17.04.08
Ég var að gera uppgötvun: Ég hef ekki séð eina einustu frétt um París eða Britney í allavega mánuð! Hvað gerðist eiginlega? Kreppan?
---
Hvað ætli hafi verið sagt OMG í mörgum öðrum húsum en heima hjá mér þegar Ásdís Rán og mamma hennar voru í Kastljósi í gær?
---
Þreyttasta klisja hins þreytta afþreyingargeira Hver-drap-líkið-sjónvarpsþáttanna er sú að allir geðveikir morðingjar séu með blaðaúrklippur upp á vegg hjá sér. Brjótist löggan inn í hús og í einu herberginu eru úrklippur (ekki verra að andlit hafi verið afskræmd á myndum) er pottþétt að morðinginn er fundinn. Þessi klisja spratt upp í klisjubankanum Mannaveiðum, þeirri frekar slöppu seríu. Geðveiki morðinginn með úrklippur á vegg í sumarbústaðnum. Slappt. Ég missti reyndar af þætti nr. 3 svo ég er kannski ekki dómbær, en fannst það ósannfærandi mótíf að einhver nennti að drepa sig fyrir Höllu Vilhjálms, eða hvaða stelpu sem er, þannig séð.
---
Enn er Okursíðan funheit. Nú ætlar fréttastofa Stöðvar 2 að birta eitt dæmi á viku, sem er ágætt, gefur þessu meira vægi. Einhver 14 ný dæmi komin síðan í gær, leðurhulsa á 66.000 og allskonar geðveiki.
---
Pabbi minn, Hugh Hefner er Bakþanki dagsins. Hér eru myndirnar af gamla sóðaseggnum Hefner og stelpunum sem ég minnist á. Ítarefni við greinina gæti verið myndin af pabba sem hefur haft hausaskipti við Hugh. Ég vona að systkini mín og aðrir ættingjar fyrirgefi mér það tilfinningalega uppnám sem þessi mynd getur valdið þeim, og treysti því í lengstu lög að gamli maðurinn fari nú ekkert að tölvuvæðast og skoða þessa síðu. Svona lítur hinn óhugsanlegi hliðarraunveruleiki út:

---
Í upptalningu minni á góðum Euro-lögum gleymdi ég vitanlega að telja upp hinn franska Sebastien Tellier, en hann er nú svo sem úr annarri deild en hitt liðið þarna - löngu búinn að meikaða og svona. Hef verið að hlusta á plötuna hans, Sexuality, sem er nokkuð góð. Önnur góð er Goldfrapp nýja. Black Keys platan Attack and Release vinnur líka stöðugt á, ég verð hreinlega að setja hér inn uppáhaldslagið mitt á henni. Það er Dangermouse sem pródúserar og þetta er miklu betra stöff en nýja Gnarls Barkley sem líður fyrir máttleysi og blóðskort.

The Black Keys - Strange times

Hér er fréttaskýring um hljómsveitina. Þetta eru blúkollar Akronbúar.

16.04.08
Hvaða íslenska snilldarlag má hlusta á hér? Rétt svar í gestabók takk. Sá fyrsti til að svara rétt fær í verðlaun hálftíma "alnudd" í boði Femínistafélagsins. Stígðu inn í tölvuheiminn, komdu og vertu með. (Skuggahliðin með Box - Kristinn Pálsson og Hinrik "þór" fá báðir alnudd).
---
Með þessu áframhaldi fer að verða fullt starf að sjá um Okursíðuna. Maður ætti kannski að reyna að fá að vera í boði 10/11 og Lyfju? Nei, grín. Funheit 10 ný dæmi birt í dag. 
---
Þeir hjá Brimborg mega eiga það að vera nokkuð á tánum og sjálfur forstjórinn sendi mér (og höfundi okurs #398) heillangt útskýringabréf sem ég birti auðvitað í heild sinni fyrir neðan okrið (sjá okur #398). Þegar eitthvað dæmi kemur um okur frá Brimborg fæ ég umsvifalaust póst frá þeim og er beðinn að gefa upp kontakt á þann sem sendi. Málið er svo hreinsað upp eftir bestu getu, skilst mér. Enda skrifar herra forstjórinn mér: Varðandi það að ég, forstjórinn sjálfur, sé að standa í þessu þá vil ég upplýsa þig um að í hverri viku sit ég gæðaráðsfund. Þar er farið yfir allar ábendingar, allar kvartanir og öll hrós sem berast fyrirtækinu í gegnum vefsíðu þess og allt er skráð og öllu er svarað. Ég met svör starfsmanna við kvörtunum, greini þau og geng úr skugga um að reynt sé að komast að rót vandans. Þetta ferli er skráð hjá okkur skv. ISO 9001:2000 gæðastaðlinum sem Brimborg hefur eitt bílaumboða. Þetta hjálpar mér einnig að skynja gæði þjónustunnar í öllum deildum og gerir mér kleift að bregðast við, þróa og bæta.
---
Ég skrifaði honum til baka og sagðist vona að þeir héldu ekki að ég væri að leggja sig í einelti. Ég meina Ford (Mustang) og Volvo? Kommon, klassa stöff. Svo kom auðvitað enn eitt okrið, þetta númer 429 og þurfti auðvitað líka að vera um eitthvað frá Brimborg. Þetta er reyndar frekar óljóst dæmi en ég læt það fljóta með enda kemur það inn á myntkörfukjaftæðið. Aumingja konan virðist ekkert skilja hvað hún er búin að koma sér út í. Þetta á eflaust við um fjölda fólks sem horfir nú upp á lánin sín hækka og hækka. Mitt helvítis bílalán hækkaði einmitt um 10.000 kall milli mánuða í kjölfar gengisfellingarinnar miklu og maður bara sýpur hveljur og huggar sig við að hafa ekki asnast til að láta plata sig út í fleiri myntkörfulán. Ætli enginn bjóði annars upp á mynkörfulán í frönskum frönkum, þýsku marki og ítalskri líru? Djöfull væri það góð "karfa".
---
Eftir fyrsta Lost er ljóst að maður gapir á þetta allt saman enn og aftur. Hver fann annars upp á hinum slappa "Lífsháska" sem reynt er að kalla þáttinn á íslensku? Það kallar þetta enginn Lífsháska, allir Lost. Auðvitað átti þetta bara að heita Lost, enda góð og gild íslenska, eða kannski "Týnd" til að vera seif. En "Lífsháski", það er bara rugl. Sá líka brot af endursýndum Svalbarða og leist vel á. Meira meinstrím en maður átti von á, minna súrpungaflipp en við var að búast, enginn Barði að hrækja á gólfið eða Þorsteinn að móðga gestina eða að henda í þá lifandi hænu upp úr þurru. Nú er sennilegast tími meintrímsins runninn upp. Súrheit búin að vera í bili. List fyrir fólkið, Næturvaktin, Sprengjuhöllin, Svalbarði. Eitthvað sem fólk nennir að sjá og heyra. Massinn. Bara hið besta mál þótt hitt lafi auðvitað með. Stöff þarf samt ekki endilega að vera eitthvað æðislegt þótt það sé súrt og/eða artí og bara fílað af "útvöldum". En það er það samt oft. Fóstbræður, David Lynch...
---
Ég vissi ekki að Davíð Lynch væri að vinna hjá íslenska Rauða krossinum en hann er það samt. 
---
Palli hefur munstrað mig í Eurovisionþáttinn sinn Alla leið. Verð þar með honum, meistara Reynsa boy og Guðrúnu Gunnars að þrugla um 43 Eurovisionlög. Eitt mesta rokk sem ég hef komið nálægt! Og ég gæti jafnvel sokkið enn dýpra í Eurovisionpyttinn því það er útlit fyrir að ég mæti til Belgrad í herlegheitin á vegum Fréttablaðsins. Upplifi þetta "gay pride á sterum" (Bó) á eigin skinni. Það eru mörg ágætis lög í þessu í ár. Nei ég meina það! 
---

