08.04.09
Nú eru tveir sólarhringar þangað til Dr. Gunni inniheldur... kemur út.
---
Þau undur og stórmerkilegu stórmerki gerðust að ég keypti mér cd á netinu. Eins og ég geri oft var ég að tékka á hinni almögnuðu Aquarius Records plötubúð í San Fransisco og rakst á fyrstu plötu Ovens, óþekktrar lókal sveitar. Það var hvergi að finna neitt með þeim á lendum alnetsins svo ég pantaði mér bara diskinn. Hann kom í gær, hlaðinn aukakostnaði frá íslenska ríkinu, og er dúndur góður. Þetta eru strákar sem syngja um slóðaskap og hangs og ælu og dóp og rugl við mússikk sem lifir og hrærist í Weezer Bítla Beach Boys landi. 44 lög á diski sem heitir bara Ovens eins og bandið. Aðalgaurinn heitir Antony Molina og semur allt - "even though he probably stole most of the riffs off of someone else". Þrír aðrir með honum í bandinu. Tekið upp 2006, 2007 og 2008 og þeir segja að hugmyndin hafi verið að þetta væru 3 lps, en þeir hafi bara ekki haft efni á að gefa út þrjár lp. Því komi þetta allt núna á einni cd. Það er Tumult sem gefur út. Við skulum fá þrjú tóndæmi, í röð af '06, '07 og '08 "plötunum":

Ovens - Puke when I'm sad
Ovens - Movin On
Ovens - Cantillejo Scene
---
Hér er eitthvað sem heitir Record Store Day. Virðist spennandi.

07.04.09 - Ammrískt gúmmilaði
Lufsan hringdi í mig babú í gær til að segja mér frá Klinkinu, nýrri lágvöruverðsverslun að Faxafeni 8 (inn af Outlet Center). Það er allt fullt hérna af fáránlegri matvöru frá USA, eins og þetta sé gamall lager af Vellinum, sagði hún og þekkti sinn mann. Ég þaut auðvitað uppeftir, sá fyrir mér rótarbjór, krím sóda, karamelluhúðað popp og geðveiki, og varð svo sem ekki fyrir neinum vonbrigðum. Ekkert rót né krím samt. Tók svo spjall við eigandann fyrir Neytendahorn Fbl og hann lofaði að panta rótarbjór og krímsóda í næstu pöntun. Mæli með búðinni fyrir aðdáendur ammerrísks gúmmilaðis. Eigandinn sagðist ekkert tengdur Jóni Sullenberger og væri orðinn þreyttur á að sverja það af sér...
---
Áður auglýst gigg á Sódómu Rvk síðasta vetrardag hefur verið blásið af. Hinn stórfenglegi Eberg mun samt spila, en bara án mín að þessu sinni. Biggi fattaði allt í einu að hann var bókaður á Abbakóvergigg í Tónlistarskóla Akraness á sama tíma. En við spilum bara seinna, ekki málið. Það var meira að segja búið að bóka bassaleikara í bandið, heimsfrægan mann sem var byrjaður að æfa sig.
---
Fólk er að vesenast með Dr. Gunni inniheldur... og spyrja hvernig það eiga að panta og svoleiðis. Svarið er að allar upplýsingar varðandi slíkt verða gefnar upp kl. 10 á föstudaginn. Í boði verða 300 tölusett & árituð eintök af hinum glæsilega disk (72 bls bæklingur!) + niðurhal á 2000 kall - EÐA - bara niðurhal á 1000 kall. 

06.04.09 - Útgáfudagur ákveðinn
Eins og sést á hinni vönduðu auglýsingu hér að ofan kemur sólóplatan Dr. Gunni inniheldur... út á Föstudaginn langa kl. 10:00. Þetta er háheilög plata, takk fyrir.
---
Ég fór á fínan veitingastað, Saffran, eða eins og segir á veitingahúsasíðunni: Saffran, Glæsibæ, Rvk XXXX
Flottur, ferskur, heilsusamlegur og helvíti ódýr veitingastaður í Glæsibæ. Fékk mér naanwich sem kostaði ekki nema 750 kall og var alveg svaka fínn. Mæli með þessum.
---
Nytjamarkaðir eru málið í kreppunni. Á Akureyri er komið Norðurport, sem eins og nafnið bendir til er Kolaportið norðan heiða plús meira af hannyrðum og föndri heimamanna. Ég var á röltinu í gær um hinn gríðarfagra Akraneskaupstað í gær (á meðan tölvan mallaði út úr sér master) og tók eftir nytjamarkaðinum Búkolla. Því miður var ekki opið.

03.04.09 - Grand pönk
Á Kringlukránni rifja Pops upp bítlið, en pönkið verður rifjað upp á Grand Rokk. Valli í Fræbbblunum sendi email:

Rétt að minna á Punk 2009 kvöldið næsta laugardagskvöld á Grand Rokk (annað kvöld). Þetta verður að mörgu leyti svipað og í fyrra, enda tókst alveg sérstaklega vel til þá – en við bætum við nokkrum nýjum lögum í ár. Svo ég rifji aðeins upp þá er þetta hópur sem var á sínum tíma í Fræbbblunum, Taugadeildinni, Q4U, Tappa Tíkarrass, Snillingunum og fleiri hljómsveitum.
Við erum að rifja upp lög frá upphafsárum Punksins, 1976-1979, bæði þekkt lög frá Stranglers, Sex Pistols, Ramones og Clash og einnig frá hljómsveitum sem voru „stórar“ úti en náðu aldrei almennilega athygli hér, eins og Jam, Stiff Little Fingers, Undertones, Buzzcocks og Skids.
Það má svo sem deila um hvort þetta sé allt „Punk“, eða hvort „Nýbylgja“ eða „Power Pop“ sé réttari stimpill, en það eru ekkert sérstaklega skemmtilegar umræður, og hvort sem er aukaatriði. Aðalatriðið er að þetta eru þau lög sem við vorum að hlusta á þegar við vorum að byrja að spila og þau lög sem höfðu hvað mest áhrif á okkur. Og á sínum tíma þótti jafnvel Blondie vera argasta „punk“ þegar við reyndum að spila „Denis, Denis“ fyrir Hollywood kynslóðina.

