11.06.09

Eva Joly er eins og sambland af Chuck Norris og Vigdísi. Hún er okkar eina von til að koma vondu körlunum bak við lás og slá. Við erum öll ömmur okkar og afar og munum humma fram af okkur hrunið. Afhverju ætti að gera það upp, verður byrjað að segja eftir ár. Við tókum öll þátt í þessu og nú er gengið búið að styrkjast og bjart framundan. Ha, eigum við ekki bara að gleyma þessu? Svona verður þetta nema það verði gengið í verkið og peningum dælt í Evu. Gott hjá henni að hella niður baununum. Og talandi um Vigdísi. Væri ekki ráð að fá hana aftur í embætti? Hún er á launum hvort sem er. Skiptin þyrftu ekkert að fara hátt. Myndu bara gerast eina nóttina. Daginn eftir væri Vigdís orðinn forseti aftur eins og hún hefði aldrei hætt og gæti strax byrjað að gróðursetja. Enginn myndi nokkurn tímann aftur minnast á hinn. Hinn hvern? Lifi Vigdís forseti! Það segir sig sjálft að á svona bömmertímum eins og núna hefur þörfin fyrir „sameingingartákn þjóðarinnar“ aldrei verið meiri. Mér er alveg sama hvað hver segir: Vigdís er minn forseti.
---
Dóttir Gunnars Birgissonar, dóttir Gunnars Birgissonar... þetta hljómar endalaust en aldrei sér maður mynd af konunni og það er ekki einu sinni sagt hvað hún heitir. Maður sér bara fyrir sér einhverja smástelpu með tíkarspena. Heitir þessi kona ekki neitt? Eða er nafn hennar of hræðilegt til að það megi segja það í fjölmiðlum? Nei nei, blessuð konan heitir nú bara Brynhildur og er ábyggilega frábær eins og pabbi sinn. Ég fann hana þegar ég gúgglaði Frjálsri miðlun. Fann reyndar enga heimasíðu fyrir það fyrirtæki enda þarf maður enga heimasíðu þegar maður fær endalaust djobb hvort sem er. Ég fann hana á enn einni spillingarsíðunni, Litla Ísland. Þar eru endalausir köngulóarvefir um tengsl viðskiptalífsins. Ég veit ekki hvað maður græðir á þessum köngulóarvefjum nema að fallast hendur. Og ekki veit ég hvað ég græði á því að vita að konan heitir Brynhildur. En allavega... 
---
Sá "Ólaf í Samskip" og konuna hans keyra flóttalega frá verslunarmiðstöð í Mosfellsbæ um daginn. Eða ég dró þá ályktun að þau væru flóttaleg. Ég væri allavega flóttalegur ef ég væri einn af þessum 30-50 eða hvað þetta er. Hin frábæru menningarhjón sem hafa hent klinki í fjölmarga listaræfla voru náttúrlega á gulljeppa og kannski ekkert flóttaleg, heldur kannski bara skellihlæjandi af öllum fíflunum og étandi upp úr gullflögusnakkpoka.
---
Með peninga á heilanum er Bakþankinn í dag.

10.06.09 - Hermt eftir stjörnuljósi

Hermigervill - Starlight
Hermigervill er að senda frá sér plötuna Hermigervill leikur vinsæl íslenzk lög. Þetta er góð stuðplata svo ekki sé meira sagt. Hér er fréttatilkynningin beint af kúnni: 16. júní gefur Sveinbjörn Thorarensen út sína þriðju breiðskífu undir listamannsnafninu Hermigervill, Hermigervill leikur vinsæl íslenzk lög. Hermigervill leitar víða fanga í sinni tónlist. Fyrsta platan hans, Lausnin, var hip-hop skotið sampl-mósaík í anda DJ Shadow og Avalanches. Á næstu plötu, Sleepwork, var vínylsnarkið enn áberandi og hljóðsmalanum beitt óspart, en ýmis popp-element læddust með, gítar hér, söngkonur þar. Síðan þá hefur Sveinbjörn sífellt bætt við sig andlitum og gert léttpopp, diskófönk, naumhyggjutekknó, sveim, hiphop, undirspil fyrir nútímadans og gjörninga, auglýsingastef og endurhljóðblandað lög fjölda listamanna (Gusgus, Quarashi, Walter Meego, Reykjavík!, Sometime o.s.frv.). Samhliða þessu hefur hann stundað hljóðupptökunám í Hollandi og sankað að sér aragrúa úreltra raf-hljóðfæra. Raftónlistarsagan er Hermigervli nefnilega hugleikin og það endurspeglast í þessari þriðju breiðskífu.
Nýja platan inniheldur einungis instrúmental ábreiður af þekktum íslenskum dægurlögum, sem færðar hafa verið í undarlegan, ef ekki hálf vitskertan hljóðgervlabúning þar sem hið kjánalega og fagra eiga óvænta samleið. Fyrst þegar farið var að framleiða hljóðgervla fyrir almenning, á sjötta og sjöunda áratugnum, varð vinsælt sport að taka upp þekkt lög og klassíska tónlist í rafvæddum útgáfum. Má þar nefna listamenn eins og Wendy Carlos og Jean-Jaques Perrey og fjölda minni spámanna. Þessi tónlist hefur nú á dögum ómótstæðilegt aðdráttarafl liðinnar framtíðar: í senn hallærisleg og hugvitsamleg, einstök í hljómi en kunnugleg í tónum, einlæg í yfirborðskennd sinni – ein alsherjar yndisleg mótsögn.
Plata Hermigervils er að miklu leyti eftir þessari retro-forskrift, en þó ekki í þeim skilningi að apað sé eftir öllu í köldu og kalkúleruðu háði – þó hljómurinn standi í þakkarskuld við tilraunamennsku sjöunda áratugarins greinir margt á milli. Einfeldingurinn hann Hermigervill hefur miklu frekar tileinkað sér sjálft hugarfar gömlu rafgúrúanna: Hann hefur einlægan, barnslegan áhuga á tækninni og tólunum og ber jafnframt einlæga ást til dægurperlanna sem hann leikur. Hann langaði að klæða þessi lög í sinn brenglaða búning einfaldlega því þannig mátti sameina tvær ástríður.
Sá búningur er, eins og áður segir, í grunninn ofinn úr tærum, hliðrænum hljóðgervlatónum fortíðar, en jafnframt úir og grúir af öllum mögulegum (ó)hljóðum: Hermigervill leikur á fiðlu, bassa, þeremín, gítar, trommur og tilfallandi hluti, skankar skífum og klippir og brenglar fundin hljóð, eigin rödd og annarra verk til að fylla upp í hljóðmyndina, svo gamlir aðdáendur munu kannast við sinn mann. Á endanum snýst þó allt um sígildar, þjóðþekktar laglínur, sem ráða algerlega för.
Eftirfarandi lög eru á plötunni:
Dans dans dans
Glugginn
Starlight
Í bláum skugga
Vegir liggja til allra átta
Sveitin milli sanda
Hótel Jörð
Garden party
Þorparinn
Leyndarmál 
---
Gestaslíffeis #1:

Óskar Pétur sendi: Ceres 4 verður ekki ánægður með þessa bumbu.

09.06.09
Að gera svona:

er stuð. Hér er síða sem heitir Sleeveface og hér er önnur: Waxidermy. Ég er búinn að gera tvö í viðbót:

og svo auðvitað:

Ég mun birta álíka myndir frá lesendum, ef einhver er í stuði - en bara með íslenskum umslögum!!!

08.06.09
Ég reyni að láta peninga ekki skipta máli í lífi mínu. Það er bara svo helvíti erfitt. Til dæmis verð ég alltaf ægilega bjartsýnn eftir að hafa dreymt skít. Held að núna detti ég í lukkupottinn, fjárfesti jafnvel í lottómiða. Ég kúkaði á mig í spinningtíma og þurfti fram á klósett að verka mig. Þar fór allt í handaskol og fyrr en varði voru komnar klessur á headfónin mín. Þegar betur var að gáð var þarna allt vaðandi  í gömlum skorpnum mannaskít. Skít úr einhverjum öðrum. Mér var svo mikið um að ég vaknaði. Þá fannast mér náttúrlega að þetta hlyti að vera einhvers konar tákndraumur fyrir Icesave skuldirnar. Ég kúkaði smá á mig en aðallega var ég að hreinsa upp gamlan skorpinn skít eftir aðra. Draumurinn er samt náttúrlega bara remix af raunveruleikanum því Dagbjartur kúkaði í sig í sundi í gær af því að fara alltof oft í kollhnís ofan í vatninu. Við fórum í sund báða dagana. Á laugardaginn voru Bjössi og Danni úr Ný dönsk ofan í en Björk í gær. Mikil popplaug, Seltjarnarness. Lufsunni og Dagbjarti finnst hún besta laugin. Ég er ekki frá því heldur.
---
Í nágrenni Rvk er ýmislegt að finna. Við gerðumst bæði veiðiþjófar og sumarbústaðar-skvattarar. Ég veiddi oft í Selvatni sem polli á lóð nágranna og fór og tékkaði á vatninu aftur í gær. Það er miklu minna en það var. Hentum nokkrum sinnum út með Disneystöng Dagbjarts og náðum að slíta spún af í stórgrýtinu. Ég er allur að hitna fyrir veiðidellu. Kannski maður kaupi sér stöng í Europris. Svo sumarbústaðar-skvöttuðum við hjá bústað Guðmundar frá Miðdal. Bústaðurinn ber þess merki að hafa verið í eigu listamannsins en þarna er hrörlegt og greinilegt er að bústaðurinn er ekki oft heimsóttur. Skvöttunum var vitanlega ekki svo römm að við brytumst inn, heldur létum við okkur bara hafaða að borða pikknikk á lóðinni. Ef maður á ekki bústað sjálfur verður maður bara að redda sér. Nóg er nú af tómum bústöðum út um allt. Auðvitað tekur maður allt drasl með sér og gengur frábærlega vel um. Þetta er vin vin sitjúeisjón.
---
Það var þann 12. júní 1999 sem Sigur Rós hélt útgáfutónleika fyrir Ágætis byrjun í íslensku óperunni. Ég var reyndar ekki þar. Á föstudaginn verða sem sé 10 ár síðan þessi frábæra plata kom út, platan sem burstaði kosninguna um bestu plötu aldarinnar þegar Eru ekki allir í stuði? kom út og ég spái því að platan endurtaki leikinn þegar úrslit verða gerð kunn í nýjustu kosningunni þann 17. júní. Tilviljun ein ræður því að á afmælisdaginn þann 12. júní 2009 keppir Sigur Rós á móti Áhöfninni á Halastjörnunni (Hemma Gunn, Gylfa Ægissyni og Ara Jónssyni) í Popppunkti (leikur nr.2). Ég staðhæfi að þessi leikur sé skrítnasti þáttur PP frá upphafi og er auðvitað algjört möst sí. 
---
Fyrir tíu árum var mikið bözz í gangi áður en Ágætis byrjun kom út. Ég hélt því fullum fetum fram við hvern sem er að þetta væri Lifun okkar kynslóðar. Ég hafði þó ekki heyrt eitt einasta lag af plötunni. Mér hafði fundist Von hundleiðinleg en ég sá bandið taka 1 eða 2 lög á Hótel Sögu á einhverju ísl tónlistarverðlaunadæmi 1998 og dró þessa háfleygu ályktun af því. Ég var að vinna á Fókus, fylgiblaði DV, á þessum tíma og tók viðtal við bandið. Stíllinn á blaðinu var fjörugur og gulur og svona pungsveittur nokkuð, enda þannig stemmning í loftinu. Tvíhöfði var á morgnanna og líklega Simmi og Þossi seinna um daginn. Ég tók hið unga óreynda band nokkuð frjálslegum tökum, spurði strákana út í hassreykingar (kjaftasögur um það loddi við þá fyrstu árin) og sagði að þeir væru Þursaflokkur X-kynslóðarinnar. Við röbbuðum saman á Mokka en svo var tölt oní Núll til að mynda þá í speglinum. Strákarnir urðu ábyggilega brjálaðir þegar þeir lásu viðtalið í blaðinu, allavega var Jónsi nokkuð fúll í síma þegar ég talaði við hann næst. Þeir hljóma líka miklu pungsveittari í þessu viðtali en síðar meir, hafa kannski ekki verið búnir að stilla saman strengi hvernig eigi að koma fram í viðtölum á þessum tíma. Hér er þetta vafasama viðtal (þökk sé Tímarit , en þar má nú gramsa í fortíðinni eins og óður maður). 