Jæja, ókei, kannski ekki "mörg". En ég bendi á framlag Bosníu-Herzegóvínu. Þetta er mjög óvenjulegt lag, hvað þá eurovisionlag, og ég er alveg að fíla þetta. Og hvað er málið með sjóið? Vöðvatröll að raka og hæna? Metnaðarfull súrheit - dúse points! 

"Spænski Eiríki Fjalarinn" (eins og ég hef kallað hann í Eurovionhorni mínu í Fbl) er líka alveg að gera sig. Þetta er frábært lag sem maður heyrði mikið á Spáni enda gríðar vinsælt þar um þessar mundir. Dúse points!

Alltaf gaman þegar austurblokkin vill vera töff og kúl. Búlgaría og kúlheit hafa kannski ekki alltaf átt samleið en Deep Zone og Balthazar eru komin til að breyta því. Gott lag! Dúse points!

En svo leka náttúrlega leiðindin af mjög mörgu þarna.Gomma af misleiðinlegu formúlupoppi, "þjóðlegum" leiðindum og ballöðuvæli. Kannski fara Aserar allan hringinn með sínu innleggi, dramatísku óperuvælrokki þar sem barátta góðs og ills er sett fram á leikrænan máta af þessum töppum hérna tveim að ofan. Azerbaijan er að taka þátt í fyrsta skipti (eins og San Marínó) og kannski eru menn ekki alveg búnir að ná konseptinu þar. Ég er samt viss um að allir í Azerbaijan halda að þeir vinni þetta í ár með þessari gríðarmiklu tónsmíð og stólpavandaða videói.

15.04.08
Okursíðan fékk metskilaboð í gær, 26 okurdæmi, þar af 19 sem rötuðu inn á síðuna. Hitt var aðallega um 10-11 og eins og ég segi þá eru takmörk fyrir því hvað hægt er að skrifa um okrið þar. Líklega var það þessi frétt á Vísi sem kom skriðunni í gang. Þarna eru margar skemmtisögur af okurbúllunni Ísland. T.d. ein góð um gönguskó og önnur þar sem stúdent hyggst dreifa flýerum framan við 10-11 á stúdentagörðum til að fæla neytenda-dofna nemendur frá okrinu. Einnig er öppdeit á Brimborgar-okri #398 og teppahreinsunarokri #387, en það gamla okur hefur nú færst hingað.
---
Fólk virðist almennt ekki hafa vitað af þessari okursíðu þótt hún sé meira en hálfsárs. Eins virðist fólk almennt ekki vita af þessari hérna bloggsíðu minni, það hringdi til dæmis einhver náungi af Útvarpi Sögu og sagði að okursíðan væri nú einskonar blogg og því vildi hann tala við mig í bloggútvarpsþættinum sínum í fyrramálið kl. 7:30 á Sögu. Já, en ég er nú búinn að vera með bloggsíðu í meira en 7 ár, reyndi ég að segja, en hann hlustaði ekkert á það og fannst okursíðan bara málið.
---
En það er skelfilegt hvað allt er að hækka hægt og bítandi (nema kaupið auðvitað) og ég fæ mörg dæmi um þjöl-á-endaþarmslegar hækkanir sem kaupahéðnar hafa stokkið til að framkvæma þegar kreppan byrjaði (fyrir hvað, mánuði?). Sjálfur tók ég eftir því á Boost barnum að búið er að hækka allt um sléttan 100-kall svo nú kosta skyr-boostin 590-690-790. Við þessu er bara eitt að segja: fokk jú og þitt boost.

14.04.08
Allt hækkar nú nema kaupið mitt. Þetta er allt Davíð fokking Oddssyni að kenna (skilst mér) sem situr eins og einhver kóngur á "Svörtuloftum" (eins og nú er í tísku að segja) og "gerir bara eitthvað" af því hann er svo geðveikur og kann ekkert að vera bankastjóri. Er ekki hægt að koma þess flykki á eftirlaun fyrst hann er þessi skaðvaldur? 

Nei nei, þetta er bull, kaupmáttur hefur vaxið gríðarlega á Íslandi síðustu árin svo fokk jú. 

Já, en... 

Æi þegiðu!

(Þetta var stutta útgáfan af "umræðunni").
---
Okur #400 hefur borist frá fótumtroðnum almenningi. Það reyndist vera tannþráður. Í rúmlega hálft ár hafa okurdæmin komið í hús og ég samviskusamlega sett þau inn. Set reyndar ekki allt inn, margt er endurtekið efni og sumt hreinlega ekkert okur (þannig séð). Helsti lærdómurinn er þessi:

* Ekki versla í "klukkubúð" nema þú endilega viljir láta okra á þér. Okurdæmi um að þetta eða hitt sé svo ógeðslega dýrt í 10-11, 11-11, eða hvað sem þetta heitir, verða varla birt oftar. Verslaðu í Bónus ef þú vilt láta okra minnst á þér. Þetta vita allir.

* Bankarnir eru siðlausar okurstofnanir. Fyrir 20 árum fóru vinjettuhöfundar í fangelsi fyrir að vaxtaokra minna en það sem þykir eðlilegt að smyrja á yfirdráttarlán í dag. Lifi einkavæðingin. Svo geta bankarnir lengi fundið allskonar kostnað og gjöld til að smyrja á. Þetta er samt allt þér að kenna sjálfum/ri. Það var víst enginn að neyða þig til að kaupa þér pallbíl og flatskjá (eða búa ekki í kassa á Hlemmi, þannig séð...) 

* Dæmi um okur á Íslandi miðað við verð í USA (eða í öðrum löndum) eru vinsæl en spurning hvað þau hafa upp á sig. Já já, það er allt dýrast á Íslandi. Við vitum það. 

* Lyfja og flest apótek eru okurapótek. Lyfjaver okrar minnst á þér. Verslaðu þar.

* BT er okurbúlla miðað við Elko og fleiri staði.

* Flest kaffihús eru okurbúllur. Kaffitár og Te og kaffi koma ekki vel út. Dýrt kaffi, fokdýrt bakkelsi. Að fara út að borða er svo lúxus sem maður getur bara leyft sér í bjartsýniskasti.

* Bílaumboð eru rekin af hundum heljar. Brimborg kemur sérlega illa út. Fáðu þér hjól.

* Bakarín Jói Fel, Bakarameistarinn og Kaffi Konditori eru okursjoppur. Ég mæli með Mosfellsbakaríi og einhverjum lummulegum lókalbakaríum. Skárra þar.