Valli sendi slefandi góðan heildarlagalistann með. Það mætti skella þessu á plötu og kallana Now this is what I call punk music vol 1: 
Anarchy In The UK - Sex Pistols
Police And Thieves - Clash
So What? - Crass
Gotta Getaway - Stiff Little Fingers
Sheena Is A Punk Rocker - Ramones
Barbed Wire Love - Stiff Little Fingers
EMI - Sex Pistols
Into The Valley - Skids
New Rose - Damned
Sex & Drugs & Rock & Roll - Ian Dury
Sound Of The Suburb - Members
Alternative Ulster - Stiff Little Fingers
What Do I Get? - Buzzcocks
I'm So Bored With The USA - Clash
Suspect Device - Stiff Little Fingers
Public Image - PiL
Johnny Was - Stiff Little Fingers
Ever Fallen In Love - Buzzcocks
Holidays In The Sun - Sex Pistols
Denis - Blondie
Pretty Vacant - Sex Pistols
A Bomb In Wardour Street - Jam
My Perfect Cousin - Undertones
Safe European Home - Clash
Get Over You - Undertones
Swallow My Pride - Ramones
White Man In Hammersmith Palais - Clash
Watching The Detectives - Elvis Costello
Spanish Bombs - Clash
The KKK Took My Baby Away - Ramones
Radio Radio - Elvis Costello
No More Heroes - Stranglers
Teenage Kicks - Undertones
Down In The Tube Station At Midnight - Jam
Real World - Buzzcocks
Marquee Moon - Television
Five Minutes - Stranglers
Roots, Radicals, Rockers And Reggae - Stiff Little Fingers
Get A Grip On Yourself - Stranglers
In The City - Jam
White Riot - Clash
God Save The Queen - Sex Pistols
Rockaway Beach - Ramones
Janie Jones - Clash
Blitzkrieg Bop - Ramones
If The Kids Are United - Sham 69 

Við fáum tóndæmi:

Buzzcocks - Real World
Fyrsta lagið af annarri plötu Manchesterpopppönkaranna með samkynhneigða söngvaranum Pete Shelley, "Love Bites" (eða "Sogblettir"). Það kom út í september 1978. Fyrsta plata bandsins kom út sama ár, í mars. Á þessum tíma voru menn að springa og ekkert að hanga yfir hlutunum. Dæla stöffinu út eins og Bítlarnir. Eitthvað annað en núna þegar flestir taka 2-3 ár á milli platna. 

02.04.09 - Sumarsmellamella ég? Nei!
Jónathan var greinilega drulluþreyttur og með störu, en stóð sig engu að síður ágætlega í rólegu setti. Gríðarlega skemmtilegir textarnir margir og hann alveg gegg á köflum. VG í kvöld ef fólk vill upplifa meistarann. Þá ættann að vera betur sofinn.
---
Búið er að ákveða að lagið Prinsessan verði sumarsmellur Buffs í ár. Lagið er eftir mig. Það er reyndar líka á plötunni Dr. Gunni inniheldur... en í mun öreigalegri útgáfu og heitir þar Prinsessan mín. Þetta er ekki eini sumarsmellur minn í ár. Ég samdi líka lagið Komdu aftur sem  hljómsveitin Elektra mun flytja. Fjölmargir Veðbankar segja að það verðu örugglega líka sumarsmellur í ár. Samkvæmt ofurumbanum Valla Sport verður lagið frumflutt í Idol 17. apríl. Ég hef hvorugt lagið heyrt með Buff eða Elektru, en hlakka helvíti til þess. Alltaf gaman að heyra gítarglamur sitt enda sykurhúðað og gljándi. Lögin á Dr. Gunni inniheldur... eru svo 18 talsins, en samt er ekki útlit fyrir að nema svona 7 lög verði sumarsmellir. Hitt er albúmtrakks og/eða of geðveikt. Nú hillir loks undir plötuna. Ég held við séum að tala um formlega útgáfu þriðjudaginn 7 apríl kl. 08:00. 
---
Bakþanki dagsins heitir Halló Tortóla, hér kem ég! Hér er heimasíða Bomba Shack pöbbsins sem minnst er á í greininni. Sé rýnt í myndirnar má sjá þá Björgólfsfeðga í góðu glensi á dansgólfinu með lífeyrissparnað ömmu þinnar. 

01.04.09 - Bara Jónathan
Þetta er gríðarlega metnaðarfullt aprílgabb (ef þetta er þá aprílgabb!)
---
Burt með sorg og sút, settu á munninn stút og drullaðu þér út... á tónleika með Jónatani Richman! Jess! Hann er kominn til að velgja þér glaðlega undir uggum í þriðja sinn og spilar á Rósenberg í kvöld. Mér skilst reyndar að það sé snaruppselt á það gigg. En ekki fara að væla. Jónatan (og Tommi trommari) verða á morgun (2 apríl kl.21:30) í kosningamiðstöð VG, Tryggvagötu 11. Ólöf Arnalds verður líka og það kostar skitinn þúsara inn.

Jonathan Richman - I was dancing in a lesbian bar
Jónathan er nýbúinn að vera í Englandi að spila. Hann fær svaka dóma í Mojo - "Funny, free, and fabulous, Jonathan Richman is a living celebration of life as it should be lived." Þar segir að hann líti glæsilega út verandi 57 ára og að hann þoli ekki farsíma. Þess má geta að hann þolir ekki heldur tölvur og tölvupóst. Grímur fær bara sendibréf frá honum þegar þarf að arrengera gigg. Hér er eitt snilldarlag frá 1992 af plötunni I, Jonathan.