Sigur Rós - Flugufrelsarinn læf 1998
Meira Sigur Rós til að halda upp á 10 ára afmæli ÁB. Hér er smá læf með þeim af promo diski sem ég átti (en seldi á uppboði, en hafði þó vit á að kópera fyrst). Upptakan er af Gauknum einhvern tímann árið 1998 held ég. Þess ber að geta að þegar ÁB kom út var enginn að gera svona tónlist svo þetta var algjört fenómen. Topp stöff, sem stenst allar hugsanlegar tímatennur. 

07.06.09
Íslenska fótboltalandsliðið karla náði mögnuðum árangri gegn Hollendingum í gær, varð í öðru sæti og fékk silfrið, sem eins og allir vita er gulli betra. Ekki nóg með það, Ísland vann seinni hálfleik með glæsibrag. Áfram Ísland!
---
Það var allt vaðandi í lífi í bænum í gær og verður líklega enn meira líf í dag. Hrikalegur hávaði þegar skipin við höfnina fóru að flauta. Fjölskyldan þurfti að leggja á flótta undan þessu. Svo fundum við hvergi þessa fiska. Annars skil ég ekkert í því afhverju Laugavegi og Austurstræti er ekki lokað fyrir bílaumferð á góðvirðisdögum um helgar. Það er setið á borðum út um allt og mengandi og hættulegir rúntbílar skríða hjá öllum til ama. Það er nú varla svo mikil lífskjaraskerðing þótt fólk geti ekki rúntað af og til. Ætti frekar að drullast úr bílunum og spóka sig um í sólinni. Rúntinum verður algerlega ofaukið þegar sólin skín. Sáum nokkra staði sem þarf að eta á við fyrsta tækifæri. Nepalska pleisið á Laugarvegi. Nýr búlgarskur staður á Vitastíg gengt Geisladiskabúð Valda (sýndist hann vera hræbillegur) og svo eigum við enn eftir að tékka á Indian Mango. Við hliðina á sjoppunni Texas á Ingólfstorgi er svo kominn enn einn shwarma staðurinn sem heitir Ali Baba. Leit nokkuð vel út. Fengum okkur bara hummus í boxi og kringlótt flatbrauð með á 500 kall.

06.06.09
Ég neita að taka á mig hvíðahnút vegna Icesave skulda Landsbankans. Icesave getur hoppað upp í rassgatið á sér. En ég bara skil ekki hvernig einkafyrirtæki gat fengið að veðsetja heila þjóð fyrir einhverju Nígeríusvindli í útlöndum. Hver skrifaði upp á það plagg fyrir mína og allra hinna hönd? Ég spurði einu sinni Kristján Þór Júlíusson að þessu þegar ég var með honum í Silfri Egils. Hann bara muldraði eitthvað um að þetta væri EES-eitthvað, bla bla. En þetta var helvíti gott skím þegar á því stóð: Tær snilld hvernig monnípeningaglásin hrúgast inn og allt það. Já, og ég skil heldur ekki hvað varð um alla þessa peninga. Vá, hvað ég skil lítið. Hvítbókin segir mér hins vegar hvar Icesave-kallarnir eru núna. Er þessi Hvítbók hann Sullenberger sem er svona duglegur á netinu? Þá er náttúrlega engin furða að þessi ódýra búð hans láti ekki sjá sig.
---
Gussi spyr í gestabók um boðaða endurútgáfu á Eru ekki allir í stuði? Já, það lítur út fyrir að bókin komi út á næsta ári (nálægt jólum 2010) í endurhannaðri og endurmetinni útgáfu og svo auðvitað með viðbótum, þeim 10 árum sem hafa bæst við síðan hún kom út fyrst. Það er svo sem ekkert fast í hendi með þetta, en útgefandinn er til í tuskið og ég líka.
---

Siggi - Beirút
Ég keypti plötuna Veruleiki? með Sigga (Sigurði Karlssyni, trommara) af manni í Bökkunum í fyrragær. Pálmi Gunnarsson leggur Sigga lið og syngur lagið Beirút. Óhætt er að segja að með texta sínum leggi Kristján Hreinsson (sem kallaði sig Kristján Hreinsmögur á þessum tíma) þriggja tonna guilt-trip á hlustandann. „Reyndu að þefa af rotnandi hræum þá geturðu ef til vill skilið,“ syngur Pálmi eins og hann meini það (sem hann gerir eflaust) - djísús! Platan kom út 1982 og er fimm laga (þar af er þetta lag aftur ósungið). Þetta lag var eitthvað spilað man ég, þrátt fyrir nöturlegan textann. Siggi hafði verið aðaltrommari klakans um langa hríð, spilað með Svanfríði, Change, Brunaliðinu og inn á fjölmargar plötur á 8. áratugnum. Svo kom þessi plata. Nokkrum árum síðar hvarf Siggi bara úr bransanum og sást næst sem Votta Jóhóvi og vakti nokkra athygli sem fyrsti opinberi gluggaþvottamaður landsins. Þess má geta að umslagið er rokna næs, en ekki er getið hver gerði það.
---

Með nöktum - Holes
Í sömu ferð keypti ég nokkrar aðrar plötur, þ.á.m. eina aðra 12" EP, Skemmtun með hljómsveitinni Með nöktum frá 1985. Þetta var skammlíft band sem fyrrum söngvari Þeysara Magnús Guðmundsson stofnaði eftir Þeyr með strákum úr Spilafíflum og Haugnum, minnir mig. Músikin var ekki langt frá Þeysurum, síðfrakka testósterónrokk með Killing Joke/Bauhaus ívafi, eins og þótti kúl á þessum tíma. Magnús var innvinklaður í hljóðverið Stúdíó Mjöt – (S.H.Draumur tók upp fyrstu plötuna sína þar og Tryggvi Herbertsson og Bubbi gerðu þar Konu, að minnsta kosti tvisvar því fyrri útgáfan týndist (eða eitthvað, man ekki alveg) – svo það voru hæg heimatökin að henda í eina plötu. Bandið hætti skömmu eftir útkomuna, eða var hætt þegar platan barst loks til landsins. Síðan hefur hinn ofursvali Magnús lítið komið nálægt rokki, að ég held. Ég talaði við hann í síma einhvern tímann út af einhverju blaðamennskutengdu og þá sagði hann: Ha, erða gamli melurinn? þegar ég kynnti mig. Mér fannst það nokkuð skrýtið, en kúl.

05.06.09 - PPPP !
Ég er eitthvað truflaður. Les allt vitlaust. Ég hélt að aðsend grein í Mbl í dag væri "Ég er sundlaug" en þá erða bara "Ég er syndug" og er eftir Ágústu úr Kópavoginum. Svo sá ég fyrirsögn á Vísi áðan sem ég hélt að væri "Lúxus að fá lost", en þá erða bara "Lúxus að fá ost". Ég þjáist af mislestri. En það er svo sem ok eins lengi og allt verður fyndnara.
---

Í kvöld kl. 20:10 hefst fimmta sería Popppunkts í Sjónvarpi - og nú á RÚV!!! Biggtæm. Við erum að tala um að fyrsti leikur er æsandi slagur Eurobandsins og Reykjavíkur! Ekki missa af einni mínútu!!! Hér má svo sjá upplistun á framhaldinu.
---
Þarna á myndinni af hinni glæsilegu nýju PP-sviðsmynd sést glitta í Fender Telecaster sem er nýr en látinn líta út eins og gamall og ku nákvæm eftirlíking af gítar Joe Strummers. Ég vissi nú ekki að úrkynjunin í hljóðfærabransanum væri orðin svo mikil að það er byrjað að framleiða í massavís hljóðfæri sem líta út einsog þau séu gömul (eins og hverjar aðrar forrifnar gallabuxur). Þeir hjá Fender kalla þetta "Road worn". Stundum er líkt í einu og öllu eftir hljóðfærum frægra poppara. Í Hljóðfærahúsinu (sem skaffar dótið í skápana) fæst t.d. alveg eins gítar og Jeff Beck notar (kostar ekki nema 999.899 kjall!) og gítar eins og Andy Summers í Police notar á ekki nema 1.250.005 kjall. Sæll! Ekki er maður nú ennþá orðinn svo latur að maður geti ekki rispað og laskað sín eigin hljóðfæri. Sem sagt, maður þarf ekki starfsmenn Fender verksmiðjanna til að sarga í hljóðfærin sín (stundum eftir fyrirmynd). Ef maður væri geðsjúkur aðdáandi Andy eða Jeff færi maður kannski allur á ið...
---
Besta plata Íslandssögunnar (skv. þessu) verður kynnt 17. júní. Ég spái að það verði Ágætis byrjun með Sigur Rós líkt og þegar ég stóð fyrir álíka vali rétt eftir aldarmótin. Það er svo sem ekkert við svona vali að segja, þetta verður alltaf persónulegt. Auðvitað sárvantar fullt á þennan lista og ég hefði ekki valið fullt af dóti þarna inn. En fokk það. Hér er minn topp 20 listi yfir bestu plötur Íslandssögunnar og hann er auðvitað jafn persónulegur og allir hinir. Ég sýni náttúrlega það lítillæti að sleppa mínum eigin plötum. Svo nennti ég ekki að leggja hausinn í bleyti við að lista þetta upp frá 1-20, enda ekkert víst að ég gæti það. 

Emilíana Torrini – Fisherman’s woman
Fan Houtens kókó – Musique Elementaire (kassetta)
Fræbbblarnir – Viltu nammi væna
Ham – Lengi lifi
Hljómar – Hljómar II
Megas – Fram og aftur blindgötuna
Megas – Millilending
Megas & Spilverkið – Á bleikum náttkjólum
Óðmenn – Óðmenn
Olga Guðrún Árnadóttir – Eniga Meniga
Purrkur Pillnikk – Ekki enn
Sigur Rós – Ágætis byrjun
Spilverkið – Ísland
Spilverkið – Sturla
Stuðmenn – Sumar á Sýrlandi
Sykurmolarnir – Life’s too good
Þeyr – Mjötviður mær
Trúbrot – Lifun
Trúbrot – Trúbrot
Utangarðsmenn – Geislavirkir
---

Alex Chilton - Dalai Lama
Mér hefði örugglega ekkert leiðst á Dalai Lama. Hann var voða hress og svona þegar maður sá eitthvað með honum í sjónvarpinu og með beisik hluti á tæru, hluti sem alltaf er ágætt að rifja upp. Ég nennti þó auðvitað ekkert að eltast við gamla kufl. Í staðinn hlustaði ég nokkrum sinnum á lagið Dalai Lama með Alex Chilton af sólóplötu hans High Priest frá 1987. Alex er gamall í hettu poppsins, söng The Letter með Box Tops þegar hann var 16 ára eða eitthvað, en gerði svo 3 plötur (þar af tvær fyrstu algjör meistaraverk) með páverpoppbandinu Big Star. Síðan hefur hann verið legend og fyllibytta eins og gengur. 

04.06.09
Glansmynd úr góðærinu #2:

Æðislega frábærir milljarðamæringar (eþs gráðugu bjánarnir sem komu þjóðinni á hausinn) og virðulegur forseti vor (eþs forsetafíflið sem ætti að sjá sóma sinn í að segja af sér svo maður geti valið nýjan forseta. Einhvern sem hægt er að kenna börnunum sínum að bera virðingu fyrir (þ.e. „sameiningartákn þjóðarinnar“). Nei, ekki Bjarna Ármannsson!) hitta Conan O'Brien (eþs forsætisráðherra Finnlands). Myndin er tekin af Hvítbók.vg (sem er vaxandi síða um góðærið og hina seku. Ég hef ekki hugmynd um hver ber ábyrgð á Hvítbókinni, en það hlýtur að vera einhver meistari fyrst hann/hún hefur húmor til að vista hana á .vg (Bresku Jómfrúareyjunum)).
---
Skjár einn var með Conan á dagskránni einu sinni. Svo hættu þeir því. Ég bjó til netáskorun sem allavega 1000 manns skrifuðu undir. Ekki kom samt Conan. Samkvæmt þessu er óvíst hvort Conan eða Leno komi á S1 í haust. Meirihluti þeirra sem kommentar vilja Leno. Greinilega bjánar. Munurinn á Leno og Conan er eins og munurinn á Kid Rock og... tja, hvaða poppari er fyndinn, sniðugur, klár og beittur, ööö Iggy Pop? Öööö, en allavega. Eflaust má beyta þrýstingi og því tel ég upplagt að Conan-sinnar skrifi Sigríði framkvæmdarstjóra eða Kristjönu dagskrárstjóra og biðja þær um að hafa Conan í haust. Það eru allir komnir með hundleið á þessum Leno bjána. Conan er málið! 
---