Annars segi ég bara "neytendur höldum vöku okkar" (sem er ofurhallærislegt því það er meira töff að þykjast svo fjáður að það sé allt í lagi þótt það sé okrað á manni) og endilega haldið áfram að senda okurpósta þótt það megi alveg hafa á bakvið eyrað að sleppa því að endurtaka gamlar lummur.

13.04.08

Tengdapabbi á hús í námunda við Torrevieja á Spáni. Vorum í fjölskó í 10 daga. Tvennt fannst mér eftirtektarverðast. Appelsínu og sítrónutré eru á hverju strái. Stalst til að grípa appelsínu af grein. Hún var góð. Fimm kíló af appelsínum kosta 2 Evrur í búðinni. Sá í Hagkaupum áðan að kílóið kostar 218 kall. En það vaxa náttúrlega engar appelsínur hér. Hitt sem var skrítið eru hórurnar sem húka þarna á mörgum hringtorgum og útskotum. Ég var dáldinn tíma að spá íðí hvað þessir föngulegu kvenmenn væru alltaf að gera þarna í mínípilsum flassandi túttum framan í bíla. Var hreinlega of fattlaus til að leggja saman tvo og tvo. Tengdó varpaði ljósi á málið. Hver hóra virðist eiga sinn stað og var þar alltaf þegar maður keyrði framhjá. Lítið að gera hjá þeim. Vinnutíminn 9-5 og allar farnar eitthvað annað í eftirmiðdaginn.
---
Skrítinn dagurinn hjá Spánverjum. Allt lokað um miðjan dag (siestan). Eru allir sofandi heima hjá sér? Svo opnaði allt aftur klukkan fimm eða eitthvað og var opið fram á kvöld. Maður var smá tíma að ná þessu tempói.
---
Gaman að skoða alvöru spænskar borgir eins og Elche og Orihuela. Vera þar sem spænskt líf kemur beint af kúnni með gömlum miðbæjum og gömlum kerlingum að sópa og krökkum í skólabúningum í viðstöðulausum. Væri alveg til í að eiga heima á svona ósviknum Miðjarðahafsstað. Mun minna stuð var í þeim hverfum þar sem ensk gamalmenni hafa tekið öll völd. Bara búðir sem selja bakaðar baunir og The Sun, enskt fólk sem virðist komið til að deyja í sólinni að sulla í enskum bjór í spænskri sól daginn út og inn. Svo ekki sé talað um ellibelgina sem siluðust um á golfkerrum endalaust spilandi golf. Og allir með þessi helvítis hundkvikindi. Maður var að ganga um í gúddífíling þegar þessi andskotar komu geltandi á mann í gegnum hliðin. Maður var alltaf hrökkvandi í kút.
---
Í því hverfi San Miguel de Salinas sem við gistum í er allt nýbyggt og ekkert nema Bretar með hunda í endalausu afslappelsi. Fyrsta daginn datt gamalmenni við hliðina niður tröppurnar heima hjá sér (mikið af postulínsflísum á Spáni) og lá hjálparvana og kallaði á hjálp. Við komum til bjargar. Ég fann óbyggt svæði og spókaði mig þar um á göngu innan um maura, plöntur, héra, froska, snigla, drekaflugur og fleira drasl. Á stuttbuxunum. Saup svo því miður seyðið af þessu útstáelsi með útbrotum og kláða það sem eftir var ferðar. Muna: síðbuxur næst.
---
Arroz er einskonar paella, eða kannski er það það sama. Við átum það allavega með hérakjöti og pollo. Hér erum við tengdó við upphaf veislunnar:

Við urðum að panta þetta daginn áður. Átum líka mikið af tapas, wok, kína, indversku og jú neim itt. Maður gerði náttúrlega mest af því að éta og "gera ekki neitt". 
---
Ég fylgdist með "þjóðlífinu" á Íslandi í gegnum netið af gömlum vana eins og einhver vanasjúklingur. Ekkert merkilegt að frétta svo sem. Sá Silfur Egils áðan og það mætti halda að það væri að koma heimsendir. Allir vælandi og skælandi. Hefði náttúrlega verið hagstæðara fyrir mann ef evran væri 80 kall ennþá en ekki 115, en samt er flest ódýrara ennþá á Spáni. Ekki bensínið þó. Fríkað að koma úr 25 stiga sólarblíðu í 0 gráðu slyddu. Velkomin heim!
---
Okursíðan er full af nýju drasli. Svo er eitthvað nýtt í gosinu. Já og svo þarf maður að fara að kíkja eitthvað á Svalbarða. Mér skilst að það sé skíturinn.

02.04.08
Snældusíðan hefur verið poppuð lítillega upp. Þar sem Snælduþættirnir hafa rotnað af gagnagrunni Rúv eru þessir tímamótaþættir nú niðurhalanlegir og neyzluhæfir í hinu frábæra mp3 formi. Einnig er að finna (neðst á síðunni) excel-skjal sem er listi yfir kassettuútgáfur íslenskar sem passa (ekki barna- harmóníku-, trúar- o.s.frv. tónlist). Ef fólk telur sig geta bætt við listann eða lappað upp á hann má það endilega senda mér línu. 
---
Hvað er réttar í stöðunni en að fljúga með einkaþotu á mikilvægan fund um það helst hvort Úkraína og Georgía eigi heima í NATO þegar landið logar í flautandi trukkum, óánægðu fólki með rasssæri, morknandi miðbæ og almennri ringulreið? Fátt! Ég er viss um að allir hætta snarlega að flauta núna. Ég hélt satt að segja að þetta væri aprílgabb, en varla er Haarde með í gríninu? Vá, hvað þetta lið er sturlað. Hvað næst? Einn gúrme-kokkur á kjaft í alþingi af því liðið þarna tapar svo mikið af dýrmætum tíma við að fara að éta á Múlakaffi? Gullklósett og skeinipappír úr silki af því "hrjúfari pappír hefur slæm áhrif á mikilvæga endaþarma alþingismanna"?
---
Aaaarrrrrgggghhhhh!!!! Eins gott að maður er að fara til heitu landanna. Það verður mjög kærkomin hvíld frá þessu helvítis kjaftæði af þjóðfélagi.