31.03.09
Dr. Gunni inniheldur — platan sem allir eru að bíða eftir — verður ekki gefin út 3 apríl. Frestun vegna tölvubilunar, sjáðu til. Þess í stað kemur platan líkast til út í næstu viku, vonandi fyrir páska. Svo er allt útlit fyrir að ég spili þann 22. apríl - Síðasta vetrardag (frí daginn eftir!) á Sódómu Reykjavík. Þetta verða almagnaðir tónleikar því Eberg spilar líka. Tónleikarnir heita Tvöfaldir á klaka. Eberg gefur einmitt sína plötu út núna á föstudaginn 3. apríl, helvíti flotta plötu sem heitir Antidote. 
---
Dr. Gunni inniheldur er svo sem nánast tilbúin. Tölvudjönkið hrundi bara þegar endamarkið blasti við. Lítið við því að gera nema bíða eftir viðgerðarkörlunum. Skjölin eru alveg róleg á harðadiskinum. Platan kemur út sem CD og niðurhal á 2000 kall eða bara niðurhal á 1000 kall. CD diskurinn kemur í 72 bls bæklingi, textar og ljósmyndir og kjaftæði. CD útgáfan er bara gefin út í 300 eintökum, tölusettum og árituðum. Platan verður til í einhverjum plötubúðum og svo beint frá útgefanda, Erðanúmúsik. Þetta er helvíti góð plata, þótt ég segi sjálfur frá.
---
Lufsan hefur áhyggjur af því að ég muni tuða mig í hel yfir nýjustu seríu Lost. Nú er mannhelvítin sem skrifa þetta búin að draga tímaflakk inn í grautinn, eins og þetta væri nú ekki nógu mikið rugl fyrir. Ég sagði ekki orð seinni helming þáttarins. 
---
Í borginni eru allavega tvær asíubúðir, Mai Thai á Hlemmi og Asian á Suðurlandsbraut. Mín reynsla er að Mai Thai hafi nú tekið afgerandi forystu í vöruúrvali. Ég gat allavega fyllt heilan poka af stöffi þaðan í gær, núðlusúpur, nammi, skyndikaffi og exótíska drykki. Að fara í svona búðir er ódýrasta leiðin til að sleppa frá íslenskum raunveruleika. Maður getur þóst vera annars staðar í smástund, til dæmis í steikjandi hita í lókal búð í Aparri.
---
Í Hafnarfirði er fín Antíkbúð á Strandgötu, Laugavegi suðursins. Þar sagði mér karlinn aðspurður að síðasta Spur flaska hafi komið í hús fyrir 12 árum og hún hafi selst undir eins. Íslendingar hafa nostalgískt æði fyrir Spurflöskum. Ég myndi örugglega alveg eyða 5000 kalli í Spurflösku, enda hönnunarlegt masterpís. Hinsvegar var til fullur kassi af Sinalco flöskum sem enginn nennir að eiga.
---
Ég nenni ekki að tala um landsfund Sjálfsstæðismanna, nema: Hvað er málið með þessi V-merki? Fyrst Dabbi með eitt V og svo Bjarni silfurskeið með VV. Var það ekki síðast Nixon sem flassaði V-um? Mér fannst þetta eitthvað korní. Annars er ég að spá í að kjósa D. Ég held alltaf með lúserunum. Nei, djók.

29.03.09 - We have to kill something
Davíð Oddsson í geðveiku stuði. Helvíti kreisí alltaf. Gaman að því. Er dáldið eins og mjölkarlinn fyrir austan - We have to kill something! Segir það sem hann meinar og er drullusama hvað heiminum finnst. Reynir þó allavega alltaf að skemmta krádinu með íslenskri fyndni. Og hinir stórfenglegu Sjallar átu úr lófanum á honum, nema þegar hann tók diss á vælukarlinn Vilhjálm - sem kemur alltaf og vælir þegar á að taka smá frá ríkuköllunum - þá mátti heyra í engisprettum. Þetta er hlægilegt lið. Og fyndnast af öllu verður ef flokkurinn verður minni en bæði Samflykkið og VG í kosningunum. Það er nú lágmarks útreið, finnst mér. Og þið getið rétt ímyndað ykkur svartagallið sem mun vella úr þessari átt þá. Nördarnir í háskólamyndinni búnir að vinna og djokkin og gellurnar í geðveikri fýlu og hefndarhug. Revenge of the Jocks 2013? 
---
Sá bíópikkið Cadillac Records um Chess records í Chicago fiftís. Ágætis mynd og ágætt að fá smjörþefinn af þessu stöffi öllu, uppgangi Muddy Waters og Howlin' Wolf og þessa liðs. Það var farið hratt yfir sögu og ekkert endilega verið að hengja sig í sagnfræðilegum staðreyndum. Nú bíða mín bíópikkinn The Buddy Holly Story frá 1978 með hinum ekkert líka Gary Busey og What we do is Secret, um pönkbandið Germs og söngvara þess, Derby Crash, sem gerði þau mistök að drepa sig daginn áður en John Lennon var skotinn. Dauði hans féll eðlilega aðeins í skuggann af hörmulegu morði Lennons.
---
Enn á ný er leitað að bestu íslensku plötunni. Hér er hægt að taka þátt í að skera niður 485 platna lista!

27.03.09
Sjitt hvað mig hlakkar mig til að sjá hinar lýðræðislegu kappræður fyrir kosningarnar. Þetta hlýtur að vera sent út á tv eins og vanalega. Sævar, Ástþór og Sturla og allir hinir við langborð að tala um það hvernig hægt verður að bjarga landinu. Þetta verður eðalefni. Sævar, Ástþór og Sturla... og maður fær bara að kjósa einn? Þetta er náttúrlega ekkert lýðræði.
---
Þeim hjá Fact magazine liggur á. Þeir eru komnir með 20 platna lista yfir bestu plötur ársins só far. Maður er svo eftir á og hefur bara heyrt þrjár af þessum plötum. Athygli vekur að glæný plata með Hildi Guðnadóttur er á listanum (sem er raðað í stafrósröð).

Hildur Guðnadóttir - Ascent
Without sinking heitir platan. Hildur hefur því miður sagt skilið við frábæra poppið sem hún gerði og söng með Rúnk á sínum tíma og eyðir nú tíma sínum í vandaðan cellóleik og melónkólíska og djúpspaka "klassík". Platan er gefin út hjá Touch í Englandi og það er flott að Hildi sé að ganga svona vel. 
---
Aðrar plötur sem ég hef heyrt af lista Fact er nýja Animal Collective sem er ágæt en er kannski ekki að tala neitt sérstaklega sterkt til mín. Og svo erða nýja platan með Dan Deacon, Bromst.

Dan Deacon - Get older
Dan (1981, Baltimore) hefur dælt út plötum síðustu ár. Bromst ku fullorðnari en fyrri verk (það þýðir að lögin eru ekki jafn glöð og poppuð). Þó er gleðin og poppið ekki langt undan, eins og heyrist á þessu lokalagi plötunnar.

25.03.09 - Fólkið heimtar blóð
Það er nauðsynlegt að hafa alltaf eitthvað til að hlakka til. Það er nú bara svona beisikk lífsregla. Hér er eitthvað til að hlakka til menningarlega, svona fyrir utan Dr. Gunni inniheldur (sem enn er fyrirhuguð 3. apríl): Græna ljósið með 17 mynda bíódaga í apríl. Ég held ég geti ekki annað en mætt á Not Quite Hollywood: The Wild, Untold Story of Ozploitation!, svona vegna gamals áhuga á öllu áströlsku. Síðan er það auðvitað Jónatan Richman á Rósenberg 1. apríl. Hann er stórfenglegur meistari. 4. apríl erða hinsvegar Punk 2009 á Grand rokk. Eldhressir pönkarar spila pönk með tárin í augunum. Kolrössurnar verða með næsta Sýna og sjá á Nýló. Það er annað kvöld. Þær hljóta að ljóstra upp hræðilegum leyndarmálum úr fortíðinni. Kannski eitthvað snardjúsí um Coldplay. Talandi um Coldplay. Ef Coldplay og U2 færu í slag myndi Coldplay vinna. Þeir eru miklu þolanlegri af risabandi að vera. Gera oft skemmtileg myndbönd (eða láta gera fyrir sig). Þetta með gömlu kerlingunni að dansa var flott og svo er hér eitt helvíti flott með brúðum.