Eftirminnileg klósett #3
Þegar hljómsveitin Unun fór að spila 1999 til Riga, í hinu illastadda Lettlandi, vorum við leidd að vatnsturni sem búið var að breyta í stúdíó. Þar var hljómsveitin Sirke, sem spilaði með okkur í túrnum, að taka upp. Þar inni var eitt eftirminnilegasta klósett sem ég hef séð. Minningin um það er skínandi skær. Önnur eins hrörlegheit hafði maður varla séð. Ég tók hins vegar enga mynd af því. Þegar ég hóf skrif Eftirminnilegra klósetta hafði ég samband við Turninn og spurði hvort til væru myndir af klósettinu. Meistarinn sem svaraði mér, Janis Daugavietis, var ekkert að tvínóna við þetta heldur tók mikla myndaseríu af klósettinu og sendi. Þarna hefur ekkert breyst í 10 ár! Klósettið er alveg eins á myndunum og í minningunni. Stórfenglegt! Ég gerði, minnir mig, nr. 1 þarna inni með herkjum, en ekki undir nokkrum kringumstæðum myndi maður leggja í nr. 2. Ferðin var annars almennt mjög eftirminnileg. Eftir giggið, sem var var á hipp og kúl pleisinu Pulkvedim Neviens Neraksta (einhverjir starfsmenn Eimskip voru þarna innan um Lettana, man ég) var ekið í algjöru myrkri og okkur hrúgað í blokkaríbúð. Þegar ég vaknaði barst ilmur af súpu og lettneskri döbbtónlist í vitin. Þessi blanda hafði staðið yfir í einhvern tíma og því hafði lettneska döbbið legið um hríð yfir draumförunum. Síðar þurfti ég auðvitað að vita hvaða músik þetta var og komst þá að því að þetta var:

Latvijas Gaaze - Saule Saule
Eða Gasveita Lettlands. Einmenningsverkefni Andors, aðal rafdúddsins í Lettlandi. Lagið er af plötunni Saule saule spidi spozi. Og því þá ekki að fá annað frá Lettlandi, fyrst þau eru farin á hausinn eins og við:

Sirke - Anglumelnais
Hér er bandið sem spilaði með okkur. Ég hef ekki haldið kontakti við þetta ágæta fólk, en sé að síðast gerðu þau plötu 2002. Svo bandið er greinilega löngu hætt. Hér er lag af plötunni Hellijs Dzudas (1999).
---
Bítlasafnið í Hamburg. Maður þangað. Ég er ekki alveg viss, en líklega er þetta heimasíða safnsins. KJAFTÆÐI: ÞETTA ER HEIMASÍÐAN! Ég gæti notað ferðina í að fara í Tinna safnið í Brussel (BBC segir frá því). Ég hélt reyndar að það væri fyrir löngu búið að opna þetta safn, en BBC segir að það opni í júní. Ha?

02.06.09
Sjónvörp eru full af mannskemmandi drullu. Þetta blasir við þegar ég hlunkast fyrir framan nokkur í röð í WC á svokölluðu stigtæki í ekki svo örvæntingarfullri tilraun til að brenna nokkrar súkkulaðikökur utan af mér. Ég missi trú á mannkynið og fyllist af innvortis skít þegar draslið frussast yfir mig. Sérstaklega er "fréttastöðin" Sky viðbjóður. Heilalaust sorp á rípít allan daginn ekki til annars en að sjúga lífið og mennskuna úr franskbrauðs og beikonétandi Bretum. Einum skilaboðum er þjappað stanslaust í hauskúpur áhorfenda: Vertu hræddur. Heimurinn er hættulegur, passaðu þig, þú verður aldrei frjáls, ekki hugsa, fáðu þér hamborgara. Það var hægt að smjatta stanslaust á hvarfi "Maddie" í heilt ár. Alltaf er einhver dauður, einhver hlaupandi undan réttvísinni og líklega inn í garði hjá þér. Svínaflensa - gasp - æ nei, hún er að koma. Við drepumst öll. Brjálaðir Norður Kóreumenn ætla að drepa þig. Og svo: Susan Boyle er komin á geðveikrahæli. HVERJUM ER EKKI DJÖFULSINS DRULLU SAMA! Viðbjóðsleg landkynning á Bretum þessi helvítis stöð.
---
Ekki erða skárra á "skemmtirásunum". Fávitar með fávitaleg tattú og gítara lemjandi úrkynjaða froðu út um rassgötin á sér, fávitar að reyna að slá í gegn meðal fávita fyrir framan dómarafávita, eða fávitar að hoppa og stökkva í fávitalegri von um að vinna sér inn fávitalegan pening. Fávitaflóð beisiklí. Því varða mjög svo ófávitaleg upplifun að rekast á þátt í gær sem var ekki fávitalegur. Heldur hreinlega frábær þáttur með broddi og viti. Og það á Skjá einum sem er nú ekki beint þekkt fyrir útvörpun gáfulegs efnis. Um er að ræða þáttinn This American Life, sem er byggður á grunni útvarpsþáttar með sama nafni, og er sendur út á Public radio International á Austurströnd USA. Ég er ekki frá því að ég hafi heyrt í þessum þætti 1997 þegar ég fór eftirminnilega ferð um öppsteits NY. Það sem ég heyrði er mér enn minnisstætt. Karlar sem unnu á skrifstofu voru að segja frá því hvernig þeir töluðu um konur á dulmáli. „Ég sá eina á pósthúsinu. Það væri nú ekki amalegt að skella nokkrum frímerkjum á hana, ho ho. O.s.frv.“ En allavega, þátturinn sem ég sá í gær var magnaður. Fjallaði um strák sem var að taka upp heimildarmynd um mömmu sína og stjúpa, útbrunninn skallapoppara úr eitísbandinu Oxo. Ömurlegt lið. Þetta er svona slæs of læf stöff, útvarpslegt í sjónvarpi - Þorsteinn Joðish. Ég er strax orðinn aðdáandi þáttanna og verð að sjá alla tólf sem gerðir hafa verið. Þetta var sá fjórði af fyrstu sex í seríu eitt sem er sýnd á S1, en maður hafði ekki heyrt djakk um þessa þætti áður. Þátturinn er ekki einu sinni auglýstur á heimasíðu S1! Ég mæli eindregið með This American Life!!! S1 eru svo að fara að sýna Bullshit! í allt sumar, þætti sem Biggi Baldurs hefur mært mikið. Stóra spurningin hlýtur svo að vera: Ætlar S1 að byrja að sýna Conan, sem nú hefur tekið yfir slott hökuhelmútsins Lenos?
---

Enginn nennti að hneykslast á rugluðum listamönnum í góðærinu. Kreppan hefur það með sér að nú verður hneykslast yfir öllu sem brýtur í bága við sparnað og aðhald. 10 millur fyrir hina frábæru ljósmynd snillingsins Sigurðar Guðmundssonar er auðvitað alltof mikið, eða ég hefði aldrei eytt nema svona 3000 kalli í áritaða eftirprentun. Sem gerir alveg sama gagn. Til hvers að eiga frummyndina? Frummyndadýrkun er úrelt. Þetta er jafn flott mynd, hvort heldur eftirprentun eða "fyrsta myndin". Mér hefur fundist þessi mynd flott síðan ég var smástrákur og eins álíka myndir frá svipuðu tímabili á ferli Sigurðar. Ef fólk vill hneykslast aftur í tímann má benda á nokkra velpússaða steina sem eru í grjótgarðinum við Sæbraut, þar sem Snorrabraut endar. Þetta verk, sem er miklu leiðinlegra en ljósmyndin, er líka eftir Sigurð og var pantað af Rvkborg í tilefni af árþúsundamótunum. Ekki man ég eftir neinni hneykslunaröldu þegar grótið var vígt. Og kostaði það þó miklu miklu meira en skitnar 10 millur. Ábyggilega frekar svona 100 millur, enda er þetta grjót frá Svíþjóð sem var pússað í Kína og svo dröslað í grjótgarðinn. Það er ekki einu sinni skilti við verkið svo fæstir taka líklega eftir því. (Það má geta þess að ljósmyndin af verkinu er eftir Árna Hamstur Torfason, sem hamast nú við að klára að brjóta um bók mína Top 10 Reykjavík and Iceland, sem vonandi slefast í búðir mjög fljótlega.)

01.06.09

Vor andlegur leiðtogi, Hr. Stefán Grímsson, er sextugur í dag. Eru honum, sem og þjóðinni allri, færðar hátíðarkveðjur að því tilefni. Ekki er úr vegi að beina aðdáendum á kvikmynd Sigga Sigga Bang Bang, Dauðataflið, sem er besta stuttmynd Íslandssögunnar. Húrra fyrir Stefáni Gríms!!!

31.05.09
Sliceland hjá Curver í Bjargtangavita er sniðugt dæmi (vitadæmi Listahátíðar). Ég væri mjög til í að skreppa en bara verst maður skreppur ekkert á Látrabjarg. Maður gæti aftur á móti skroppið á Garðskagavita. Curver verður hættur að baka pítsur þegar ég á hugsanlega leið um. Kokkurinn lítur út eins og það vanti salernisaðstöðu í vitann, sagði einhver í afmæli í gær. Ég held að lundakjöt sé gott á bragðið. Auðvitað ætti að éta lunda í miklu meiri mæli en gert er, það eru jú milljónir fugla við landið. Útlendingar eru alveg snar í lundann en við pælum lítið í honum. Við eigum ekki einu sinni gælunafn eins og lundalund eða lunni, sem þýðir að okkur er drullusama um lunda. Fæstir sjá varla lunda um ævina. Ég held ég hafi bara séð kvikyndið einu sinni, allavega öpp klós, þegar ég fór út í Heimaey. Ef einhver sniðugur byggi til lundabita í fagurlega skreyttum poka myndu útlendingarnir kaupa læk kreisí. Þeir eru lundaóðir. Hér liggur gríðarlegur sprotaiðnaður. Eins með íslenska tóbakið, sem ég minntist á um daginn. Böstaða kannabisliðið að undanförnu, sem greinilega er með helgræna fingur, ætti auðvitað að vinna af sér refsingu með því að koma á fót tóbaksræktun. Hveró rettur, Flúðasmókur og Flúortott - ég sé fyrir mér iðnað. Bestu rettur í heimi! Það hlýtur að vera hægt að selja íslenska tóbakið nokkrum hundraðköllum ódýrara en það innflutta. Eða nei. Kannski myndi pakki af Flúortotti kosta 2000 kall. Það væri í stíl við annað.
---
Berlúskóní, eða einhver sem lítur út eins og hann, riðlast á stöðumælaverði. Klassískt myndefni. Einna helst að Gunnar Birgisson komist nálægt honum í stuðinu, sbr. fræga Goldsfinger mynd. (ps. Þetta mun vera feik úr myndinni Bye Bye Berlusconi!)

30.05.09

Enn rölta leikarar um á Hawaii (eða "eyjunni") í Lost, alltaf á leiðinni einhvert að gera eitthvað. Í Brönugrasið eða Svaninn að snúa sveif eða bla bla. Og nú á mögum tímaplönum. Og alltaf fjölgar í leikarahópnum. Alveg fínt sjónvarpsefni! Nú hefur reykskrímslið í Lost fengið sinn eigin spin-off þátt, eða svo segir allavega The Onion.
---
Með Google street view map þarf aldrei að standa upp úr stólnum heldur má upplifa heiminn í gegnum tölvuna. Páll Makkkartnei er lítið hrifinn og vill ekki að eitthvað lið sé að glápa á sig. Hans hús hefur því verið blokkað út (sjá / sjá / sjá).

Yoko Ono - Don't Worry, Kyoko (Mummy's only looking for her hand in the snow)
Hér er listakonan Yoko í gríðarlegum gír á B-hlið Cold turkey smáskífunnar frá 1969. Þessi "breimandi köttur í hakkavél" söngstíll er það sem hatursmönnum Yokoar hefur fundist réttlæta brandara eins og "Morðingi Lennons skaut hann fimm skotum en ekkert þeirra hæfði Yoko!" Ég mæli með að þú komir sofandi eiginkonu/manni þínum á óvart og vekir hana/hann með því að blasta þessu eins hátt og tækið þolir.