01.04.08
Okursíðan fékk fimm okur í gær sem er nú bara það almesta í langan tíma. Sýnir kannski að fólk er vart um sig. Frekar fúlt samt að maður þurfi að vera "var um sig". Eitthvað óheilbrigt við það, nema það sé merki um "heilbrigða samkeppni".
---
Heiða er orðin aðstoðarmaður Atla Gíslasonar. Til hamingju með það. Ég myndi ekki nenna að vera aðstoðarmaður einhvers en það væri ekki amalegt að eiga rétt á aðstoðarmanni. Ég myndi ekki tvítóla við að ráða Gillzenegger sem minn aðstoðarmann. Léti hann píska mig áfram í ræktinni og redda mér ódýrum kjúklingabringum. Hann og vinir hans éta náttúrlega kjúklingabringur í öll mál og væru allir farnir á hausinn ef þeir keyptu þetta á 3000 kall kílóið út í búð. Þess vegna eru þeir með spesdíla við skuggalega kjúklingabringudílera, kaupa kannski 10 kílóa poka á 10-12. þúsund kall stykkið og hafa í frystinum. Með Gillz sem aðstoðarmann kæmist maður inn á kjúklingabringudíler. Svo léti ég hann skrifa fyrir mig greinar í blöðin og svona. Taka einn og einn Bakþanka þegar ég nennti því ekki. Verst að ég nenni bara ekki því kjaftæði og leiðindum sem er óneitanlega fylgifiskur þess að reyna að troða sér á þing. Mitt helsta vandamál er að ég nenni bara ekki að troðast að trogi samtryggingarinnar. Samtryggingarinnar sem skein í glottandi tanngarðinn á í Kastljósi þegar Egill spurði afhverju í ósköpunum þeir væru að fá sér aðstoðarmenn nú á þessu erfiðu tímum. Það var lítið um svör... bara... uh, ég fer að lögum. Ég set horklessu í næsta kjörseðil. Ef ég nenni að mæta.
---
Mapa voru á Kanarí, hittu Guðna Ágústsson og konuna hans á Mannabar og leyst svona ljómandi vel á hjónin. Ég mun hafa komið til tals, Guðni sagði eitthvað um að ég væri "harður" en konan hans sagðist lesa bloggið. Sko bara! Ef Finnur Ingólfsson væri ekki til er aldrei að vita nema maður fengi sér lopapeysu, keypti kind og gerðist Framsóknarmaður. Guðni er allavega súrrealískur sem er meira en hægt er að segja um restina af þessum gapandi sjálftökuuxum.

30.03.08

Á þessum skjálfandi teprulegu tímum er rétt að árétta: Grín má vera ógeðslegt. Það má vera algjör viðbjóður. Það má móðga milljónir. Frakkinn Philippe Vuillemin er hrár og ógeðslegur og tók öll tabúin. Myndaröðin Hitler = SS vakti hvað mestan óhug og málaferli. Þessi (kannski fyndni? – ég er of slappur í frönsku til að vita það) viðbjóður birtist fyrst í menningarritinu Hara Kiri á 9. áratugnum. Bók með dótinu er bönnuð í Frakklandi og á Spáni en má dánlóda á jpg-um. Hérna er blogg um þetta með tengli í góssið. 

Hara Kiri og L'Echo des Savanes voru teiknimyndablöðin sem eitthvað var spunnið í. Fyrir utan Vuillemin var Willem að gera góða hluti. Hollenskur hippi sem hafði ílengst í Frakklandi. Hann eins og Vuillemin vissi að auðveldasta leiðin til að gera allt vitlaust var að hjakka í nasista/gyðinga-deildinni og bæta bara nógu mikið við af klámi og kúk og kjaftæði. Ég bíð bara eftir svipuðu hardkorgríni um múslíma, því satt að segja var danska dótið Sigmund við hliðina á þessu stöffi. Þá mætir skíturinn loksins viftunni og ömmu sinni.
---

Glæsileg síða um baðlaugar og almenningsbaðstaði á Íslandi. Loksins loksins! Algjör snilld. Þessi glæsiaðstaða hér á myndinni er til að mynda Heiti potturinn Rauðumýri en efnainnihald pottsins er meira að segja gefið upp á síðunni. Hér er komin einhver besta síða sem ég hef lengi fundið og síða sem maður mun nota mikið framvegis! 
---
Á okurvaktinni má benda á ostahugleiðingar Gríms og almennar okurhugleiðingar Bobbys. En þetta er allt í lagi: Ingibjörg er mætt og ætlar að redda þessu öllu á nótæm.
---
Í Gerðubergi er skemmtileg sýning á hljóðfærum. Ég prófaði að juðast á gömlu þeramíni (þóttist ekki sjá Vinsamlega snertið ekki safngripina miðann). Það var stuð.
---
Enn einu sinni byrjar "umræðan" um Íslam og bla bla bla. Fyrir ekki svo mörgum árum var þekking manns á málefninu bundin við Tinnabækur (Svarta gullið o.s.frv.) og kannski 1001 nótt, en nú er maður neyddur til að þykjast hafa einhverja skoðun á þessu og vita eitthvað um menningarheim múslíma og la dí da. Matarmenning frá Norður Afríku er alveg nóg fyrir mig. Ég fíla kússkússrétti og tajine rétti, mauksoðið lambakjöt í eðalkryddlegi og nammi namm. En nei, það er ekki nóg. Þú verður að taka afstöðu. Ókei þá.
---
Þegar Salman Rusdie fór í felur 1989 eftir þessa drepleiðinlegu bók sína og hans var leitað af snartrúuðum morðingjum man ég ekki eftir neinum Vesturlandabúa sem tók upp hanskann fyrir morðingjana, enda ennþá hægt að skipa sér í komma/ekki-komma bása þá og þetta ekki orðið issjú. Nú er öldin önnur. Nú er ég viss um að þó nokkuð margir myndu verða fjölmenningarlega víðsýnir í framan og segja : Salman Rusdie var nær að móðga aumingja trúaða fólkið svona með þessari bók, ekki græt ég þegar hann verður skorinn á háls eins og skepna. Svona eins og það sagði um hin ægilega móðgandi dönsku Sigmunda-gamalmenni.
---
Ég hef líka hitt nokkra Íslendinga sem voru glaðir í hjarta sínu eftir 11. september. Þeir (Hinir illu Kanar) áttu þetta skilið, sögðu þeir og það hlakkaði í þeim.
---
Ekki nenni ég að sjá þessa hollensku stuttmynd enda greinilega bjánalegt drasl. Ég hef lesið umræðu um hana, meðal annars á bloggi Péturs Tyrfingssonar.  Í svarhala þar skrifar einhver "Dóri Hemm": "Framsókn forfeðranna í Norðurálfu” færdu okkur og hafa gefid okkur Britney, X Factor og Michel Houillebecq. Thetta heilaga “málfrelsi” finnt mér reyndar stórlega ofmetið. Dóri hefur eflaust fagnað þegar WTC hrundi og hann má það mín vegna. Hér væri freistandi, eins og gert var í komma/ekki-komma-umræðu síðustu aldar (sem þessi umræða nú svipar auðvitað mikið til) að segja einfaldlega við menn eins og Dóra: "Flyttu þá bara til Teheran fyrst það er svona æðislegt," en það gerir auðvitað ekkert fyrir hvorki Dóra né mig.
---
Annars er það gáfulegasta sem ég hef lesið um málið eftir Sigurð Hólm. 
---
Og já, að eiga það á hættu að þurfa að hlusta á útúrdópaða Britney á nærbuxunum að gaula sitt alversta lag er mun skárra en að vera neyddur til að lifa lífinu í skugga ömurlegs fornaldarbulls. Jafn ömurlegt og ef Gunnar í Krossinum væri alvaldur á Íslandi. Eða bara Pálmi Matthíasson.
---
Það svoleiðis vellur úr manni músikin þessa daga:

Grjóthrun - Herinn hans Bjössa: Dr. Lýður Árnason, þorpsstjórinn á Bolungarvík, Halli Rotþró og fleiri hressir gera út hljómsveitina Grjóthrun (í Hólshreppi) í frístundum sínum. Músikdiskur kemur í verslanir um sumarmál en hér er smjörþefur af gúmmilaðinu, megahittari um herinn hans Bjössa.