Blóð - Icesave
Fréttatilkynning: Dægurpönksveitin Blóð mun gefa út sína fyrstu plötu á jaðarútgáfunni Brak Hljómplötur laugardaginn 26. mars. Platan nefnist Fólkið heimtar BLÓÐ og er hreinskiptin lýsing og gagnrýni á ríkjandi ástand íslensks samfélags. Tónlistin er hrátt, heiðarlegt og kraftmikið nýbylgjupönk sem fær hörðustu afturhaldsseggi og nýfrjálshyggjusmjörkúka til að hugsa sinn gang. Platan er unnin hratt og fóru upptökur fram í síðustu viku og hljóðblöndun fór fram í gær. Brak fær svo 3 daga til að framleiða plötuna og koma henni í valdar verslanir.
Blóð ætlar að fagna útgáfunni með útgáfutónleikum á Grand Rokk á laugardaginn. Morðingjarnir munu hita upp og það verður frítt inn. Platan verður til sölu á skít og ingenting og léttar veitingar í boðinu. Blóð og Brak hvetja alla áhugasama um gagnrýna pönktónlist til að láta sjá sig. Blóð á mæspeisi.

24.03.09 - Músik og gras
Hin æsandi deströksjón hljómsveit Reptilicus varð tvítug í fyrra. Á mæspeisi þeirra má heyra glænýtt lag efst á pleier, "Time before present in millions of years".
---

Cosmic Call - Cold hands
Akranesrokkið er ekkert að lúta í gras. Nýjasta útflutningsafurð Skagans er Cosmic Call sem hét áður The Pet Cemetery. Bandið varð í öðru sæti á eftir Agent Fresco í Global Battle Of The Bands 2008 og þar á undan tók það þátt í tónlistarkeppninni í framhaldskólanum sínum á Akranesi. Þau eru nýbúinn að klár Ep plötu í Sýrlandi sem kemur út á næstu vikum. Platan heitir eftir bandinu, Cosmic Call. Frekar á mæspeisi.
---

The Dead Weather - Are Friends Electric
Jack White átti sinn tíma í sólinni. Mér fannst hann óþarflega óáhugalaus á tónleikum White Stripes í Laugardalshöll, en síðan er hann búinn að spila og spila, t.d. með Raconteurs sem er ekkert spes, og er dáldið orðinn bensínlaus og hjakkrænn. Nýjasta nýtt er súpergrúppan The Dead Weather. Þar spilar hann á trommur en aðrir eru Alison Mosshart (The Kills), Dean Fertita (úr Queens of the Stone Age) og Jack Lawrence (úr The Raconteurs). LP platan Horehound kemur í júní, en einn síngull er kominn út. Á b-hliðinni er þessi ljómandi fína útgáfa af slagara meistara Garys Numans. 
---
Mér þykja grasreykingar ekki kúl en ef gras og áfengi færu í slag myndi gras vinna því kannabisvíman er ekki ofbeldishvetjandi, pissíbuxurnarhvetjandi, ælasigallanúthvetjandi og liggjaíþynnkuogþunglyndihvetjandi, eins og hið hundleiðinlega en löglega áfengi. Svo ef Björk í Bankastræti væri með gras í neytendavænum poka frá Esjumelum (og ég tala nú ekki um frá exótískari stöðum) þá myndi ég eflaust kaupa mér smá fyrir gamlárskvöld. Glætan að maður myndi nenna að steina sig oftar en það, enda finnst mér gleðin langbesta víman eins og Pálma.

22.03.09 - Satan raðar ekki í hillur
Einhver Howlingtypewriter, líkast til löngu gleymdur pennavinur minn frá 9. áratugnum, er að bjóða upp eldgamalt efni með S.H.Draumi á Ebay. Bensín skrímslið skríður, GOÐ með öllum 4 Stebba Gríms límmiðunum ólímdum, Drap mann með skóflu og einhverja spólu Benzine & Blood demo sem mig rámar bara í, en hef væntanlega búið til í útrásarskyni. Eintak nr. 9 af 15! Einstakt tækifæri til að bjóða í sjaldséð stöff! Ætti að fást hundódýrt.
---
Sumir leggja á sig ferðalag í Fjarðarkaup í Hf til þess að sleppa við að styrkja Satan og hyski hans hjá Högum. Ég er ekki alveg svona hardkor klikkaður en fór engu að síður í FK í gær enda er þetta flott búð og mjög gaman að koma þarna. Rosa mikið af fólki og svona stemmning, sem aldrei er í Bónus. Fjarðarkaup er eiginlega eins og að versla í fortíðinni. Og fortíðin var miklu betri en nútíðin, eins og fólk veit, eða veit ekki. Aldrei að vita nema maður fari aftur fljótlega, ekki endilega þó til að losna við Satan, enda finnst mér bæði Bónus og Hagkaup fínar búðir og set það ekki fyrir mig þó Jón Ásgeir sé með bæði gamlan og nýjan kúk í buxunum, enda kemur reksturinn á þessum búðum honum ekkert við. Hef allavega aldrei séð hann raða í hillur. En allavega. Tékkaði líka á stórverslun Bauhaus. Þar er allt tilbúið og bara eftir að fylla allt af hræbillugu drasli frá Germaní. Skrýtið að sjá svona risa hús svona gjörsamlega dautt. Hvenær koma Þjóðverjarnir og bjarga okkur úr fákeppninni? Aldrei?
---

Dee Mullins - I am the grass
Enn á ný mætast sækadelían og kántríið, nú hjá Dee Mullins, kántrígaur sem var of heví fyrir Nashville. Það er Omni Recording Corporation sem hefur gefið út safnplötu með löngugleymdum meistaraverkum Dees, og sama fyrirtæki gefur út lögum hlaðna tvöfalda safnplötu, Plantation Gold, þar sem margt er álíka súrt, ef ekki súrara, en Dee. Eðal eðall.

Wavves - So bored
Nathan Daniel William kallar sig/bandið Wavves, er 22ja og gusar út hráum skít á Fat Possumútgefnu plötunni Wavves. Hann hefur tekið "bloggheima" með trompi og af gaur með lasið upptökutæki og últrahráan skít má hann vel við una. Hans speis.