29.05.09
Síðasti sígarettupakki sem ég keypti kostaði 770 kr. Næst kostar hann eflaust 900 kr. Ég græt það ekki. Óholt að reykja og svona, enda reyki ég bara þegar ég er í rokki eða fullur. Sem sé sjaldan. Ætli það sé annars ekki eins hægt að rækta tóbak á Íslandi eins og kannabis? Íslenskt tóbak ræktað undir flúorperum í Hveragerði? Topp stöff. Ég reyki eingöngu Hveró rettur. Íslenskan landbúnað já takk. Er enginn að spá í þessu? Sproti.
---
Önnur lausn: Mætti ekki selja Bechtel öll vatnsréttindi á Íslandi? Það er náttúrlega svakalegt hvað við sóum vatninu eins og við gerum. Bechtel gæti svo selt okkur vatnið til baka á 100 kall líterinn. Ha, ekki góð hugmynd? Ég er viss um að Hannesi Hó finnst hún frábær. Þetta er náttúrlega dautt vatn sem enginn á og gerir ekkert gagn. Ég fékk þessa hugmynd náttúrlega frá myndinni sem var á Rúv og ég nennti ekki alveg að glápa á alla. Sláandi vatnsmálið í Bólivíu og það sem einhver sagði um að hagfræði sumra væri eins og stríð. Að tala "fallinna" væri ekki álitið fólk heldur bara tölur. Burt með ógeðslegu kapítalista svínin! Kom samstaða og samkennd!
---
Hér er safnað saman punktum um afleiðingar stjórnarfars síðustu ára. Það er ömurlegt hvernig komið er fyrir venjulegu fólki á þessu vindrassgati frábæra landi. Við verðum að vinna mest til að slefa í mannsæmandi líf. Það er að segja venjulega liðið. Sumir hafaða mun skár. Annars er ekkert að því að vinna mikið, ef það er þokkalega gefandi og skemmtilegt. Fullnægja í lok velheppnaðs vinnudags er sennilega betri en fullnægja í lok afslöppunardags, tala nú ekki um ef maður lá í sukki allan daginn.
---
Ég óska eftir að komast í vinýlplötusöfn og afganga, ekki síst út á landsbyggðinni. Ef einhver vill losna við vinýlplötur úr bílskúrnum (ég borga) má hann láta mig vita. 
---
Ég "endurfjármagnaði" 2005 af því það var svo mikið auglýst. Frjálsi sá um lánið. Nú ku enginn Frjálsi lengur og síðasti greiðsluseðill var frá Sparisjóðnum í Skagafirði. Kúl. Ég fór í viðskipti hjá Netbankanum af því hann bauð aðeins skár díl á yfirdrætti. Nú er enginn Netbanki lengur og ég veit satt að segja ekki hvar peningarnir mínir eru (eða skuldin mín). Best maður hringi... Íslandi í dag. Húrra fyrir því!

27.05.09 - Popppunktur 2009

Við í hinu stórfengilega setti. Popppunktur á vegum Rúv hér. Popppunktur á vegum mín hér. Sýningar hefjast 5. júní, föstudagskvöld á eftir Kastljósi (kl. 20.10). Endursýnt á laugardögum kl. 16.50 og á sunnudögum kl. 10.40. Geeeeegggtt!

26.05.09
Jess... Prinsessan með Buff er nr. 1 á Bylgjulistanum, nr. 2 á Vinsældarlista Rásar 2 og nr. 3 á Lagalistanum. Vinsældir... loksins... Svona gerist þegar maður lætur fólk sem kann að syngja syngja lögin sín!
---
Gærdagurinn var súrrealískur. Hollenskt sjónvarpsfólk frá fréttaskýringaþættinum Tagenlicht lét mig keyra sig um á Land Rover og sýna sér tómar byggingar góðærisins. Þetta var glænýr Land Rover, alveg ágætt að keyra svona druslu. Ég mun ábyggilega gera jafn mikið gagn fyrir þjónina og We have to kill something karlinn. Fokk þatt. Við fórum upp a Bauhaus. Fyrir framan lokað B&L. Ég tékkaði á fossinum í Kaupþingi. Ekkert merkilegur, ekki miðað við það sem ég hélt að þetta væri. Fórum á Kaffitár í Höfðaborg. Til að auka á draumkennda upplifunina þá voru Mezzoforte á næsta borði. Þeir hollensku þekktu ekki til Mezzoforte en þekktu náttúrlega Focus. Túrinn endaði í grunninum á Tónleikahöllinni. Þau höfðu farið á B5 um laugardagsnóttina. Sögðu að þar væri djúsað eins og það væri 2007 ennþá. Jakkafatadrengir keyptu 300 evru kampavín til að komast í spesherbergin eins og enginn væri morgundagurinn. Það vildi enginn tala við þau on kamera. Starfsmaður sagði: Þeir trúa því ekki ennþá að ballið sé búið. Hætta ekki að spreða í 300 evru kampavínið fyrr en kortunum verður lokað. Fullir fávitar.

25.05.09

Var við giftingu á Akureyri um helgina. Hápunkturinn var vitanlega upptroðsla Helenar Eyjólfs sem tók gott prógramm sem sörpræs gjöf við þrumandi undirleik Sérsveitarinnar. Helena var að sjálfssögðu með stokkinn og mun þetta vera orginal stokkurinn. Hún hefur bara átt einn stokk um dagana. Ég náði að dýfa tánni í Akureyri í þessari stuttu ferð, einn Brynjuís og gott sessjón í vinýlherbergi Frúarinnar í Hamborg. Þar er traust plötuval og ekki skemmir fyrir þegar umslögin eru merkt með límmiða frá Hljómveri, Glerárgötu 32. Gerði fín innkaup, eða svohljóðandi:
Rúnar Júlíusson - Come into my life - smáskífa frá 1975
Björgvin Halldórsson - Þó líði ár og öld - fyrsta LP Bjögga frá 1970, útg. Tónaútgáfan Akureyri, gríðarvel farið eintak með óskemmdu föndri á textablaði 
The Beatles at the Hollywood Bowl
Yoko Ono - Season of Glass + Walking on thin ice 7"
George Harrison - Dark Horse
Bee Gees - Idea
U-Roy - Version Galore
Ringo Starr - Goodnight Vienna
John Lennon - Menlove Ave, og síðast en ekki síst
Raspberries - Side 3, með hindberjakörfulegu umslaginu nokkuð heillegu.

Raspberries - Tonight
Raspberries frá Ohio voru í sullandi páverpoppi snemma á 8. áratugnum, ekki á ólíkur slóðum og hið gríðargóða band Big Star. Bítlar og breska bylgjan voru áhrifavaldar, þetta var poppað og melódískt en spilað með rokktrukki, Power pop kallað síðar þegar bönd eins og The Knack (My Sherona) slógu í gegn. Hindberin áttu nokkuð góðu gengi að fagna og bandið gerði fjórar LP samtals. Söngvarinn Eric Carmen sló síðar í gegn sóló með væmnismellinum All by myself og enn seinna mð sándtrakklögum, t.d. Hungry Eyes úr Dirty Dancing.
---
Á leiðinni heim tók ég eftir því að 850 fermetra sumar"bústaður" Sigurðar í Kaupþing er ennþá eins og eitthvað drasl þarna upp á hæðinni, óbyggt og hálfkarað drasl úr vangefinni fortíð. Ætli aumingja maðurinn klári þetta einhvern tímann? Kannski hugmynd konunnar í Baulusjoppunni verði einhvern tímann að veruleika, að "bústaðnum" verði breytt í dvalarheimili fyrir eldri borgara úr sveitinni. Nóg er plássið.

22.05.09 - Sunnanrúntur
Sunnanrúnturinn í gær var smá misheppnaður. Afi, pabbi og börnin skruppu austur fyrir fjall. Við vorum komin kl. 12 í sælureitinn Sólheima en þar opnaði ekkert fyrr en kl. 14. Engu að síður ágætt að skoða sig um, þótt við kæmumst ekki í kaffi eða lífræn listaverk íbúa. Dýragarðurinn Slakki var ekki búinn að opna. Ætli hann geri það nokkuð fyrr en um Hvítasunnuna. Iðuvellir er nýja Eden. Búið er að laska menningarverðmæti, held ég, mála yfir gamalt kits. En það sem verra var: Það voru ekki til neinar pylsur! Ekki líst mér á reksturinn ef menn ætla að klikka á svona grundvallaratriðum. Söluturninn Mæran í Hveragerði reddaði þessu. Við skruppum líka á planið hjá Kjörís, en eins og Fbl greinir frá í dag er Dagbjartur Óli sonur minn "andlit Kjöríss" í sumar. Honum fannst mikilfenglegt að sjá sjálfan sig á risamynd aftan á öllum ísbílunum og við komum ekki í þá sjoppu að hann blasi ekki við af nýja ísplaggatinu. Hann er þó svo sem ekkert að pæla mikið í þessu. Móttakan í Hellisheiðarvirkjun var svo allavega opin. Það er gríðarmikið mannvirki, allt mjög 2007. Við gláptum yfir tröllslega virkjunina og krakkarnir fengu buff á hausinn. 

19.05.09 - PP 5. júní
Popppunktur fer í loftið á Rúv á föstudagskvöldið 5. júní á eftir Kastljósi. Præm tæm, sem sé. Svo verður þetta vikulega fram í sept. Úrslitaleikurinn er 11. sept. Það er búið að læna upp í algjörlega magnaða keppni. Þetta eru fyrstu leikirnir átta:

Reykjavík! - Eurobandið
Áhöfnin á Halastjörnunni - Sigur Rós
Sprengjuhöllin - Ljótu hálfvitarnir
Elektra - Bloodgroup
Ingó & Veðurguðirnir - Hvanndalsbræður
Baggalútur - Buff 
FM Belfast - Jeff Who?
múm - Árstíðir

18.05.09 - Skítamix
Einn lengi að tjá sig... Þabbarra svo gegt að gjöra í Popppunkti og rugli mar! Ér ekkert hættur að blögga eða neitt mar. Hei! Ægilega gaman að við séum næst best í Eurovision þetta árið. Mér langaði alltaf að fara beint út í búð að kaupa mér ilmefni fyrir klósettið þegar ég sá þennan bláa höfrung koma þarna siglandi á bakvið Jóhönnu Guðrúnu. Hafa tvo höfrunga næst og þá mölum við þetta.
---
Ég er mikið hlyntur sykruðum drykkjum eins og komið hefur fram. Mér er alveg sama þótt Ömmi setji á þetta "sykurskatt", eða hækki vskinn í það sem hann var. Þá missa kannski færri tennurnar. Gríðaleg umræða á sér stað á spjallsvæði okurbloggsins á Vísi um gamalt gos. Fólk kemst alltaf í ham þegar gamalt gos ber á góma, sbr. Sódóma Rvk. Þarna er áhugavert bréf um uppruna Mix-drykkjarins, sem nú er kominn á markaðinn orginal sykraður. Ég er nú enginn Mix-maður, fékk mér þó svona nýtt sykur Mix og þetta rann nú kannski ekkert niður með glans. Ég á hinsvegar í litlum erfiðleikjum með að sporðrenna heilli flösku af Orku. Einna skemmtilegast við Mixið finnst mér sú staðreynd að Hrafn Gunnlaugsson er Mix-fíkill. Ókei, þetta er nú kannski engin staðreynd en ég sá Hrafn einu sinni kaupa sér Mix með mat á Krúa Tæ! Í bréfinu kemur fram að Mix hefði upphaflega átt að heita Skítamix. Fá eina Skítamix takk. Bréfritari er Friðjón Árnason og hér er bréfið:

Gosdrykkurinn MIX hefur nokkuð verið hér til umræðu og hafa sumir bent á að drykkurinn sér norðlenskur að uppruna og hafi fyrst verið framleiddur hjá Sana á Akureyri. Þetta er ekki alveg rétt en á Akureyri var drykkurinn fundinn upp og framleiddur í upphafi. MIX var fyrst blandað og framleitt hjá Efnagerðinni Flóru á Akureyri sem var í eigu Kaupfélags Eyfirðinga. Það var bakarinn Björgvin Júníusson sem bjó þennan drykk til fyrstur manna með aðstoð vinnufélaga sinna til bragðprófunar. Þannig var að Efnagerðin Flóra framleiddi appelsínugosdrykk undir nafninu Valash. Hráefnið í þann drykk var að uppistöðu appelsínuþykkni en lítill hluti var úr ananasþykkni. Svo gerðist það fyrir jólin eitt árið, sennilega í október, að Efnagerðinni barst hráefnið í drykkinn til að jólaframboðið yrði nægilegt en svo óheppilega hafði til tekist að hlutföll hráefnisins urðu öfug fyrir mistök seljandans. Þannig að megnið af hráefninu í það skiptið var ananasþykkni en aðeins lítill hluti appelsínuþykkni. Ekki mátti láta akureyskan gosdrykk vanta fyrir jólin þannig að starfsmenn efnagerðarinnar hófu tilraunablöndun úr fyrirliggjandi hráefni. Þannig fóru leikar að Björgvin Júníusson, sem Akureyringar þekktu sem Badda Jún, náði að blanda þokkalega drykkjarhæfan mjöð úr efninu og kallaði til vinnufélaga sína til að smakka “skítamixið” eins og hann komst að orði. Mönnum féll drykkurinn ágætlega en töldu hins vegar ekki fært að kalla hann skítamix svo niðurstaða þeirra félaga var að kalla drykkinn einfaldlega MIX. Þess má geta að rosknir Akureyringar muna eflaust eftir flöskunum sem Valash og MIX voru seldir í en þær flöskur höfðu nafn efnagerðarinnar FLÓRA upphleypt á öxl flöskunnar.
Björgvin Júníusson blandaði og pakkaði einnig fyrir jólin árum saman ölgerðarefni sem selt var í búðum á Akureyri fyrir jólin undir heitinu MALTO. Í pakkanum voru nákvæmar leiðbeiningar um það hvernig brugga ætti ölið og til að fullnægja lagalegum kröfum um banni við að búa til áfengi var skýrt tekið fram í leiðbeiningum að magn sykur mætti aðeins vera upp að ákveðnu marki, ef settur væri meiri sykur yrði ölið of áfengt og ÞAÐ MÆTTI ALLS EKKI! Þessar upplýsingar hef ég fengið staðfestar hjá stjúpsyni Björgvins Júníussonar en hann heitir Þórður Pálmason og er þekktur sem veitingamaður á Café Rosenberg.
---

Prins Póló - Átján og hundrað
Það er allt að verða vitlaust í plötupökkunum. Skakkamanage er tvískipt á tveimur plötum með Prins Póló og dúndurgóða 4-laga plötu Ekki heima og Létt á bárunni á Sexí. Skakkamanage notast við SS-læsinginu, enda er sú læsing alveg að virka. Svo má kaupa geggið á diskum líka. Tékkitát hér í plötubúð. Svo hafa "gömlu brýnin" í Vonbrigði gefið út nýja plötu sem má tóndæmast í gegnum hér. Þungt og þétt að vanda.
---
Andskotans! Hvað þarf þetta lið endilega að vera röfla út um rassgatið á sér þegar Lost á að vera í sjónvarpinu?

