það sem hækkar myndina um einn heilan er auðvitað staðsetningin, HAWAII!, en allt sem gerist á HAWAII!! fær átómatískt einn í plús hjá mér
.
Le Pacte Du Silence --> dvd X
Spennumynd með manninum með tittling í staðinn fyrir nef, Gerard Departíö, og dularfulla tvíbura. Hefur alla burði til að vera góð, framan af, en alltof margir lausir endar og frústrerandi endaslepptur endir gera þetta þó að tímaeyðslu þegar upp er staðið. Hollywood rímeikið verður kannski betra.

Run Ronnie Run --> videó X
Þunnt og ófyndið. Skítasæmilegt engu að síður og hátíð miðað við verstu mynd sem ég hef séð, Joe Dirt, em fjallar um sama efni: heimskt hyski.

Fear X --> videó XXX
Þónokkuð spennandi en gífurlega hhhhhhææææææggggggg mynd eftir Danann sem gerði Bleeder og Pusher. Nú er hann kominn til Hollywood, eða Wisconsin öllu heldur og fær John Turtutto til að leika öryggisvörð í molli sem rannsakar morð á konunni sinni. Leikurinn berst til Montana. Þónokkur David Lynch í stíl Danans og alveg ágætis mynd.

Intolerable Cruelty --> videó X
Langlélegasta mynd Coen bræðra. Pointless vitleysa en örfáir ljósir punktar.

American Splendor --> bíó XXX
Þegar ég var sem mest í teiknimyndablöðunum fannst mér aldrei mikið til Harvey Pekar koma. Óáhugaverður kall sem lifir óáhugaverðu lífi og hugsar óáhugaverðar hugsanir. Það er mesta furða hvað er hægt að gera þessa mynd áhugaverða mikað við, en ég kom ekki auga á það rosalega meistaraverk sem margir vilja meina að þetta sé.

Owning Mawhony --> videó X
Philipp Hoffman, sá snillingur, leikur yfirmáta óáhugaverðan bankamann sem finnst gaman í fjárhættuspilum og situr þar hreifingalaus og hengir haus. Philipp hengir haus út þessa mynd og er algjör lurkur. Sumum finnst þessi mynd kannski "ljóðræn", mér fannst hún aðallega hundleiðinleg.

Matchstick Men --> videó X
Tilgangslítið rusl framan af en skánar aðeins í lokin.

A Mighty Wind --> videó XXXX
Mynd frá liðinu sem færði okkur Spinal Tap, Waiting for Guffman og Best in Show, allt schnilldarverk. Þessi mynd tekur fyrir þjóðlaga-geirann með sömu tökum og fyrri verk, þeas svona feik document. Uppskriftin er gamalkunn og kannski ekki jafn fersk og hún var fyrst, en þetta er helv. vel gert og helv. fyndið. Gaman aððííí...

Doctor Sleep --> videó XXX
BBC-leg mynd um glámskyggnan doktor og fjöldamorðingja. Mikil dulúð og spenna framan af en endirinn ófullnægjandi eins og alltaf í svona myndum. Engu að síður fín spennu og hryllingsmynd.

25th Hour --> dvd XXX
Edward Norton væflast eitthvað áður en hann fer í fangelsi. Alveg þolanlegt.

The Banger Sister --> videó XX
Þessi virtist vera skítsæmileg en ég sofnaði reyndar í miðri mynd

Sin --> videó X
Skítþokkaleg mynd um negra sem hefnir sín á Gary Oldman (óver ðe hill).

Looking for Alibaldri --> videó X
Áströlsk unglingamynd sem heldur engum dampi heldur missir maður áhugann fljótt. Ekkert illa gerð en ekki áhugaverð.

Bruce Almighty --> videó XX
Jim Carrey er guð en það er auðvitað ekki eins auðvelt og hann heldur. Fyrirsjáanlegt drasl, en nokkur fyndin atriði. Jim geiflar sig og glennir að vanda og er traustur í sínu.

21 grams --> bíó XXXX
Ég sofnaði yfir Ameros Perros (ekki að hún hafi verið léleg, ég var bara syfjaður), en þessi er eftir sama leikstjóra. Fyrrum aumingi en nú trúarfrík (Del Torro) klessir á og drepur mann og 2 dætur fyrrverandi eiturlyfjafíkils (Watts) og fær Sean Penn hjartað úr dauða karlinum. Upphefst nú mikið drama uppfullt af siðferði- trúar- og heimspekilegum pælingum sem endar á 21 grammi, sem ég upplýsi ekki betur um. Kannski ekki "skemmtilegasta" mynd í heimi, en voða kúl og allsekki leiðinleg, enda alltaf gaman að fá frí frá klysjum. Leikstjórinn heitir Alejandro González Iñárritu og hlýtur að slá almennilega í gegn með næstu mynd.

Stormur e. Einar Kárason --> bók XXX
Kárason hefur löngum verið hrifinn af ræflum en flestir eru þeir áhugaverðari en Stormur greyið, sem er óþolandi aumingi. Hann ræflast með fjölskyldu sinni frá Íslandi til Danmerkur, þaðan til Minnesota, þaðan til Danmerkur og þaðan til Íslands – og alltaf með allt á hornum sér kennandi öðrum um allt sem honum mætir. Maður kannast við svona lið og forðast að þekkja það. Þess vegna var bókin kannski ekkert æðisleg og þar á ofan eru engir stórmerkilegir atburðir sem ræfillinn lendir í, en Einarinn er traustur sögumaður og alltaf hress.

The Lord of the Rings - The return of the King --> bíó XXX
Hobbit-erótísk tilfinningavella og tölvugerðar bardagasenur – allt yfirkeyrt í væmnissósu og glæsileika. Aumingja fólkið sem nennir að sökkva sér í þessa þvælu. Sjálfur skil ég ekki upp né niður í þessu, nema þessa plein baráttu góðs og ills og hommatilvitnanirnar. Það má hafa gaman af þessu þótt þetta sé kannski alltof langt enda var maður með hálsrýg og nálardofa og suð fyrir eyrunum, og ég tala nú ekki um rasssæri. Þegar vonda píkan hefur verið gjörsigruð takast ástir með Pípinn og Káti, eini streit hobbitinn Sómi nær sér í kellingu, en Fróði þarf að leita út fyrir heimahéruð eftir sínum "hring".

Hér eru menningarafurðirnar 2003