Dum Dum Girls - Ship of love
Meira lófæ/nófæ, nú frá Dum Dum Girls frá LA, sem er víst ein stelpa sem heitir Dee Dee og vinnur á bókasafni. Nú erða skógláp með örvingluðum trommuheila. Hefði pottþétt fengið að vera með á Snarl 4. Hennar speis.

Woods - The Dark
Eins og DDGirls, er Woods gefið út af Captured Tracks í Brúkklin. Súper dúllulegt amerískt indípopp og maður er ekki viss af hvaða kyni söngvarinn/konan er. Af 7" en Lp platan Songs of Shame ku alveg að koma út. Þeirra speis.

21.03.09 - Íslenski draumurinn
Stundum er talað um klappstýrur útrásarinnar, en ég heyrði á tal tveggja gaura sem frekar má segja að hafi verið flöfferar útrásarinnar. Þeir voru langt í frá ánægðir, eiginlega drullufúlir, töluðu um að næstu ár yrðu ömurleg út af því að kommahelvíti myndu taka hér yfir og banna klám og bjórinn aftur og vælivæl, en svo myndi þetta fara að lagast upp úr 2013 og þá væri kannski aftur hægt að fara að flöffa í flottræfilsveislum í Monte Carló, eða hvar sem þessir FMhnakkar á hestasterum báru niður með loftbólulottópeningana sína. 
---
Auðvitað var það skemmtilegasta við "útrásina/góðærið" að fylgjast með hinum nýríku spreða illafengnu fénu í fávitadelluna. Björgólfur Thor, Hannes, Jón, allt þetta lið, hinir nýríku, voru beisiklí með andlegt atgervi FMhnakka, FMhnakka sem duttu í lukkupottinn. Eða hvað myndu FMhnakkar ekki gera ef þeir væru allt í einu ógeðslega ríkir? Láta 50 Cent spila í afmælinu sínu á Jamaika? Taka þátt í kappakstri? Halda svona fávitapartí í Monte Carlo? Nú vil ég auðvitað ekki vera með nein leiðindi í garð FMhnakka þótt ég líkji föllnum flottræflum við þá. Ég er ekkert svo viss um að FMhnakkar séu til lengur, nema þá helst á Suðurnesjum. FM er dúndur útvarpsstöð sem ég hlusta oft á, enda oft frábær hnakkamúsik í gangi þar, sem virkar sem andlegt amfetamín (maður verður reyndar að slökkva þegar koma ballads og oftast þegar einhver byrjar að tala), og ég er meira að segja svo góður við hnakkana að ég tileinka þeim lag á plötunni minni næstu. Kannski maður ætti því frekar að líkja þessum föllnu nýríku við Tóta í Íslenska draumnum, þeirri stórfenglegu mynd. Þetta lið er bara eins og Tóti í 10.000 veldi. Og niðurstaðan er sú sama hjá báðum. Ég held að Ríkissjónvarpið gerði vel í því að endursýna Íslenska drauminn um þessar mundir.
---
Eftir að "þjóðin" hefur lamið á ríkisstjórninni og eftirlitsstofnunum hlýtur hringurinn að fara að þrengjast um þá sem raunverulega "bera ábyrgð á hruninu", þ.e. þessa 20-50 aðalvondu og gráðugu sem oft hefur verið talað um. Væri ekki ráð að koma upp wanted-plaggati með þessu liði? Hvað á svo að gera við þetta vesalings fólk, þ.e. ef það verður fundið sekt um eitthvað annað en að hlíta "leikreglum kapítalismans"? Fylla öll fangelsi landsins af þessu? Eru nú gustuk að eyða meira af ríkisfé í þetta lið? Opinber réttarhöld læf í Kastljósi og svo gapastokkur á Arnarhóli, fylgt eftir með Pol Pot-ískri endurhæfingu? Ég spái svipaðri niðurstöðu í þessu og í olíusamráðsmálinu. Einhver Þórólfur tekur sökina á sig og hinir sleppa flissandi út í nóttuna. Þannig er Ísland. Eða kannski ekki. Vonandi ekki. Ekki að manni sé einhver fróun í að vita af FMhnökkum í grjótinu, en er þetta ekki bara spurning um RÉTTLæTI!?
---
Ég má alveg vera með í grátkórnum og segi því líka: SVONA EFTIR Á AÐ HYGGJA ÞÁ MÁ KANNSKI SEGJA AÐ ÉG hefði nú ekki átt að... (svínast eins of fífl) og frekar átt að...(vera betri manneskja og ekki svona helvíti mikið fífl og gráðugur).
---
Það er engin fokking kreppa í rokkinu. Hljómsveitin Reykjavík! hefur sent frá sér æsandi myndband tekið upp á ljósritunarvél! Inga Mæja hans Bóasar gerði þetta með Hrönn vinkonu sinni. Ég heyrði lag með hljómsveitinni Sing for me Sandra í útvarpinu. Það var drulluflott. Takið eftir því að ég hneykslast ekki yfir því að þeir skuli ekki syngja á íslensku. Why bother? Menn syngja ekki á íslensku nema þeir geti það. Sudden Weather Change gefa út plötuna Stop! Handgrenade in the Name of Crib Death 'nderstand? í apríl. Verður eflaust klassi.
---
Sjálfur get ég ekki staðið við áður tilkynntan útgáfudag plötunnar Dr. Gunni inniheldur. Reynum frekar FÖSTUDAGINN 3. APRÍL KL. 08:00.