11.05.09 - Tveir Bubbar
Popppunktur er að slefa í geggjað stuð. Við erum að tala um að þátturinn hefjist þann 5. júní (föstudagskv) og samkvæmt hefð byrja 16 lið sem saxast oní einn sigurvegara eftir 15 leiki (útsláttarkeppni). Þetta eru engir smá leikir maður. Eins og áður hefur komið fram byrjar geimið á Sumargleðinni á móti Sigur Rós. Þá kemur Eurobandið á móti Reykjavík!, þá Sprengjuhöllin á móti Ljótu hálfvitunum, og þá Elektra á móti Blood Group. Svo kemur áframhaldandi snilld, sem ég röfla um síðar. Ég var að sníkja föt til að vera í. Maður verður náttúrlega að vera kúl on tv. Það er enginn með havæskyrtur og ég búnað selja allar mínar. Næsti bær er Brim sem ég fór að sníkja í. Í Kringlunni spurði ég strák hvað eigandinn heitir. Bubbi, sagðann, auðvelt að muna það. Hann er að vinna niðrá Laugarvegi. Já ha ha, sagði ég, auðvelt að muna það. Svo ég fór úr búðinni og beint í flasið á Bubba sjálfum Morthens sem var með Dögun París í vagni. Hann dúndur hress að vanda, nema helvíti ósáttur við myntkörfulánið sitt, eins og gefur að skilja. Jæja, Lost að byrja. Bæ.

08.05.09 - Skrifstofan hingað og þangað
Þegar ameríska The Office byrjaði hélt ég að það myndi totta fyrir allan peninginn. Það reyndist ekki rétt. Þetta er alveg jafn gott og það orginal enska. Ekki vissi ég að það er allt vaðandi í öðrum "Office" þáttum. 
Í Frakklandi heitir það La Bureau.

Í Þýskalandi heitir það Stromberg.

Í Kanada heitir það La Job

Og í Chile La Ofis. Þá veistu það.
---
Gordon Brown, "Downings-strætis dóninn", er nú meira andskotans fíflið og tuddast svona á litla stráknum í bekknum. Okkur, það er að segja. Eina skemmtilega við hann er að hann er með sama munnkækinn og Hyacinth Bucket í snilldarþáttaröðinni Keeping up Appearances. Í þessari endalausu milljarðasúpuskuldakjaftæði væri gott að fá svör við spurningunum: a) Hvaða hálfviti veðsetti þjóðina fyrir öllum þessum skuldum og b) Hvaða hálfviti bjó til svo krosseignatengt hagkerfi að allt helvítis draslið fór á hliðina þegar 20-30 manns fóru á hausinn. Fer ekki að koma tími til að þessum beisikk spurningum verði svarað? 

07.05.09
FRÉTTATILKYNNING: Í þjóðleikhúskjallaranum í kvöld, 7.maí, kl. 21:
Fílahjörðin rumskar eru tónleikar til styrktar Steingrími Eyfjörð Guðmundssyni, sem einnig er þekktur sem Hawaígítarundrið (KRAMDA HJARTAÐ), kvikmyndatónskáld, lagahöfundur, hagyrðingur, kórstjóri og svo ótalmargt fleira...Snillingurinn Steingrímur hefur nú háð stranga baráttu við hvítblæði í um það bil hálft ár og varið tímanum lengst af á Landspítalanum, en að lokinni meðferð hér heima fer hann í mergskiptaaðgerð í Svíþjóð. Varla þarf að taka fram að svona veikindi höggva gríðarlegt skarð í fjárhag hvers og eins sem í því lendir, hvað þá nánustu fjölskyldu. 
Því hvetjum við alla aðdáendur, vini og velunnara Steingríms til að mæta á styrktartónleikana og skemmta sér í leiðinni. 
Fram koma Sýrupolkasveitin Hringir ásamt Möggu Stínu, nýstirnin í Comedy-rockhljómsveitinni Skelkur í bringu, gleðibankarnir Úlfur Eldjárn & Músíkhvatur, gamla góða, eina og sanna Stórsveit JÚPITERS og sjálfur Dóri Dragbít.
Aðgangseyrir er 1200 kr. (má borga meira – það rennur líka beint til Steingríms). 
Veitingar verða seldar á vingjarnlegu verði.
Þeir sem ekki komast geta styrkt hann með framlagi á reikning 0513-14-402093 kt. 080160-3139. 
Fyrir utan sjálfa tónlistarmennina kunnum við öllum sem gera þetta mögulegt bestu þakkir fyrir hjálpina.
---
Hin stórkostlegi fyrsti þáttur í PPPP verður vonandi og að líkindum Sigur Rós á móti Sumargleðinni (Hemma Gunn, Ómari Ragnarssyni og Þorgeiri Ástvalds). Ekki amaleg byrjun það! Fbl greinir frá.

06.05.09 - Ferðalög
Ég hef komið til Hell í Noregi en ég hef aldrei komið til Boring, Oregon. 

05.05.09 - Vörukynning

Hefi tekið trylling síðustu daga á undarlegar matvörur frá snilldarbúðinni Mai Thai á Hlemmi. Fyrst ber að nefna hið fáránlega ánetjandi þarasnakk frá Khun film japanese crispy seaweed - perfect snack with benefits, eins og segir á pakkanum. Heiða er orðin húkkt á snakkinu líka og hún telur að þetta benefits sem talað er á pakkanum um séu velsmurðar hægðir. Hið undursamlega þarasnakk er til í fjórum tegundum, með original, salty og tum yum bragði, sem öll eru almögnuð, en mér fannst spicy verst, full mikið piparbragð af því. Verð hvers pakka er um 370 kall sem er hverrar krónu virði. Þarasnakkið er þó klárlega aquired taste, svo ekki koma vælandi í mér ef það reynist ógeðið eitt.

Önnur snilld í búðinni eru ís/frostpinnar með exótískum brögðum frá Joy Ice í Thailandi. Þeir kosta rétt undir 200 kall stk og fást í lausu eða fimm saman í svona kassa. Kókoshnetubrögð eru tvö, nata de coco og young coconut, bæði geðveik. Svo eru þarna gríðarexótísk brögð byggð á ávöxtum sem maður vissi ekki að væru til. Til dæmis Durian:

Svona Durian var kannski til í Hagkaupum á háæri góðærisins, ég man eftir þessu í búðinni, held ég. Bragðið af þessu er gríðarlega vafasamt. Fyrri helmingurinn var laukbragð en svo kom ananasbragð. Algjör steypa. Ég skellti þessu auðvitað í mig. Ananaslaukbragð... mmm... spes. Það virðist sem á efri helmingi pinnans sé gums úr ávextinum sjálfum. Á kókoshnetupinnunum var t.d. kókoskjöt í efri helmingnum. Ég bind miklar vonir við Taro íspinnan sem verður smakkaður bráðlega. Man ekki til þess að hafa séð Taro í Hagkaupum.

Ég lifi á brúninni og tékkaði því á rauðbaunaís áðan:

Ég mæli ekki með honum. Ég var lengi að komast í gegnum allar baunirnar á efri helmingnum en þegar því lauk var bragðið alveg í lagi. En hvað, maður verður að prófa allt. Hugsa sér það að ég hefði getað farið í gegnum lífið án þess að éta rauðbaunaís. Svona leit ég út við að éta þetta:

---
Bókanir eru á fullu fyrir PPPP5 sem hefst á Rúv í byrjun júní. Er óhætt að lofa framúrstefnulegum leikjum í bland við geðveika leiki. Fyrsta viðureignin verður t.d. svo einstök að fólk mun gapa af undrun og spennu. Þá má geta þess að platan INNIHELDUR er plata vikunnar á Rás 2. Sala hefur gengið vel en eitthvað er þó eftir af hinu takmarkaða magni CDa. Þá eru komin "í spilun" tvö geðveik lög eftir mig, Prinsessan með Buff, pródúserað af bandinu, og Komdu aftur með Elektra, pródúserað af Örlygi Smára.

02.05.09 - Endalaus hamingja og eilíf fullkomnun
(kl. 16:00) Ég hefði farið að sjá David Lynch jafnvel þótt hann hafi verið með opinn kynningarfund um rotþrær. Hann er bara svo æðislegur og hefur gert svo mergjaða list. Hann og Sigurjón Sighvatsson voru að koma út úr jeppa við Háskolabíó þegar ég gekk framhjá hálftíma fyrir gigg. Þeir voru eitthvað að vesenast með það inn um hvaða hurð þeir ættu að fara. Það var hápunkturinn að sjá þá þarna því enginn annar sá þetta. Ef ég hefði nú verið með sándtrakkið úr Blue Velvet í vasanum eða ljósmyndabókina sem ég á eftir hann hefði verið hægt að fá eiginhandaráritun. Í staðinn skotraði ég bara augunum á meistarann á meðan ég gekk framhjá. Hárið grásprengt og hann í svörtum frakka. Alveg magnaður. Svo var vitanlega gaman að heyra og sjá hann tala um þetta TM. Hann lýsir þessu hugleiðsludóti sem einhverju alveg rosalegu. Eins og því besta í heimi hér. Gullkistu sem þarf bara lykil til að opna. Lykill er rosaeinföld mantra sem maður verður samt að læra hjá einhverjum möntrugaur fyrir 80$, og svo kostar meira ef maður vill ná þessu enn betur og verða ennþá hamingjusamari og fullkomnari. Hmmm... Það getur vel verið að ég sé bara alltof neikvæður og sé að missa af einhverju geðveiku. Þetta er ábyggilega bara svipað fínt og að liggja í mosabarði og hlusta á árnið. Það kostar minna. Hér eru Strandaglóparnir. Þeir voru líka á fullu í þessu og míní-hitlerinn Mike Love er ábyggilega enn að.

The Beach Boys - Transcendental Meditation
---
David Lynch með ókeypis íhugunarrugl hér í næsta húsi, Háskólabíói, kl. 14 í dag! Ég held maður neyðist til að mæta, til að glápa á karlinn, þótt þetta íhuganarrugl sé ekkert sem maður nennir. Og talandi um snillinga. Ekkert nema snilldin ein á Rúnars Júl tribjúti í kvöld. Við Heiða tökum aðeins í með Helga Björns. Þegar við mættum á æfingu í gær stóðu eftirtaldir úti að reykja og ræða málin: Gunnar Þórðarson, Hemmi Gunn, Gylfi Ægisson og Gulli Briem. Er hægt að ná saman meiri orku á einum punkti? Jú jú, fyrir innan Bó, Krummi, Bjartmar, Shady, Eyvi og Þórir Baldursson, svo bara nokkur séu nefnd. Ég sé fram á að þessi dagur verði eintómt snillingasjó.