The Raconteurs - Hold up: Jack White er gömul frétt en af tillitssemi við gamla aðdáun tékkaði ég á nýju Raconteurs plötunni sem er komin út, Consolers of the lonely. Þetta er ágætis rokkhjakk, einhver þróun og svona – vitnað í gamalt rokkgrín út og suður. Þéttur pakki eins og sagt er.

B-52's - Hot corner: Ellihrumir stuðboltar halda partíinu gangandi á næstu plánetu. Alltaf var nú gaman að hoppa út á dansgólf og sýna eggjandi nördatakta þegar Rock Lobster kom á (í þúsundasta skipti) í Zafarí og margt af því sem þetta lið hefur gert er mjög gott. Miklir áhrifavaldar á stuðgrín Sykurmola og Risaeðla enda prógei og prókölt og prókitsch. B-52s var sem sé að gefa út nýja plötu, Funplex, og eru alveg þokkalega hress.

The Black Keys - I got mine: Blúsinn er ekkert dauður. Þessir hárkögglar blúsa enn og aftur og plötunni Attack and Release og Dangermouse sá um próduksjón. Það má vel fjaðra í mjöðmunum yfir þessu. Myndu passa á blúshátíð.

The Teenagers - Starlett Johansson: Komu þessir ekki á Airwaves? Franskt stuðpopp í svona ægilega hipp og kúl Soffíu Coppola legum gír. Reality check er platan og lepur smörva úr rassgati tilgangsleysisins, en þetta lag er flott.

29.03.08
Gott stöff á netinu: Halli í New York fór í skrýmslalegan vinýlkjallara í Brooklyn og gerir honum skil hér. Þetta er hryllingslesning fyrir áhugalausa en æsilesning fyrir okkur vinýlnörda og "ríkulega" skreytt með ljósmyndum. Hef "ríkulega" hér innan gæsalappa enda orð sem kauðslegir auglýsingagerðarmenn nota mikið, "ríkulega búinn aukabúnaði". Annað svona orð er "að skarta". Það bregst ekki að allar skítamyndir "skarta" þeim Josh Nobrain og Patty Fuckface.
---
Þjóðfélagsumræðan verður beittari í kreppunni. Kreppan er reyndar bara búin að vara í tæplega tvær vikur svo þetta er bara byrjunin. Verður heví, sérstaklega ef það kemur einhver alvöru kreppa og maður fer kannski að sjá útúrspreyjuð húsbílahræ bætast við útúrspreyjaða hjalla í miðbænum. Bragi Valdimar Skúlason sem gamalmennið Enter skrifar hverja dúndurfærsluna á eftir annarri í lesbók Baggalúts. Að myrða hús er t.d. beint í mark. Í sama hné sparkar Sigmundur Ernir sem er hardkor í grein sinni Ó, borg mín, borg og Páll Baldvin krukkar í sama greftri í Brennum borgina. Næsta skref er auðvitað að draga hina andlitslausu verktaka fram á sjónarsviðið, stilla þessum hrægömmum og skemmdarvörgum upp á skotpall forsíðna og benda: Sjáiði: Þetta er hyskið sem er að drepa höfuðborgina ykkar. Hvaða helvítis gráðugu fífl ætli það séu nú?
---
Plata mánaðarins er fimmmælalaust Áfram Ísland! með Morðingjunum. Súperpönkpartí. Annað sem maður hefur verið að hlusta á, segirðu?

Be your own Pet - Heart throb: Tja, önnur breiðskífan með þessum amerísku unglingapönkurum er fín. Heitir Get awkward og sparkar víða í rass á þessum rétt rúmlega hálftíma sem tekur hana að skrölta í mark. 

The Young knives - Terra firma: Luralegir enskir bræður og einn enn að spila breskt nútímarokk með síðpönks og britpoppsbragði. Ekki ósvipaðir í laginu og hljómsveitin Vax frá Egilsstöðum sem ég var að röfla við í móðunni miklu á Ísafirði. Vax er auðvitað snilldarband, farfísa og stuð, og ungu hnífarnir ekki mikið síðri. Platan þeirra nýja, Superabundance, fer nú kannski ekki langt, en alveg til Blönduóss samt.

Gnarls Barkley - No time soon: Svo erða önnur platan með þessum nútímasálverjum. Alveg ágæt á köflum. Nokkur hörmuleg lög reyndar. Íslendingur gerði umslagið en þótti það ekki merkilegt afrek þegar ég talaði við hann fyrir Fbl. Ein af mínum uppáhalds tónlistartengdu upplifunum var þegar ég hafði keypt Reach out I'll be there með Four Tops á sínglu í Safnarabúðinni og dró heim í foreldrahús, pönkunglingur að aldri. Hlýt að hafa haldið að þetta væri eitthvað pönk. Motownmiðinn snérist á fóninum og svo búmm, vá. Það er eitthvað svo óendanlega dularfullt við þetta lag (kannski ekki en heilinn á mér heyrir það þannig). Maður eins og datt inn í nýja vídd, flautan í byrjun og svo þegar bassinn er skilinn einn eftir á undan viðlaginu – þetta er náttúrlega bara tær og ómenguð poppsnilld og eitt og sér nóg til að maður fyllist bullandi trú á mannkyninu. Síðan hefur örsækadelískt soulpopp snert á mér strengi og Gnarls eru að reyna að snerta þessa strengi en tekst það bara ekki. Ekki í fyrstu lotu allavega. Ég verð bara að blasta þessu hér:

The Four Tops - Reach out I'll be there: Eitt af bestu lögum í heimi, gjössovel. Keypti eitthvað best of með Four tops einu sinni og þar var eitthvað af ágætis stöffi en ekkert jafn gæsahúðandi og þetta náttúrlega. 