19.03.09 - Grams
Gríðarlegur plöturúntur var farinn á þriðjudag með afmælisbarni dagsins í dag, Steini Skaptasyni. Fyrst var rúntað um hið frábæra Úlfarsárdalshverfi, þar sem óraunhæfar væntingar Íslendinga (Eurovision-bjartsýni) hafa náð hærri hæðum en nokkru sinni fyrr. Eftir standa 136 íbúðir í byggingu og 720 tómar lóðir, samkv. góðri grein í Mbl á mánudag. Það er áhugavert að dingla um hverfið og hugsa um íslensku þjóðarsálina.
Næsti viðkomustaður var nytjamarkaður Samhjálpar, Stangarhyl 3. Sá er góður, mikið af drasli til, ekki síst vegna þess að þangað er kominn eldgamall lager frá búsáhaldabúð Þorsteins Bergmanns, sem er enn ofarlega á Skólavörðustíg (held ég). Vinýlplötur voru af skornum skammti og bara drasl. Ég spurði starfsstúlku hvort ekki væri meira til og hún sagði að svo skemmtilega vildi til að Villi Svan væri með fullan bílinn af plötum sem einhver hefði verið að gefa Samhjálp. Þetta stóð heima, en Villi vildi þó grípa nokkrar gersamar úr kössunum áður en hrægömmunum var hleypt í þá. Þetta voru sirka sex pappakassar, ekki vildi Villi segja hvaðan þeir kæmu, en fullir af góðgæti voru þeir. Okkur Steini grunar (eftir loðin svör Villa) að plöturnar komi úr safni útvarpsmannsins frábæra Guðna Má, en sagan segir safn hans risavaxið. Ég varð að hemja mig, en lét þó slag standa og keypti allar Bítlaplöturnar sem ég átti ekki, samtals 10 stk. Þetta var allt vel með farið og nánast óspilað. Ég á því Bítlana komplett á vinýl núna og get hellt mér í áframhaldandi Bítlaæði. Þegar heim var komið sá ég með því að rannsaka plöturnar (svokölluð matrix númer á innri hring) að þetta var allt úr komplett vinýlkassa Bítlanna sem gefinn var út 1978. Það er nú alveg nógu gott. Maður er ekki ennþá það geðveikur að þurfa að eiga eintök úr fyrstu pressun... en sú sturlun gæti komið síðar með tilheyrandi fjárútlátum, stereo og mono og rugl. Af Villa Svan keypti ég líka óspilað eintak af plötunni John Lennon/Plastic Ono Band frá 1970 (komplíterun á sólóplötum Johns er þar með formlega hafin) og vel með farið eintak af þriggja platna albúmi Clash, Sandanista (fullt af rusli en glæsilegt efni inn á milli). Ég mæli heilshugar með Samhjálparmarkaðinum. Hann er mun betri en hinn alltof vinsæli Góði hirðir. 
Frá Samhjálp fórum við í Hjálpræðisherinn út á Granda. Þar var jafn lélegt plötuval og síðast þegar ég kom þar, en engu að síður greip ég tvær með mér enda verðið hagstætt, 100 kr stk. Kings of the Wild Frontier með Adam & Maurunum og eitthvað algjört fágæti, samnefnda plötu með hljómsveitinni La Loora frá 1985. Eftir því sem ég kemst næst er bandið frá Berlín og gerði split plötu með Psychic Tv síðar á ferlinum. Herinn er mjög furðulegur staður til að finna svo sjaldséða plötu.
Góði hirðirinn er eins og áður segir orðinn alltof vinsæll og þar er allt almennilegt jafnharðann rifið út á ógnarhraða. Því var ekkert keypt þar, en rennt yfir kassana á hröðu tempói. Í lokastöð túrsins, nytjamarkaði ABC barnahjálpar í Faxafeni 8, fann ég óspilað eintak af Hana nú með Villa Vill, úr fyrsta upplagi og m.a.s. með textablaði á fjölmörgum samanheftuðum A4-blöðum. 200 kall + 100 kall fyrir Einkalíf á vhs, en ég kem við sögu þar í sándtrakkinu. Niðurstaða: Gríðargóður gramsdagur.
---
Marc Ravalomanana, forseti Madagasgar, kemur sterkur inn í flokk fyrirmenna með asnaleg nöfn. Fyrir er fólk eins og Búdrosdrosgali, Hælassílassí, Svangiræ og Ólafur Ragnar Grímsson.

18.03.09 - Dr.Gunnasetur vígt

Dr. Gunnasetur var formlega vígt í gær, í glæsilegu húsnæði í Úlfarsárdal. Við sama tækifæri komst upp um sýninguna Mestu krummaskuð Íslands eftir Dr. Gunna. Verkið verður sýnt í Dr. Gunnasetri þar til einhver rífur það niður (eða setrið verður fjarlægt). Dr. Gunnasetur er opið allan sólarhringinn. Ókeypis inn. Næg bílastæði.

17.03.09 - Gó við ðe fló
Tónlistarsíðan Rjóminn er lox orðinn fugl og fiskur og hefur tekið upp bloggformið. Ætti að vera reglulegur viðkomustaður músekáhugafólks.
---
Símauglýsingin með Hilmi Snæ er einstaklega misheppnuð. Hún er löng og últraleiðinleg og eintómt bull, eins og má t.d. lesa hér. Mamma mín þolir ekki þessa auglýsingu og fór að tala um það að fyrra bragði. Lufsan þolir hana ekki (auglýsinguna, það er) og bara allir sem maður talar við. Síminn er á hálum ís. Fyrst með misheppnaðri herferð þar sem heimskan og fávitaskapurinn sem kom þjóðinni á vonarvöl er hafin til skýjanna á kostnað aðeins gáfulegra sjónvarpsefnis, og svo þetta drasl með Hilmi. Ég er alvarlega að spá í að segja þessu fyrirtæki að fokka sér og snúa mér annað. Verst að þessi símabransi er svo geðveikt flókinn og illskiljanlegur. Þetta er eins og með bankakerfið. Erfitt, og eiginlega útilokað, að komast að því hvaða apparat býður best. Ef einhver býður þá betur en annar. Svo er líka alltaf verið að skipta um eigendur á þessu drasli og Tal orðið að Vódafón orðið að Blabla og það sem maður samdi um orðið allt öðruvísi.
---
Bubbi hótar að gefa út plötur. Nei ég meina, hætta að gefa út plötur. Varðandi þessi mál vil ég segja eftirfarandi: Stafræna byltingin verður ekki kæfð. Það er álíka vonlaust að reyna að læsa stafrænu efni og að reyna að gera vatn ekki blautt. Því verður maður bara að fljóta með straumnum. Finna leiðir til að aðlaga sig nýju umhverfi. Ekki væla um tekjumissi og hóta að hætta. Fylgist með þegar dr. Gunni inniheldur kemur út. 

16.03.09 - Sýrukántrí
Iss piss. Ekkert varð af fyrirhugaðri masteringu í gær því annars ágæt tölva sem hefur alveg verið til friðs ákvað upp úr þurru að nenna þessu ekki lengur og slökkti á sér. Reynt verður aftur eftir viku að viðgerð lokinni. Útgáfudagur 26. mars er því frekar vafasamur, en hann er allavega on þar til annað kemur í ljós. Í frústrasjón minni fór ég í Kportið og keypti Crimes of Desire með Pat Benatar á 100 kall og best of safnplötu frá 1987 með Tommy James & The Shondells á 300 kall. Þrátt fyrir að eiga gommu af hitturum hafa Tommy James and the Shondells nokkuð gleymst í seinni tíð og njóta varla sannmælis. Ágætur staður til að hefja könnun er náttúrlega wiki. Eitt af ótrúlega flottustu lögunum með bandinu er þetta frá 1968:

Tommy James and the Shondells - Crimson & Clover
Við erum að tala það undarlega svæði þar sem sækadelía og kántrí mætast. Tommy náði hinum fræga víbrandi effekt á röddina í enda lagsins með því að syngja í gegnum gítarmagnara með tremelóið á fullu. Lagið er margnotað í bíómyndum, en einna flottast var það í myndinni Monster með henni þarna Theron sem lesbíska mellan og fjöldamorðinginn. 