01.05.09 - Pönkfarir
Miklar og pönkaðar draumfarir í nótt. Fyrst dreymdi mig reyndar Geir Ólafsson, en ég man ekki alveg hvað við vorum að gera. Held í bíói saman. Svo fór mig að dreyma Jello Biafra. Hann var að selja einhverja pönkdiska og plötur frá Alternative Tentacles úr sendibíl á einhverri pönkhátíð (líklega var ég hér undir áhrifum frá stráknum sem er að selja myndir úr sendibíl á hinni frábæru sýningu LHÍ á Kjarvalsstöðum). Hjá Jello sá ég haugana af plötum með S.H.Draumi. Svo var ég labbandi ber að ofan inn á fínu hóteli að skenkinum og spurði hvað nóttin kostaði. 3500$, sagði konan og bað mig vinsamlegast að fara í eitthvað, ég væri eins og mannæta. Svo var ég kominn ofan í kjallara á hótelinu og þar var fjöldamorðingi í felum og blóðslettur út um allt. Ég vaknaði fljótlega upp úr því. Sofnaði strax aftur og þá kom Joe Strummer. Hann var að vinna í plötubúð sem var neðanjarðar í einhverjum undirgöngum í erlendri stórborg. Það voru bara seldar pönkplötur í þessari búð. Joe hleypti mér inn því það komst enginn inn nema vera hleypt sérstaklega. Þetta var mjög furðuleg búð, rimlar fyrir öllum gluggum. Ég sá Viltu nammi væna umslagið en mér til mikillar skelfingar var vitlaus plata í nærbuxunum, einhver minniháttar pönksafnplata. Á borðinu lágu nokkur eintök af nýútgefnum bútlegg með X-Ray Spex. Mér fannst umslagið asnalegt, einhver teiknimyndaleg skrímsli sem hefðu getað passað á plötu með bandi eins og Misfits en ekki X-Ray Spex. Svo vaknaði ég nú bara.

30.04.09
Bloggið situr á hakanum vegna anna. Er á síðustu metrunum að klára túristabók á ensku sem byggist á eintómum topp 10 listum. Hið frumlega nafn hennar er Top 10 Reykjavík and Iceland and The Icelandic Ways. Strax eftir hana skellur á PP-síson, nokkrir þættir verða teknir upp í maí en sýningar hefjast strax í júní. Þarf að semja spurningar sem vindurinn. Ýmis glæsileg bönd hafa staðfest þátttöku en því miður verða Hjaltalín ekki með því bandið er svo upptekið í útlöndum í sumar (meik?). Egó verður heldur ekki með, Bubbi nennir vitanlega ekkert að taka þátt í einhverju spurningarugli. Rennur því fimmta PP-sísonið úr greipum án þess að Bubbi fáist í þáttinn.
---
Það er magnað að David Lynch sé á leiðinni hingað. Ég er ekki frá því að hann hafi verið í guðatölu hjá mér á löngum æviskeiðum. Hann fór reyndar alveg með það í síðustu myndinni. Veit samt ekki hvort ég nenni að hlusta á hann þusa um þetta íhugunarkjaftæði. Var ekki Mike Love bjáni í Beach Boys á kafi í þessu? Eða hvað? Er þetta málið? Andlegt eitthvað? Verður maður að sleppa tökum á efnishyggjunni og gerast svo hryllilega andlegur að maður snerti ekki jörðina með iljunum?
---
Bestu döðlur sem fást á landinu eru þær lífrænu í Maður lifandi. En vá hvað þær kosta. Kílóið á 3900 kall. Keypti sex döðlur í gær á 500 kall. Það er auðvitað sturlun. Ég skammast mín fyrir að segja frá þessu. En þær eru bara svo ógeðslega góðar. Við vísindalega athugun á döðlum (sem sé, að lesa um döðlur á Wiki) kemur í ljós að döðlur eru til af ótal tegundum og þeirra er neytt á fjórum þroskastigum. Kannski maður leggist í döðlufræði meðfram nýja andlega lífinu. Samt helvíti vonlaust að ætla sér eitthvað í döðlubransanum á Íslandi. Maður yrði að flytja til Arabalandanna til að eiga meira val.
---
Mikligarður er uppáhaldsbúðin mín, eða Holtagarðar eins og það heitir víst. Lufsan segist hálfpartinn fyllast depurð við að koma þarna því hrundir draumar uppspennts góðærisins blasa þarna alls staðar við. Maður hefur Bónus til að versla ódýrt í og svo glæsibúð Hagkaupa við hliðina til að maður geti athugað strax hvað maður sparaði mikið við að versla í Bónus. Hagkaupsbúðin þarna kemst næst því að líkjast glæsiflennibúðum erlendis. Þeir eru reyndar búnir að minnka hana aðeins núna en hún er samt alltaf jafn tóm af fólki. Það er aðdáunarvert hversu lengi menn ætla að halda út. Ég styð þessa verslunarmiðstöð heilshugar!
---

Glansmynd úr góðærinu #1: Ofurmenni kaupa sér pylsu í Baulu.
---

Eftirminnileg klósett #2: Klósettið á CBGB's er að sögn eitt hið eftirminnilegasta í heimi hér. Það er til á plaggati enda fagurlega skreytt og margar rokkhetjur hafa kúkað og pissað og ælt í það. Kannski riðið og sniffað á því líka. Hin goðsagnakennda (þoli ekki þetta orð) rokkbúlla CBGB's er nú liðin undir lok og eigandinn dauður, en maður flæktist nokkuð þarna á sínum tíma. Fór á tónleika t.d. með The Frogs, Christmas og Cowboy Junkies. Þá voru Cowboy Junkies ekki búin að meikaða en ég man að á svæðinu var einhver ægilegur karl með risavaxinn kæbojhatt, líklega umboðsmaður. Bless spilaði þarna 23 nóvember 1990 ásamt fullt af böndum, m.a. Superchunk og Courtney Love. Hljómsveitinni Courtney Love, ekki eiginkonunni. Þetta var eitthvað "grrrl riot" band frá úthverfi í New Jersey eða eitthvað. Ekki veit ég afhverju þau hétu þetta, en skruggan hún Love hefur líklega verið byrjuð að vekja á sér athygli með samvistum sínum við strákræfilinn. Það er til upptaka af Bless-gigginu í þokkalegum gæðum. Maður gerir kannski eitthvað við hana seinna. Það þarf greinilega að gera eitthvað til að koma S.H.Draumi og Bless í arfleiðina og sögubækurnar, ekkert af efni bandanna rataði á þennan bestu plötur Íslands lista sem nú er verið að velja úr. Og ekki einu sinni æ með Unun sem er nú hálf fáránlegt! Ég á bara eina plötu þarna, Abbababb. En það eru svo sem fleiri skandalar á listanum. Hvar eru Óðmenn? Nei nei, ókei, kannski er þetta ágætur listi. En allavega, klósettið á CBGB's. Ég man ekkert eftir því nema að það var allt útkrassað og svakalega öreigalegt. Ég man ekkert hvað ég gerði á því. Svo kannski var það ekkert eftirminnilegt eftir allt saman. Bara frægt. Heimsfrægt. Og bíður nú í kassa einhversstaðar eftir að CBGBs verði opnað aftur í Las Vegas. Sem gerist ábyggilega ekki því karlinn er dauður. 

Næst í Eftirminnileg klósett: Svakalega klósettið í turninum í Riga. 

27.04.09 - Færeysk Orka í Norræna húsinu

Orka - Fjøllini standa úti
Einu sinni komu þýsku heróínlistamennirnir Einsturzende Neubauten og söfnuðu drasli á málmöskuhaugi sem þeir drógu inn á Zafarí og héldu svo tónleika. Nú er draslrokkmenningin komin til Færeyja og hljómsveitin Orka, sem eru að spila á allskonar drasl samhliða hefðbundnum hljóðfærum, spilar í Norræna húsinu á fimmtudagsinn ásamt Eyvöru Pálsdóttur og Ólöfu Arnalds. Hljóðfærin sem ORKA spilar á eru til dæmis steypuhrærivél, slípirokkur og loftpressa. Það er magnað hvað þeir geta fengið fagra tóna með slípirokknum. ORKA hefur fengið mikið lof gagnrýnenda og er afar vinsæl í Frakklandi sem og víðar í Evrópu.

Hér eru frekari upplýsingar um ORKU:
ORKA ásamt Yann Tiersen í Frakklandi

Umfjöllun um ORKU í All Scandinavian

Heimasíðan þeirra
---
Norræna húsið er að gera góða hluti. Mér finnst svo mikið norrænt velferðarsamfélag eitthvað að fara þangað. Allt eitthvað svo mikið hrökkbraut. Sem er gott. Ég fór þar á anga af List án landamæra sýningunni, sem var mjög kúl. Nú stendur yfir gríðarleg List án landamæra dagskrá. Þar má yfirleitt sjá flottustu list dagsins í dag, sem einnig er á viðráðanlegu verði. Svo er ég auðvitað á leiðinni á Kjarvalsstaði til að sjá útskriftarsýninguna LHÍ. Þessar tvær sýningar, meistaranna í LÁL og útskriftakrakkanna í LHÍ eru afburðaviðburðir í listum, skemmtilegt og frjótt stöff.

26.04.09
Jæja. Komiði þá með þetta norræna velferðarþjóðfélag takk.

23.04.09 - Meira kyn, minna kr
Ég spái sérstaklega mörgum útstrikuðum kjörseðlum í ár. Það er greinilega algjört eitur að hafa fengið pening frá FL eða Baugi. Ætli frambjóðandi sem væri vís að því að hafa borgað gleðikonu fyrir að skíta á bringuna á sér (DV birti myndir) væri ekki í skárri málum. Mikið væri annars skemmtilegra ef hér væri allt vaðandi í kynlífsskandölum en ekki peningaskandölum. Þessi eða hinn næðist á mynd aftan á geit („Þetta eru óþolandi dylgjur, það voru allir að þessu 2006“), þessi eða hinn með klemmur á pungnum í DV, heill þingflokkur í hópmökum í Skíðaskálanum í Hveradölum - myndir. Þá væri fútt í þessu. Miklu skemmtilegra en fúlt peningahjakkið endalaust. Maður er líka orðinn algjörlega ónæmur fyrir þessu milljóna, milljarða, skrilljóna-stórhríð sem hefur bulið á manni síðan í haust. Tvær milljónir frá FL? Það er nú ekkert! hugsar maður fyrst, en svo, bíddu bíddu... Tvær millur? Það er nú alveg fullt. Maður er alveg sjálfur slatta lengi að streða fyrir því brúttó, tekur lungan úr árinu. Hefði ekkert á móti því að fá svona "styrk" frá Satani ehf. Sem gerði algjörlega engar kröfur á mann í staðinn. Algjörlega engar. Það er alveg ljóst. Engar. Einmitt.
---
Og gleðilegt sumar. Loksins.

22.04.09
Mæli með tónleikum Ebergs í kvöld á Sódómu Reykjavík. Húsið opnar klukkan níu en bandið byrjar að spila um 10. Hljómsveitina skipa ásamt Einari þeir Nói Steinn Einarsson trommuleikari, Haraldur Þorsteinsson bassaleikari og Pétur Ben sem leikur á gítar og selló. Auk þess mæta aðrir góðir gestir á svæðið og taka lagið með bandinu. Platan Antidote er eins og fólk ætti að vita dúndurpoppstykki. Það stóð til að Dr. Gunni spilaði þarna líka en þá mundi Biggi að hann var bókaður í Abbasjó á Skaganum. Dr. Gunni mun þó spila eitthvað í sumar.
---
Buffið hefur gert útgáfu af lagi mínu "Prinsessan mín" en það heitir bara "Prinsessan" hjá þeim. Eins og við var að búast er um að ræða poppsnilld hjá strákunum enda kunna þeir bæði að syngja og spila. ELO og Toto pissa í sig yfir þessu hjá þeim. Lagið verður frumflutt í þætti Felixar Bergssonar á Rás 2 á morgun um kl. 11. Næsta skref í sumarsmellabransanum er svo næsta lag Elektru. Las í Fbl að Örlygur Smári væri að taka það upp as ví spík. 
---
Jæja. Ég er alveg sammála þótt ég ætli að kjósa VG. 