Los Salvajes - Es Mejor Dejarlo Como Esta: Og svo ein gullfalleg ábreiða með "spænsku Stóns". Maðurinn í bláu skyrtunni er svo sannarlega í stuði.
---
Magnað þetta hjá Góðverkasamtökunum sem máluðu yfir krotið í miðbænum. Svona á að gera þetta! Er málun í skjóli nætur að verða alíslenskt aðgerðarsinna-fyrirbæri? Karl á Ísafirði (Pabbi hennar Kiddýjar) málaði í skjóli nætur eitthvað rafstöðvarhús sem bærinn hafði dregið lappirnar með að mála árum saman og nú þessir snillingar í bænum. Það var gaman að lesa um þetta í Mogganum í gær og fólkið í búðunum grét af gleði. Samt smá spurning af hverju búðareigendur voru ekki fyrir löngu búnir að mála sjálfir fyrst þetta var svona lítið mál. Mér skilst að búið sé að góma eitthvað af þessum unglingakroturum. Með þá í gapastokk á Arnarhól strax takk. Svo má almenningur spreyja á þeim rassgötin. Það þarf náttúrlega að taka eitthvað á þessu liði svo þetta haldi bara ekki áfram að spreyja út í hið óendanlega. Mikið var nú skemmtilegra þegar menn skrifuðu eitthvað á veggina, Nefrennsli eða Teipum Tobba, svo tvö góð dæmi séu nefnd.
---
Bítlarótari með leyndarmálin í gröfina. Grein hér.
---
Júlli Strömmerkamp er með yfirlýsingu: Það er búið að bæta ellismellunum Sham 69 á Kamp og einnig hefur verið kunngjört að reggítjald frá AXIS SOUND SYSTEM verði opið alla helgina. Sham sér um að kikka inn á föstudegi en þetta er reyndar Sham án Pursey, hann var rekinn í fyrra. Ég fékk svo orðsendingu í gær um að nú er feitur biti að bætast við og þegar hann verður staðfestur mun líklega seljast upp med det samme! Fáir miðar eftir og litlar líkur á að verði hægt að bæta við miðum. Það eru því síðustu forvöð fyrir áhugasama að skella sér með í fjörið en enn á ýmislegt eftir að bætast við, til dæmis er akústik tjald í undirbúningi. Skrifið Júlla til að komast á Strömmerkampið: strummercamp@gmail.com
---
Maggi Strump leitar að fyrri eigendum að bassanum sínum: Ég á nefnilega forláta Hofner President bassa frá 1966. Þetta ku vera týpa "500/6" og var hann einungis framleiddur í 500 eintökum. Ég fjárfesti í honum í búð sem seldi notuð húsgögn einhverntíman á tímabilinu '91-'94. Mér leikur forvitni á að vita hvaðan gripurinn kemur, hver átti hann áður og hvaða hljómsveitir gætu hafa verið svo frægar að skarta þessum dýrgrip.

lítil mynd af honum stökum

lítil "collage" mynd af bassanum frá ýmsum sjónarhornum

stór samskonar collage mynd

Skrifið Magga ef þið vitið eitthvað um fortíð bassans: maggi@twolittledogs.co.uk. Rosa heppni annars í Magga. Aldrei hef ég fundið neitt af viti í þessum notuðu húsgagnabúðum. Ég er viss um að hann borgaði skít og kanil fyrir bassann þar að auki. 

28.03.08
Gott hjá vörubílakörlunum. Meira svona. Eggja alþingishúsið. Slora stjórnarráðið. 
---
Borgin boðar aðgerðir í miðbænum. Gott hjá görmunum. Þá á bara eftir að sparka Árna Mathiesen, lækka bensínið um 50 kall, lækka matvælaverð um 50 prósent, hækka persónuafslátt í 200 þúsund, lækka skattprósentuna í 25%, lækka vexti á íbúðalán oní 3%, afnema verðtrygginguna og sitthvað fleira. Svona til að byrja með.

27.03.08
Ef ég væri verktaki og ætti ógeðslegt hús í miðbænum fullt af hlandbrunnum dópræflum og væri að bíða eftir því að geta rifið það myndi ég halla mér aftur í leðurstólnum, teyga að mér kúbanskt vindlaloft og segja stundarhátt: Ha ha, djöfull verða allir hættir að hugsa um þetta á morgun.
---
Maður kemur að tómum kofa varðandi þessa Ísafjarðarferð. DV upplýsti reyndar í gær að ég hefði verið blindfullur á svæðinu og sýndi mynd af mér þar sem ég leit nú ekkert svo fullur út. Ég er hins vegar dauðadrukkinn á þessari fallegu mynd:

sem má sjá á aldrei-síðu Monítórs. "Sólheimaglottið" tekur sig hér upp eftir langan dvala. Því miður get ég ekki séð fleiri myndar þarna hjá Monitor, enn sem komið er. Ég er líka að reyna að sjá upptöku frá hátíðinni þegar karlakórinn Ernir tók Hvar ertu nú? með Óttarri en upptakan á síðunni þeirra virðist vera í skralli. Á þetta einhver á videó?
---
Annars virðast meiðsl mín minni en á horfðist og ég kemst í spinning bráðlega. Sem er eins gott því páskaeggin hafa hlaðist á mig í helvítis fríinu.

26.03.08
Hér er áríðandi tilkynning sem ég var beðinn um að koma á framfæri: Langar þér að vera áhorfandi á Svalbarða og upplifa frábæra svalbarðska stemmingu. Sendu okkur þá línu á svalbarði@sagafilm.is. Fyrir þá sem ekki vita er Svalbarði skemmtiþáttur í umsjón Þorsteins Guðmundssonar og verður fyrsti þáttur sýndur á Skjá einum 4. apríl.
---
Hauskúpuskel hefur verið að gera allt vitlaust um páskana. Í Boneroom (og mörgum svipuðum búðum) má fá fullt af mannabeinum sem væri hægt að strá víðsvegar um landið til að halda lífi í íslenskum fjölmiðlum vikum saman og gera lögguna gráhærða. En það væri auðvitað ljótt svo ekki gera þetta krakkar!
---
Miðbær Reykjavíkur er viðbjóður. Útkrotaðir kofar út um allt, brunagildrur og rónagreni. Að keyra niður Laugarveginn er eins og að horfa á myndina Warriors eða eitthvað - eða bara einhverja heimsendamynd frá Kalda stríðinu. Í fyrsta lagi á að taka þessa verktaka og henda þeim upp á fjöll, svo á að taka þessa síkrotandi unglingabjána og henda þeim upp á fjöll (án spreybrúsa) og svo á að gefa Torfusamtökunum 600 millur til að lappa upp á þetta. Eða eitthvað. Þetta er svo sannarlega viðbjóðslegt ástand. Er verið að hylma yfir með zombiefaraldri?
---
Í Krónunni í gær var verið að spila Ísland er land þitt í kerfinu. Álíka viðeigandi og Wonderful life í gasklefa. Mig langaði mest til að rífa mig úr fötunum, rífa upp kjúklingabringupakka á 3000 kr kílóið, maka bringum á bringuna á mér og hlaupa æpandi og gólandi út. Ísland er land þitt í rotnandi miðbæ, Ísland er land daglegrar töku í görn, Ísland er land okurs og ömurlegs veðurs, Ísland er land þitt með fábjána við stjórn (syngist).
---
Ekki það ég sé eitthvað neikvæðari en vanalega. Þynnkan frá Ísafirði alveg farin en ég er ennþá snúinn á löppinni eftir svellbúnkann á leiðinni heim og kemst ekki í spinning í bráð. Tek þá bara í lóð á meðan. Og svo er ég á leið til útlanda svo fokk itt.

25.03.08
Þá er páskafríið búið og hægt að fara að vinna aftur.