The First Edition - Just Dropped In (To See What Condition My Condition Was In)
Hér er annað frá 1968, sem var greinilega gott ár fyrir sækadelískt sýrukántrí. Þetta er náttúrlega gargandi snilld líka. Kenny Rogers og félagar í The First Edition, band sem spilaði aðallega plein kántrí. Lagið er líka frægt úr bíómynd, það hljómaði eftirminnilega í The Big Lobowski. Þetta var eina sækadelíska lagið með First Edition en Tommy James og félagar voru mikið á þessum slóðum, ekki síst á plötum frá 68 og 69, Crimson and Clover og Cellophane Symphony. Á henni er titillagið 9.39 mínútur af hippískri tyggjósýru og speisi. Dáldið svona poppgaurarnir að reyna að vera hefí. Púristum hefur þótt þetta arfaslakt (nálgist af eigin ábyrgð):

Tommy James and the Shondells - Cellophane Symphony
---
Hvað skal segja um pólitík helgarinnar? Kannski helst að mér finnst Katrín Jakobsdóttir vera langflottasti fulltrúi minn á þingi í dag. Horfði á hana hjá Jóni Ársæli og ég ætla að byrja að versla aftur í Melabúðinni bara af því hún segir að það sé svo frábært. Ég hætti því á sínum tíma vegna okursins. Tæplega tveggja ára straff af minni hendi er alveg nóg. Bjarni Ben minnir mig aftur á móti á fnæsandi graðfola og Sigmundur Davíð, sem fékk fljúgandi start sem klári gaurinn sem röflaði hjá Agli Helgasyni, er orðinn gamall og leiðinlegur karl. Svo er það vitanlega hneyksli að Grími Atlasyni skyldi ekki ganga betur í örforvali VG á N-V-landi.

15.03.09 - Dr. Gunni inniheldur masteruð
Í dag í austantjaldslegum húsakynnum á Akranesi fer fram lokapússun og svokölluð mastering á hljómplötunni Dr. Gunni inniheldur. Um er að ræða eina bestu hljómplötu mína til þessa, 18 laga stórvirki sem þó nær ekki 40 mínútum í lengd. Afhverju að vera að hanga eitthvað yfir þessu? Hljómplatan kemur út fimmtudaginn 26. mars kl. 08.00. Boðið verður upp tvenns konar kaupleiðir: a) niðurhal á 1000 kall eða b) niðurhal (ef vill) + CD í veglegu umslagi á 2000 kall. Diskurinn, sem verður gefinn út í 300 tölusettum og árituðum eintökum, verður sendur heim til fólks. Hann mun eflaust fást í nokkrum plötubúðum líka. Þann 26. mars er nýtt tungl, svokallað páskatungl. Dagurinn er líka þjóðhátíðardagur Bangladesh, Prins Kuhio dagurinn á Hawaii og andlátsdagur Nikki Sudden, gítarleikara Swell Maps (2006).

14.03.09 - Bíópikks
Ég er löngu búinn að kjósa í forvaldi Samfylkingarinnar. Man ekkert hverja ég kaus. Örugglega bara það fólk sem mér leist best á og var minnst jakkafatakerfislegt. Flokkurinn hafði uppi lágmarks bögg á mig. Einhver á vegum Steinunnar Valdísar hringdi í mig og svo Mörður Árnason sjálfur, sem mér fannst nú meira grand en að láta einhvern aðstoðarmann sjá um þetta. Báðum gat ég sagt að ég væri búinn að kjósa á netinu og því þýddi ekkert að bögga mig.
---
Horfði á Backbeat aftur í gær. Það er helv góð mynd, eða svona. Náttúrlega næntíslega væmin á köflum (Stuart og Astrid að ríða í málningu við saxófónsóló), en lúkkið er frekar oðentik, sýnist mér. Allavega eru allir með rétt hljóðfæri og maður kaupir þetta alveg. Það er eitthvað við þetta tímabil í sögu Bítlanna sem er svo spennandi. Þegar þetta voru bara einhverjir strákar sem maður hefði getað nálgast og spjallað við í pásu, þ.e.a.s. ef maður hefði verið í Hamburg 1961. Það yrði fyrsti viðkomustaður í tímavélarferðalaginu. Þetta er flott örlí Bítlamyndasíða.
---
Ég er nokkuð áhugasamur um það sem er kallað biopic á ensku, en líklega leikin heimildarmynd á íslensku. Á flakkaranum bíður Cadillac Records, ný mynd um blúsinn og rokkið í Chicago fiftís. Fínar músik bíópikks sem ég man eftir eru t.d. Ray, Walk the Line, The Doors, What’s Love Got to Do with It, La Bamba, Control, jafnvel Sid & Nancy. Hér er greinin Music Biopics: What's Been Done, What's In The Works, & What We Want. Á Íslandi erum við með myndina um Jón Leifs, Tár úr steini. Maður var nú í engu stuði fyrir hana á sínum tíma. Spurning um að endurnýja kynnin við tækifæri. Fullt af öðrum spennandi íslenskum bíópikks gætu verið sniðugar. Jökullinn - saga íslenska bítlsins og hipparokksins sögð út frá lífshlaupi Gunnars Jökuls. Móhíkaninn - Rokk í Rvk tímabilið út frá Bjarna Móhíkana (b.s.m.h). Morthens - Sögur Hauks og Bubba, blandaðar saman við dramatíska atburði úr eftirlífinu (í framleiðslu 2090). Það er allt hægt ef fólk nennir og vill.

13.03.09 - Besta umslag í heimi?