21.04.09
Heyrði í Árna Matt í útvarpsþættinum Víðsjá í gær. Hann sagði þennan dóm yfir sænsku Pirate Bay gaurunum engu skipta. Stafrænan yrði ekki stoppuð. Í því sambandi langar mig til að skanna inn þessa fornöld sem er að finna á innraslívi á plötu með Haircut 100 (ömurleg plata). Held þessi bardagi gegn stafrænunni sé álíka vonlaus:

Ég rúntaði niður Laugarveginn eins og góður Reykvíkingur um helgina. Með ís og alles. Ég taldi TIL LEIGU skiltin í gluggunum. Frá Snorrabraut að Klapparstíg eru 14. Frá Klapparstíg og niður allt Bankastræti að Lækjargötu bætist bara eitt við. Samtals 15. En vandamálið er sem sé Klapparstígur að Snorrabraut. Fæ ekki betur séð en allt það nýja sem bætist við séu eintómar lopapeysubúðir. Einhver fái nýja hugmynd takk! Sá líka að Heilsuhúsið er komið þar sem Apótekið var á horninu á móti Mál og menningu. Leit helvíti kosmópólitan út. 
---
Skítt að drengjabækur skuli ekki vera vinsælar lengur. Stefán og Smyglskútan yrði metsölubók.
---

Headswim: They're gonna be massive! (sagt í 2 vikur 1997)
Kláraði loks skáldsöguna Kill your friends eftir John Niven. Þetta er bókstaflega mannskemmandi bók. En fyndin. Hún lýsir breska tónlistarbransanum árið 1997, sirka þegar ég var að reyna að meikaða með Unun. Þessi bók ætti að vera skildulesning fyrir alla bláeygða krakka sem ætla sér einhverja hluti í bransanum. Það er góðæri 1997 í Bretlandi, britpoppið sullar og Tony Blair tekur völdin. Steven Stelfox, A&R maður hjá ónefndu stórfyrirtæki, er sögumaður og álíka geðveikur og Bates í American Psycho. Þessari bók hefur verið líkt við "American Psycho meets Spinal Tap", sem er nokkuð góð lýsing. Steven ríður hórum, lepur upp kókaín, flækist á milli tónlistarhátíða, hlustar á demó, segir það sem böndin vilja heyra og öfundast út í samstarfsmenn sína þegar þeir detta niðrá bönd sem meika pening. Það er það eina sem skiptir máli í þessum drullubransa, að meika pening. Það er hent stórfé í allskonar vonlausa lúða í von um að eitthvað skeði. Bönd eru hafin til skýjanna - bransagaurar hæpa þetta upp og blöðin tyggja ruglið upp. Eftir hálf ár er allt búið, lúðapopparar skríða aftur í illalaunað djobb og peningarnar sem fóru í hæpið eru afskrifaðir. Þessi bransi, vonandi deyjandi bransi, er bókstaflega vél sem gleypir unga poppara, tyggir þá og spýtir út. Popparar ganga stóreygðir í vélina að því þeim langar svo að meikaða. Öllu þessu er lýst í nákvæmum smáatriðum og mjög trúverðugum af því höfundurinn var sjálfur A&R maður lengi. Það er neimdroppað í plötunni eins og nótúmorró. Mánuðir ársins eru notaðir sem kaflaskipting. Í hverjum mánuði er eitthvað band eða poppari sem á að meikaða, samkvæmt hæpinu. Ruglið í viðkomandi útgefanda er innan sviga. Gene ("þetta verður krossóver band!"), 3 Colours Red ("önnur eða þriðja platan þeirra mun seljast í milljónum eintaka. Ég er viss um það" - Alan McGee), Gina G ("hún mun þróast á sama hátt og Madonna. Þetta er dansplata áratugarins"), D*Note ("Þau munu spila í Royal Albert Hall. The sky's the limit"), Sylvia Powell ("platan hennar verður rosalega vinsæl!)", The Ultrasound ("það er ljóst að þetta band verður á svæðinu miklu lengur en 18 mánuði..."), Jimmy Ray ("bæði nútímalegur og retró"), Echobelly ("hvílíkt gæðaband"), Asian Dub Foundation ("ég hefði verið geðbilaður að gera ekki samning við þá"), Peach ("þetta er tímalaus plata, algjör hittari"), Superstar ("samband okkar hjá fyrirtækinu við bandið er til framtíðar..."), Headswim... Nokkuð er talað um Drum'*'bass listamanninn Rage, sem greinilega er Goldie. Rage er fáviti og er lýst svona: "He looks like he's covered himself in glue and charged headlong through an outlet called Rich Black Bastard." Ég ætla ekki að skemma fyrir væntanlegum lesendum, en Steven gerir að lokum góða hluti með Spice Girls eftirlíkingunni Songbirds. Þetta er góð bók, en ekki frábær, til þess er söguþráðurinn of mikil klisja, en hún lýsir fávitabransa á upplýsandi, trúverðugan og sprenghlægilegan hátt. Þú munt ekki líta poppbransann sömu augum eftir þessa bók.

19.04.09 - Einmitt, Bjarni

Ég kalla þessa mynd „Einmitt, Bjarni“.
---

Norðurturn Smáralindar, 15 hæða verslunar og skrifsstofuhúsnæði, er einmitt það sem vantar núna. Enn eitt útibúið fyrir Húsasmiðjuna, Toys R us, Bónus og rassgatið á mér. Bygg eru smá byrjaðir á turninum, komin beinagrind fyrir tvær hæðir, mér sýnist það hafa verið eins mánuðum saman. En það verður náttúrlega að virkja eitthvað forljótt fljótadrasl strax og setja niður álver oná dauðar heiðargæsir svo hjól atvinnulífsins geti snúist aðeins meira og þessi helvítis turn fái risið. E þageggi? Ég meina, þessi fljót renna bara til sjávar hvort eð er, engum til góðs. Við viljum turninn!  Já, og allt hitt sem Bygg eru með í vinnslu (sjá hér). Og svo náttúrlega allt hitt sem öll hin byggingarfyrirtækin eru með á prjónunum krönunum. Og tónlistarhöllin auðvitað. 

Stolt þjóðar verður ekki sannfærandi nema það séu glæsibyggingar til að bakka það upp. Þetta veit fólk. Persónulega hefði ég fílað betur að "álfhólinn" sem Frakkinn Jean Nouvel lagði til hefði orðið fyrir valinu, en ekki þetta smeðjulega góðærislúkk. Álfhóllinn hefði verið spes. Við verðum að vera spes til að einhver nenni okkur.
---
Ég mæli með Kryddlegnum hjörtum, dúndurfínum veitingarstað á Skúlagötu. Þar er heilsufæði gert frábært á bragðið með nýjum trikkum. Heilsumatur vill allur smakkast eins, eins og pappi, en hér er nýtt bragð og gott. Fyrir 1390 kall (ódýrt!) var hægt að fá sér 4 súpur og af mjög fínum salatbar. Ég fékk mér sjávarréttasúpu og kókoskjúklingsúpu. Báðar voru frábærar. Ég bölvaði liltum maga mínum fyrir að fyllast svona fljótt. Mig hefði langað til að éta miklu meira. Fer bara aftur. Fjórar stjörnur!
--
Hér á heimilinu hefur Grísk jógúrt frá MS komið sterk inn. Eins og skyr, kannski bara betra! Besta nýjungin frá MS í áraraðir. Fjórar stjörnur!
---
Góður dagur í Kolaportinu í gær. Keypti tvær bestu plötur Megasar á vinýl, meistaraverkin Millilending og Fram og aftur blindgötuna. Mér líður aldrei eins mikið sem Íslendingi en þegar ég hlusta á þessar plötur. Orginal textainnsert fylgdu með og allt er í algjöru toppstandi. Keypti líka fyrstu plötu Stranglers, ævaforna Duane Eddy plötu á 100 kall og Dömufrí með Dúmbó og Steina! Því ver og miður er á Dúmbóumslaginu ekki sögð saga, hinum megin eru bara myndir af hljómsveitinni og svoleiðis. Ég er að reyna að muna hvaða umslög eru svona aksjón-umslög, með sögu sagðri með tveimur myndum, einni framan á og einni aftan á. Gengur illa að lókeita þetta. Veit einhver hvað ég er að tala um og getur nefnt dæmi?

18.04.09 - Halló apabróðir
Í síðasta Bakþanka talaði ég um að Ísland hefði aldrei verið á leiðinni að verða Dubai norðursins. Ég velt fyrir mér hvað ég ætti að nota þegar ég var að skrifa þetta, Lúxemborg norðursins, Cayman norðursins... en valdi svo Dubai af því Dorritt var eitthvað að röfla um það að við ættum að stefna að því að verða Dubai norðurins. Líklega var þetta rugl hjá mér því við erum nú á hraðri leið með að verða Dubai norðursins, eða Dubai að verða Ísland miðbaugsins því Dubai ku við það að fara á hausinn. Ég fékk email frá Gunnari Hafsteinssyni þessu að lútandi með mjög áhugaverðum línkum: 
Varðandi síðustu bakþanka, Sigur raunveruleikans, þar segirðu:
Við vorum aldrei í alvörunni að verða Dubai norðursins
Má ekki frekar segja að við séum Dubai norðursins? Bæði löndin fjármögnuðu vöxt með ofurlántökum sem keyrðu löndin í kaf (amk annað landið er farið niður, hitt fylgir fast á eftir). 
Bæði löndin notuðu innflutt vinnuafl til að byggja upp skýjaborgir, sem standa margar hverjar eftir auðar og yfirgefnar. Aðbúnaður vinnuaflsins var til skammar (þó gengum við ekki eins langt í þrælavæðingunni og Emíratarnir í Dubai). Allir vissu um ömurlega aðbúnað verkafólksins en leiddu það hjá sér: mæli með þessari rosalegu grein.
Á meðan við höfum Höfðaborgina, Krepputorg og tómu úthverfin til að minna á geðveikina sem ríkti hér hafa bræður okkar í suðri Pálmatréð, World Islands og Burj Dubai - Sjá.
Aldrei nokkurn tímann hefur mig langað til Dubai. Myndir þaðan hafa eiginlega fyllt mig viðbjóði. Á meðan Las Vegas er lokkandi sturlun er Dubai bara sturlun. Afhverju fer maður alltaf að tengja svona við Biblíuna í huganum? Sódóma Gómorra eitthvað. Jæja fokk. Það er náttúrlega ekki í lagi með þennan blessaða homo sap. 

Dúmbó og Steini - Halló apabróðir
Og talandi um. Mér barst til eyrna hressandi stuðlag með Dúmbó & Steina með sósíalískum stuðtexta um apa, mannapa, arðræningja, mengun og kjarnorkuvá. Ég sver að ég hafði aldrei heyrt þetta lag þegar ég samdi Homo Sapiens um apana í skógnum og það allt. Þeir Dúmbó og Steini virðast hafa verið í sömu hugleiðingum þegar þeir sömdu lagið Halló apabróðir á seinni plötu sína Dömufrí (kaupana um leið og ég séana). Það var Steinar Records sem gaf út árið 1978 og umslagið er stórglæsilegt eins og sjá má. Ég velti því fyrir mér hvort þetta sé eitt af þessum seventísumslögum þar sem saga er sögð. Framan á er eitthvað að gerast og hinum megin er þetta eitthvað búið að gerast. Aftan á þessu umslagi gæti t.d. gellan og gaurinn sem gapir að henni verið komin upp í rúm eða eitthvað álíka (svo karlrembískir hugarórar mínir fái nú að blómstra um hríð). Hér er mynd af Dúmbó og Steina frá svipuðum tíma. Steinn Skaptason er vinsamlegast beðinn um að telja upp meðlimaskrá í gestabók frá vinstri til hægri. 

Öpdeit: Haukur Júlíusson skrifar: Það er best að taka ómakið af honum Steini og nefna Dúmbómennina. 
Ystur til vinstri er Reynir Gunnarsson(sax) Trausti Finnsson (bassi /hljómborð) 
er næstur, þá Finnbogi Gunnlaugsson(gítar) Ásgeir R. Guðmundsson 
(hljómborð-hljómsveitarstjóri) Sigursteinn Hákonarson söngvari er í miðju ,þá 
trommuleikarinn knái Ragnar Sigurjónsson, síðan Jón Trausti Hervarsson(sax) 
ystur til hægri er Brynjar Sigurðsson (bassi). Textann "Halló apabróðir" samdi 
Bjartmar H. Hannesson þá bóndi á Hreðavatni en síðar á Norðurreykjum í 
Borgarfirði. Dúmbó sextett og Steini/Guðmundur var býsna merkileg sveit síns 
tíma. Átti ma stóran þátt í að gera Glaumbæ því fyrirbæri sem hann varð. 
Bókin góða "Eru ekki allir í stuði" skautar fremur létt yfir feril þeirra. Lítirð er til
af upptökum frá ferlinum. Jón Trausti Hervarsson samdi þátt um 
hljómsveitina sína "Saga hljómsveitar Dúmbó 1961-1968" og birti í Árbók 
Akurnesinga 2004. Útgefandi, Uppheimar Akranesi. Kaupa strax og lesa.!!!
(Ég á þessa bók. Myndirnar koma þaðan! Það er skautað létt yfir margt í Eru ekki allir í stuði? Og sumt fer ekki einu sinni á skauta. Enda stóð hvergi að þetta væri hin endanlega bók um íslenska tónlist!)