20.03.08
Eftir uppbyggilegan rúnt um óravíddir alnetsins nú í morgunssárið hef ég komist að einu: Fyrirbærið stuðarapungur er staðreynd.
---
Páskafrí hefur einhverja meiningu þegar maður er launaþræll. Ef ég væri verktaki væri þetta bara alveg eins dagur og í gær en nú er þetta byrjun á 5 daga frí. Vá og vei! 
---
Ef þú ert fyrir vestan spila ég þar tvisvar. Föstudaginn langa kl. 13 í skíðabrekku einhvers staðar á vegum Skíðaviku. Ég, Heiða, Elvar og Kristján Freyr. Blandað efni úr sarpi fyrir "alla fjölskylduna". Sama settöpp á Aldrei fór ég suður á laugardaginn kl. 16. Ætti að verða gengdarlaust stuð. Ef maður kemst fyrir veðri, það er að segja.
---
Hófleg bjartsýni er nýjasti Bakþankinn. Nokkuð sæmilegur bara. Og þær breytingar hafa verið gerðar að á Okur-síðu er kominn nýr möguleika, þ.e. EKKI-OKUR. Í kreppunni þarf maður að vera jákvæður og benda á það sem er jákvætt, ekki bara á okurpungana. Það var einmitt kók á 350 kall á veitingarhúsinu Great Wall of China (aka Naustið) sem fæddi Okursíðuna. Nú er sá staður uppvís af mansali svo þú ert algjör hálfviti ef þú ferð þangað inn fyrir dyr. Helvítis rugl á þessum Kínverjum alltaf. Eru Kínverjar nasistar 21. aldarinnar? Hjálp, nei. Nú er kannski einhver frá kínverska sendiráðinu að lesa þetta og ég er kominn á einhvern lista hjá þeim. Ekki það mig langi eitthvað til Kína svo þeir um það. 
---
Okursíðan verður 6 mánuða á morgun. Var sett upp 21. sept í fyrra. Dæmin eru orðin 368.
---
Sá John McCain í 60 mínútum. Því miður, þetta er næsti forseti BNA. Ekki séns þegar á hólminn er komið að Barack Obama fái kosningu verandi bæði blökkumaður og gáfumenni. Hann verður að dömbadán til að eiga séns. Sjást á fótboltaleik og drekka bjór. Ameríski bolurinn mun flykkjast um gamla góða McCain því hann er vakandi með hlandsting kl. 3 um nætur og getur því svarað í símann. Hann hefur svona plebbalegan sjarma sem liðið vill, traustur, var í Víetnam, samt mannlegur (reiðist), hefur þurft að vinna sig upp frá botni í kosningabaráttunni. Vona samt að ég hafi rangt fyrir mér.
---
Hljómsveitarnafnið Unun þykir 3ja best í könnun Jens Guðs, á eftir Spilverki þjóðanna og Kamarorghestar. Unun er mjög vel heppnað nafn, verð ég að viðurkenna, því það má snúa stöfunum á haus og samt stendur Unun og leika sér með þetta hönnunarlega á marga vegu. Við Þór Eldon vorum búnir að vesenast með nafn í smá tíma, mig minnir að það skásta hafi verið Zombie Duck áður en Unun kom upp þegar við vorum að spila skrabbl. Aldrei að vita nema maður geri eitthvað meira undir þessu nafni, Unun, fyrst almenn sátt virðist ríkja með að nafnið sé svona gott. Og þannig séð er þetta Unun á Ísafirði. Reyndar bara eitt Ununarlag sem við spilum, en samt.

18.03.08
Tónlistarverðlaun. Sigtryggur og EÖB enn og aftur að sækja styttur fyrir Björk. Bjánalegt. Hætta að dæla þessu í kellu nema hún sæki sjálf. Henni er alveg sama þótt hún fái þetta ekki. Megas mætti auðvitað ekki heldur. Of kúl fyrir svona. En afhverju þessir þrír flokkar í poppmúsik? Aumkunarlega vesælt. Það má alveg eins bara smækka þetta enn frekar og veita öllum verðlaun: Besta plata ársins í flokknum indie með faggott, besta plata ársins í flokknum hresst eurodiskó, besta plata ársins í flokknum Færeyingur á Íslandi, o.s.frv o.s.frv. Auðvitað eiga bara að vera ein verðlaun í einum víðum og almennum flokki dægurtónlistar. Þetta er svo mikið rugl svona. Afhverju geta Hjaltalín og Ólöf Arnalds ekki verið saman í flokki á meðan Palli og Sprengjuhöllin geta það? Algjör steypa sem gerir bara lítið úr þeim sem sigra. Og hver fjandinn er "fjölbreytt" tónlist? Dægurtónlist heitir þetta fíflin ykkar. Afhverju eru 3-5 manns látnir tilnefna og sömu 3-5 manns látnir velja úr tilnefningunum sínum skömmu síðar? Afhverju fá meðlimir í FTT og FÍH ekki að kjósa? Svona fag- eitthvað eins og í Eddunni? Eða hreinlega bara hinn upplýsti skríll? Þessi hátíð kallar á víðtæka endurskoðun. Tómu sætin í salnum segja sitt. Að öðru leyti flott, Felix í essinu og péinu sínu og til hamingju meistari Rúnar Júl! 
---
Hvað skal segja? Það ætti allavega að verða fjör á okursíðunni á næstunni.
---
Á meðan lífskjör almennings versna með hverjum deginum eru liðónýtir stjórnmálamenn að gera það eina sem skiptir þá máli, fjölga stöðum í utanríkisráðuneytinu og fullir stórmennsku að reyna að troða sér í öryggisráð SÞ (skil ekki til hvers í andskotanum).
---
Á óánægjuvaktinni mæli ég með þessari grein Hallgríms Helgasonar og viðtali í Silfri Egils við útvarpskarlanna á Sögu. Ekki það skipti einhverju máli þótt þú leggir þig eftir því. Ástandið skánar hvorki við að tuða né við að hlusta á tuð.

16.03.08
Sýning Sigurðar Guðmundsson í Hafnarhúsinu kallaði á tvær hugsanir: 1. Svaka er Jói Ágústs reffilegur allsber á hestbaki og 2. snyrta píkuháratískan hefur ekki náð til Japans. Á leiðinni heim kom ég inn í lag hjá Óla Palla. Hvaða hundlélega Sigur Rósar kópía er nú þetta?, hugsaði ég. Reyndist vera lagið Samskeyti með Sigur Rós á tónleikum á BBC. Glatað rusl satt að segja. Má segja svona um Sigur Rós?
---
Svona söngvari réttlætir þátt eins og Bandið hans Bubba, sagði Bubbi einu sinni ef ekki tvisvar í síðasta þætti. Hann var líklega að tala um hina ágætu barka Eyþór frá Dalvík og Arnar með störuna. Ég veit það nú ekki. Yrði ekkert úr þeim ef þeir fengju ekki að góla einn þriðja úr gömlu Hljóma-lagi í sjónvarpinu? Það held ég ekki. Ég held að góðir söngvarar finndu sér alveg leið þangað sem þeir stefndu, ef þeir á annað borð nenntu því. Lítil hætta á að þeir vesluðust upp í aumingjaskap þótt ekkert karókí-tv væri í spilinu – eða hvað? Er kannski landið fullt af æðislegum talentum sem koðna nú niður á bakvið skrifborð á loftlausum kontórum af því Bandið hans Ragga var ekki á dagskrá 1975? Hvað er líka unnið með söngvara sem getur sungið per se? Verður ekki meira að fylgja með? Eins og að geta barið saman lagi? Er eftirsóknarvert að framleiða hvítþegna súkkulaðibarka á færibandi? Er þetta ekki bara afturhvarf til glataðri tíma áður en rokkið kom til sögunnar, Pat Boone og það allt? Fer ekki gerjunin fram utan sjónvarpsmyndavéla? Hvað hefur komið út úr svipuðum íslenskum þáttum til þessa? Stórfenglegir listamenn? Björn Jörundur er annars alveg að bjarga prógramminu með sínu spaugi og glensi.
---
Extra extra: Djassaði stærðfræðikvartettinn Agent Fresco sigraði Músiktilraunir.
---
Neytendamál: Holtsels Hnoss - 500 ml ísdolla - 735 kr í Nóatúni (eini staðurinn sem bíður upp á þetta held ég). Tveggja stjörnu ís frá Eyjafirði. Bragðið sem við smökkuðum var tíramísú sem var alltof væmið og óspennandi. Ég held ég prófi vanillu bragð næst og mixi svo sjálfur eitthvað við hann, peanut butter cups frá Reese's eða eitthvað. Það er jákvætt að fólk sé að dunda sér við ísgerð. Mjög jákvætt meira að segja. Það er ljóst að maður þarf að heimsækja ísbúðina í næstu norðanferð.
---
Uppfært: Mynd og bók í menningunni.
---
Fór í 12 tóna og keypti nýja diskinn með Leoncie. Um er að ræða mikið meistaraverk. Þótt listakonan hafi flúið skrílinn í Sandgerði og búi nú í Essex dvelur hugurinn á Íslandi. Helmingur plötunnar er á hinu ilhýra. Að minnsta kosti þrjú lög af átta teljast ódauðleg. Þar á meðal er pólitískt uppgjör Leoncie við lífið á Íslandi. Sjaldan hefur sannleikurinn verið málaður jafn skýrum litum á plötu. Láttu okkur hafaða óþvegið! Þau eru að leita að sannleikanum og ekkert finnst í tómum bjórdósunum! Það er skylda hvers þjóðfélagsþegns að kaupa þessa plötu og það strax!