17.04.09
Ekki er traustvekjandi þegar enska er léleg á matseðlum veitingastaðum. Humarskipið er til dæmis með í boði eitthvað sem heitir Grilled Vikingstake glanced with mustard, eða Grillaður víkingastaur litinn á með sinnepi. Nammi namm! 
---
Þegar ég bjó á Álfhólsvegi í Kópavogi kom það einu sinni fyrir að útlendingur skrifaði á umslagið sem hann sendi mér: Álfholuvegur, Lopavogi. Mér fannst þetta svaka sniðugt og útskýrði fyrir honum í næsta bréfi, hey, you wrote Elf hole road, Woolbay, instead of Elf hill road, Pup of seals bay, which is correct. Ég held að aumingja maðurinn hafi ekki fattað neitt um hvað ég var að bulla.
---
Annað kvöld hefst þáttaröðin Alla leið þar sem Páll Óskar fer yfir Eurovisionlögin í ár með mér, Guðrúnu Gunnars og Reyni Þór, Reynsaboy. Mér fannst nú satt að segja meira spunnið í lögin í fyrra. Þá voru alveg nokkur sem voru ekki glötuð, mér fannst Tellier æði, og það mátti hafa gaman af því bosníska, búlgarska, spænska og einhverjum fleirum. Nú er þetta heldur rýrt í roðinu og vantar allt almennilegt flipp í þetta og öðruvísilegheit. Þetta er alltof hefðbundið í ár.

16.04.09 - PPPP!
Loksins er eitthvað stuð í þessu. Popppunktur snýr aftur á Rúv í byrjun júní! Við Felix tökum eina syrpu enn, þá fimmtu. Þetta er auðvitað búið að vera á Skjá einum síðan amma var ung og símapeningar runnu sem blóð um æðar hennar. Fyrst vann Ham 2002, þá Ensími 2003, næst Geirfuglarnir 2004. Í Stjörnumessu 2005 komu Milljónamæringarnir á óvart og unnu Geirfuglana. Ég er búinn að vera með þetta einn á Rás 2. Í fyrra sigruðu rótarar feðga í æsandi lokaslag. En nú er sumsé á döfinni fyrsti alvöru Popppunkturinn síðan 2004. Það er haugur af nýjum böndum kominn fram sem við Felix munum fá til leiks, Sprengjuhöllin, Ingó og Veðurguðirnir, Hjaltalín... Nokkrar eldri sveitir liggja enn óbættar hjá popppunktsgarði, Egó, Sigur Rós, Bang Gang og múm svo einhverjar séu nefndar. Þetta verður gríðarlegt!
---
Maður verður uppfyrir haus næstu vikur. Er að dæla inn í túristabókina Top 10 Reykjavík, Iceland, and the Icelandic Way, sem Sögur gefur út í sumar. Ég veit orðið allt um allt í Rvk og nágrenni. Sé því ekki fram á að geta spilað nýja inniheldur... efnið læf fyrr en í júní eða eitthvað. Platan er nú til í bæði 12 tónum og Smekkleysu og náttúrlega í póstverslun Erðanúmúsik. Geðveikt góð plata!
---
Þegar ég hugsa um lífeyrissjóðsmál sé ég sjálfan mig fyrir mér, gamlan og nánast kominn í gröfina. Þess vegna forðast ég að hugsa um lífeyrismál. Held þetta kerfi mætti vera betra samt. Ég á einhverja aura hér og þar, í lífeyrissjóði bankamanna og VR og eitthvað. Auðvitað ætti að vera hægt að sameina þetta allt í einn pott. Svo var tuðað í manni á fullu að leggja í séreignarlífeyrissparnað, eins og maður hefði eitthvað efni á því. Aðalsellið í þeirri möntru var að atvinnurekandinn myndi leggja á móti í hauginn. Að lokum lét ég undan og samþykkti svona díl. Sem betur fer hætti ég í vinnu og því datt þetta dæmi upp fyrir eftir nokkrar greiðslur. Var samt kominn með 73 kall í sjóðinn. Þegar ég athugaði þetta áðan hafði dæmið rýrnað í 58 kall. Og ef ég tek þetta út núna eins og er víst hægt, ö, vegna "sérstakra aðstæðna", þá er tekinn skattur af þessu og ég veit ekki hvað, svo ég fæ 37 kall út úr þessu. Frábær díll! Not.
---
Reykjavík er í rúst af því að heimskreppan hristi draumóramenn upp af óráðinu og yfirdráttarheimildin rann af þeim. Draumóramennirnir sáu fyrir sér nútímalega æðislega steindauða glerborg, en nú ríkir hjallastefnan, grotnandi hjallastefna og hálfbyggð skrýmsli. Bakþankinn í dag fjallar um þetta - Sigur raunveruleikans. Ef það væri hægt að hafa myndir með Bakþönkum hefði ég til dæmis getað haft þessa hér með:

15.04.09 - Ísfólkið
Þá er þetta páskarugl loksins búið. Maður át eins og kreisí og gerði mest lítið. Keypti ís og fór í sund. Í Vesturbæjarísbúðina kom gothara-gengi og keypti sér ís. Ég sá ekki hvernig ís gothararnir keyptu. Einhver goth ís, væntanlega. Í Álfheima kom Gunnþór í Q4U og keypti sér ís með súkkulaðidýfu. Ekki mikið pönk í þessu, sagð'ann. Ef gamalt pönk hefði brotist fram hefði hann væntanlega átt að klessa ísnum í hausinn á sér. Hann sagði að Q4U-kombakk væri handan við hornið í haust. Fjölskylda mín gengur annars undir nafninu Ísfólkið því bæði börnin mín sjást nú í auglýsingaherferð Kjöríss. Ís! Já, Ís! Og vatn! Vatn! Ís og vatn, það er það besta við Ísland. Og hættu svo að væla. Farðu frekar í sund og fáðu þér ís.
 

12.04.09 - Varúð: Páskaeggjasukk!!!

Um daginn bar ég hér saman austurlensku búðirnar Mai Thai og Asian og taldi Mai Thai skara fram úr í vöruúrvali. Eftir heimsókn í Asian í gær kemur á daginn að úrvalið er álíka. Búðin var bara tóm síðast þegar ég fór, en nú er ný sending komin í hús. Keypti mér m.a. geðslegt snakk, Trendy snack, búið til úr hrís og þara. Það var ekki nógu sértækt á bragðið, því miður. Mér fannst ég þó mjög trendí þegar ég var búinn að gófla þessu í mig. 
---
Hún var fín myndin um Liverpool-ferðina í gær á Rúv. Ætli maður hefði ekki skellt sér með hefði maður vitað að þetta væri síðasta gigg Hljóma. Á sínum tíma kom tvennt í veg fyrir að ég færi. Var nýkominn frá Belgrad úr Eurovisionruglinu og hafði farið með Bigga í Bítlaferð til Liverpool árið áður. Bítlafræðin hafa yfir sér mikinn trúarblæ. Gædar benda á staðsetningar og fólk fer að grenja inn í sér við að hugsa um allt bítlið sem grautast í hausnum á því. Fallegt. Aldrei að vita nema maður skelli sér aftur til Liverpool í frekara pílagrím. Er þó engan veginn æstur yfir öllum þessum væntanlega rímasteru útgáfum af Bítlaplötunum. Hvað þá þessum væntanlega tölvuleik. Hér er hinsvegar góður Bítlalínkur: Beatles anecdotes.
---
Það er vel til fundið hjá Rúv að sýna Áramótaskaupið 2006. Djöfull vorum við full í gær. 
---
Eina góða við Feisbúkk er að maður getur stundum fundið myndir af sjálfum sér. Hér er t.d. falleg mynd, ungur maður á Borginni 1992, 27 ára og því á leið í gröfina ef klisjulegustu klisju rokksins hefði verið fullnægt:

11.04.09
Amerískum smekk er nú vel sinnt í búðum innanlands. Öðlingarnar í Hagkaupum hafa tekið inn nýjan skammt af rótarbjór og bjóða nú A&W dósir eins og ekkert sé sjálfssagðara. A&W er "Coca Cola rótarbjórsins", eins og ég hef áður tuðað um. Þá er hin nýopnaða verslun MegaStore í Smáralind amerísk út í gegn með gúmmilaði eins og tootsie rolls og eitthvað. Fann þar svo sem ekkert sem ég var sérlega spenntur fyrir, en það var allt troðið þarna, fólk í verslunarham, enda skjár fremst sem segir til um verð dagsins. Fólki líður því eins og það sé að spara og það eru fleiri en ég ginkeyptir fyrir amerískum smekk.
---
Það er ekkert nema göngutúrar og sund þessa dagana. Ég er að skrifa túristahandbók um Rvk og Ísland og þarf stundum að tékka á stöffi. Bókin verða eintómir topp 10 listar um hitt og þetta á Íslandi, t.d. top 10 Reykjavík on foot, sem ég hef verið að rannsaka í. Við eigum fullt af ógeðslega flottum stöðum til að labba í og á meðan veðrið er gott þurfum við ekki að kvarta. Umhverfið, náttúran, er það sem við eigum skuldlaust (ennþá), og m.a.s. innan borgarmarka er allt vaðandi í góðu stöffi. Til dæmis Grótta, það er dúndurflott pleis. Það var háfjara og hægt að rölta út í eyjuna. Neðan við hjallinn og borholuna er umhverfisverkið Kvika eftir Ólöfu Nordal, sem er fótlaug með heitu vatni. Hinn daginn varða Elliðaárdalur með sínu stöffi. Sá græna tjörn sem er þarna, spúkí nokkuð, en krakkahálfvitar voru búnir að tjóna hana með helvítis kroti á klettaveggi. Pappakassi og skór möruðu í hálfu kafi. Nú er lag fyrir allsherjar tiltekt í Rvk. Atvinnulausa fólkið ætti að fara í galla með skrúbb og taka borgina í gegn. Reykjavík hreinasta borg í heimi er takmark sem hægt er að standa við. Ókei, við erum kannski blönk, en það er ekki subbulegt heima hjá okkur, gæti slagorðið verið. Að hugsa sér: Í stað þess að mara í þunglyndi heima hjá sér og blogga um spillinguna í Sjálfsstæðisflokknum (eða eitthvað álíka upplífgandi) væri hægt að vera úti að tína upp rusl.
---
Hvað varð eiginlega um alla vondu íslamistana sem öll umræða snérist um fyrir svona sirka ári? Manstu ekki, þessa sem ógnuðu vestrænum gildum? Ég spyr af því ég var að horfa á Flugdrekahlauparann í gær. Ágætis mynd. Uss, hvað Talíbanar eru vondir. Allt síðskeggjaðir kvenhatandi ríðírassistar. Talíbanar eru afkvæmi jólasveinsins og Satans. Eva Joly er hinsvegar afkvæmi Vigdísar og Charles Bronson. 

10.04.09
Gleðilegan Föstudaginn langa. Sólóplatan Dr. Gunni inniheldur... er komin út. Platan inniheldur... 18 lög. Ég myndi segja að þetta væri mitt "hvíta albúm" - vegna fjölbreytninnar, sjáðu til, ekki að ég sé svo geðveikur að ég haldi að ég eigi eitthvað í Bítlana. Lögin eru þessi: Hlið A: Elskahata (geðveikt pönk), Svo 2007 (hljómsveitin Start), Satan konungur apanna (Satan að hafa mök við Spilverkið), Píkan á Britney Spears (Baby you can drive my car), Síðasta fylliríið (raunsönn lýsing á mínu fyrra lífi), Bubbi Morthens (tribjút), BSÍ (kjammakántrí), Góða nótt (Þórbergur í Violent Femmes). Hlið B: Prinsessan mín (iðnaðarpopprokk), Verum góð við hnakkana (gleðipopp), (næstu sex lög eru hluti af medlíinu "Dr. Gunni í bíl":) Ófæddar (Big black), Dyntótt (Obladí), Ungakaka (Hendrix að hafa mök við Yoko Ono í hakkavél), Við Hekluskiltið ("Travelling Wilburys á sterum" - Biggi Baldurs), Einbreið brú (singalong), Blindhæð og brú (Xtc), Við hittumst í dauðatjaldinu (raunsætt þunglyndi, smá Brian Wilson) og að síðustu: Skipulagðri leit hefur verið hætt (Morricone og ðe theme from Hildur. Þess má geta að þetta síðasta lag á plötunni er þriðji og síðasti hluti "verða úti"-tríólógíunnar. Hin tvö áður útkomnu lögin í þeirra tríólógíu eru lögin Öxnadalsheiði og Heimavistin Helvíti.) --> Góða skemmtun og plís ekki nappa!

Platan fæst einnig í 12 tónum, en þar er opið í dag, Föstudaginn langa, frá kl. 13 til 18.