Leoncie - Pólitískar leikbrúður
---
Minni karla, Skuggasveinar flytja lög Tony Joe White, er komin út. Hjálmarnir Siggi og Kiddi fengu þá hugmynd að íslenska lög Tonys Joes og fá ýmsa meistara til að syngja þau inn á hinn karlmannlega disk. Þarna eru Megas, Ragnar Kjartansson, Baggalútar og fleiri og fleira í netthrottalegum karlagír og punglyktin svífur yfir vötnum. Heyrum Óttarr Proppé og epískt hvítfönk.

Óttarr Proppé - Af tollheimtu djöfulsins

15.03.08
Tekinn hefur verið upp nýr bakgrunnur hér á síðunni sem heitir Viltu koma á tónleika? Hann eflir vonandi sögulega tónlistarmeðvitund landsmanna.
---
Já já já og Bob Dylan að koma. Fimm dögum á eftir John Fogerty. Djöfuls rosa pakki er þetta þarna í lok maí. Og maður kannski bara út í Serbíu að blaðamannast eitthvað á gei preid á sterum og missir af öllu. Hvílíkur skandall!
---
Dr. Gunna rótarbjórinn, fyrsta upplag, er kannski ekki algjörlega ódrekkandi en nálægt því. Ég gerði fjölmörg mistök. Það er til dæmis ekki það sama ger og ger. Maður notar ekki bökunarger úr bréfi úr kjörbúð í svona dæmi heldur sérstakt ger sem maður kaupir í búð eins og Ámunni. Því var rótarbjórinn gjörsamlega flatur og hálf viðbjóðslegur. Svo nota ég minni sykur og minna þykkni næst, fer sem sé algjörlega eftir leiðbeiningunum. Þetta er rosalega bragðsterkt og sætt. En ég gefst ekkert upp sko. Ég held þetta sé allt að koma. Það má kaupa svona þykkni til dæmis hér ef einhver er að spá í að framleiða sinn eigin rótarbjór.
---
Ég hefði nú alveg verið til í að sjá Sálina í gær en það nennti bara alls enginn með mér. Ég var samt með eitt lag með strákunum á heilanum í gær í tilefni dagsins. Svo eru kassarnir gífurlega flottir. Ekki amalegt að vera kassagerður. Ég á ekki séns í svona kassa sjálfur. Það mætti kannski skrapa í þriggja diska kassaútgáfu með S.H.Draumi / Bless, en það er smotterí miðað við 13-diska kassagerð Sálarinnar og 5-diska kassa Þursanna. Þriggja diska kassi er meira svona skókassi. Hér er heilalag gærdagsins:

Sálin hans Jóns míns - Neistinn
---
Svo hef ég verið að hlusta á nýju plötuna með Goldfrapp sem er góð. Seventh Tree heitir hún er það ekki? Voða rólegt og svalt. Hér er til dæmis eitt bítlalega hljómandi lag:

Goldfrapp - Little bird
---
Talandi um Bítla þá er þessi ferð FTT náttúrlega algjör snilld. Ég er svo sem búinn að gera þetta áður, sjá McCartney og fara pílagrímsferð til Liverpool, en verðið sem þetta er á er gríðalega gott. Svo væri auðvitað magnað að sjá Hljóma í Cavern og drekka (í sig nostalgíuna) með einvalaliði poppara sem örugglega fer í ferðina.
---
Einhver Sigursteinn var óánægður með svartagallsraus mitt um lífskjör á Íslandi og heldur því blákalt fram í gestabók að Ísland sé víst besta land í heimi og Spánn til dæmis totti fyrir allan peninginn í samanburði. Nú hef ég náttúrlega ekki búið á Spáni en það var allavega helvíti ódýrt allt þar síðast þegar ég fór (enda gengið hagstætt). Ég reyndi að espa Tóta Leifs upp í að bakka mig upp í þessu en hann nennti ómögulega í netþras en skrifaði þó eftirfarandi:

Að lífsgæði hafi versnað á Spáni er bæði rétt og rangt hjá viðkomandi. Húsnæðisverð hefur hækkað mikið en margir innfæddir hafa staðið í stað tekjulega, þeir rétt skríða yfir 1000 evrur á mánuði. Þetta þýðir að æ fleirri sjá fram á að geta ekki keypt sér eigin íbúð, verða að búa heima hjá mömmu eða leigja nokkrir saman.
Flestir sem flytja til Spánar eru með tekjur annars staðar frá og/eða duttu yfir sæmilega íbúð í gegn um klíku. Einnig geta menn komist ágætlega af með eigin rekstur, ef vel gengur.
Það sem er snúið í þessu  - er að lífgæðin eru margfalt hærri til að byrja með að mínu mati. Þetta er soldið óhlutbundið og einmitt vonlaust að rífast um á netinu. Hvað eru lífsgæði nákvæmlega? Að geta farið á ströndina hvenær sem er? Að geta farið út að borða þríréttað hollann mat fyrir þúsund krónur?
Það gæti orðið erfitt fyrir mig að rífast um lífsgæði við mann sem býr kannski  í Grafarvoginum og á þrjá bíla á lánum. Þýðir lítið að segja við hann að lífsgæði séu það að geta labbað í sólinni út í búð til að kaupa ódýrt grænmeti og kaffi. 
Heilbrigðiskerfið á Spáni er ókeypis og jafn gott og á íslandi. En nú er það ræktinn. 33 evrur á mánuði. Niðurgreitt af borginni. Nýjustu græjur. Hóptímar. Sundlaug.