XTC - Battery brides (Andy paints Brian)
Ég hef löngum haft óeðlilega mikið dálæti á hljómsveitinni Xtc frá Swindon. Eða alveg frá svona 1979 (eða1980) þegar ég keypti smáskífu með laginu Are you recieving me á útsölumarkaði Steina í Iðnaðarmannahúsinu við Hallveigarstíg. Tvær plötur eru í uppáhaldi, önnur og þriðja platan, Go 2 (1978) og Drums and wires (1979). Eftir það varð bandið full poppað fyrir minn smekk en maður hélt samt tryggð við það. Ég á allt sem bandið hefur gefið út af stúdíóplötum, en nenni ekki alveg að eltast við bútlegga og allskonar demóplötur og dót sem gefið hefur verið út í miklu magni. Bandið var á svaka flugi þegar sviðsskrekkur söngvarans, gítarleikarans og aðalmannsins Andy Partridge, fór alveg með hann. Hann fékk kast og bandið hefur ekki komið fram á tónleikum síðan, nema hugsanlega smá unplöggd í seinni tíð. Á væntanlegri sólóplötu minni, Dr. Gunni inniheldur, verður fyrsta tökulagið sem ég syng inn á plötu, þetta hér að ofan af Go 2. ´Það verður sungið á íslensku sem Blindhæð og brú. Ég hef einhverra hluta vegna sönglað þann texta við lagið síðan ég heyrði það. Og loks kemur það út. Eins og sjá má er umslag Go 2 hryllilega smart, hugsanlega besta plötuumslag í heimi. Að minnsta kosti það meðvitaðasta. Það var plötuumslagafabrikkan Hipgnosis sem hannaði.

XTC - A dictionary of modern marriage
Þetta er remix (eða DUB mix eins og það var kallað þá) af laginu að ofan. Það var eitt af sex lögum sem voru á EP plötunni "Go +" sem var gefin út samhliða Go 2 og fylgdi fyrsta upplaginu.

12.03.09 - Inúító!
Hin FK-lega herferð Skjásbíós fer dáldið í taugarnar á mér. Þar er hamrað á því að gamlar drasl myndir á Voddinu eigi að vera mun skemmtilegri en hörku dagskrá um neytendamál og grænlensk ævintýri. Hefði kannski gengið hjá þeim FK en ekki núna EK. Þetta auglýsingalið verður að skilja að það er enginn í stuði fyrir gamla innantóma fávitaskapinn sem manni var boðið upp á endalaust. Er það ekki annars? Ég er auðvitað búinn að skila VOD-lyklinum sem Síminn fór snögglega að rukka 600 kall fyrir á mánuði. Ég notaði þetta aldrei.
---
Það finnst mér alltaf jafn mikið umhugsunarefni hversu lítið við nennum að spá í Grænlandi. Þetta er næsta land við okkur en Grænland er þó menningarlega fjærlægara okkur en Ástralía. Ég væri alveg til í að skreppa til Kulusuk – og hvað þá til Nuuk – en á meðan dagsferðin kostar 50-60 þúsund kall með Flugfélaginu fer ég nú að sjálfssögðu frekar til New York. En það er nettur Inútíi í mér. Hið norðlæga og kalda og dimma er eitthvað sem höfðar til mín. Ég á ábyggilega stærsta safn innanlands af diskum með Inúítasöng, heila þrjá diska. Í nokkur ár í partíum heima hjá mér þótti mér gaman að draga fram diskinn Songs of the Inuit (útg. JVC 1994) og blasta lagi nr. 3 eins hátt og græjurnar réðu við. Þetta eru tvær Inútítakerlingar með "háls-söng" og þetta lag hljómar eins og sambland af Prúðuleikurunum og gríðarstórri eimreið að fara af stað: 

Eligah Mangitak & Qaunnaq Mikigak - Amuma
Konurnar heita Eligah Mangitak og Qaunnaq Mikigak og upptökur fóru fram í Cape Dorset, N.W.T., Kanada 7-8 des 1993. Eins og heyrist er það leikur og afþreying hjá konunum að söngla svona saman. Gleðin skín af þeim, t.d. í næsta lagi þar sem þær þurfa ítrekað að gera hlé þegar þær springa úr hlátri. Frábært stöff!
Eligah Mangitak & Qaunnaq Mikigak - Ihan
---
Dularfulla listaflipphljómsveitin The Residents, sem var lengi frægust fyrir það að enginn vissi hverjir væru í henni, tók Inúíta-arfinn til bæna á plötunni Eskimo (1979). Þeir hafa kannski ekki vitað að það er stranglega bannað að kalla Inúíta Eskimóa, ekki frekar en það má kalla okkur nýríka fávita sem skitu á sig. Ég var með spikfeitann áhuga á The Residents á tímabili og man eftir einni utanlandsferð þegar ég gerði ekki annað en að leita að verkum sveitarinar í plötubúðum. Eskimo fannst mér þó alltaf mjög óaðgengileg plata, enda með endalausum vindhljóðum og djöfulgangi. Hljómsveitin gerði svo diskóútgáfu af Eskimo og kallaði hana náttúrlega Diskomo. Upp með dansskóna!

The Residents - Diskomo
---

Vandaða umfjöllun meistara Þorsteins Joð um mig og Sýna og sjá framtak Nýlistasafnsins má nú sjá á alnetinu (Káta maskínan 6. þáttur). Næstur til að rifja sig upp er Maggi Strump sem tekur einmitt sjálfan sig til umfjöllunar í Nýló kl. 8 í kvöld.
---
Bjartsýniskeppi Rásar 2 er á fullu svingi. Þar keppast menn við að berja sér og hinni svokölluðu þjóð á brjóst. Mitt framlag, "Satan konungur apanna", er auðvitað bullandi bjartsýnt, eða svona. Svona eftir á að hyggja hefði ég getað sent mun bjartsýnni lög af nýju plötunni væntanlegu, til dæmis "Verum góð við hnakkana" eða "Prinsessan mín". En allavega farðu og hlustaðu á þetta og greiddi svo réttu lagi atkvæði.

10.03.09 - Jónatan snýr aftur

The Modern Lovers - I'm Straight (læf '71 eða '72 (ekki vitað) í Harvard)
Eins og alþjóð veit (eða svona) er Jonathan Richman á leið að heimsækja oss í 3ja skipti (sjá fréttatilk hér að neðan). Jonathan er frábærlega æðislegur og ég ætla vitanlega að mæta. Ferli hans má mjög lauslega skipta í tvennt og er ég í gríðarlega stuði fyrir fyrri helminginn, þó sá seinni sé fínn líka. Sá fyrri miðast við það þegar hann söng með hljómsveitinni The Modern Lovers, sem var á hvílíkri eyðimerkurgöngu að varla hefur annað eins gerst fyrr né síðar. Eftir að hafa hangið sem unglingur í Factory Andy Warhols verandi sá geðsjúki Velvet Underground aðdáandi sem hann var, stofnaði Jonathan The Modern Lovers með vinum sínum í Boston. Þar á meðal var Jerry Harrison (lengst til vinstri), síðar gítarleikari Talking Heads. (lesa um bandið á wiki). Á þessum hippísku árum var Jonathan stutthærður (sjá mynd, lengst til hægri) og söng um hluti sem aðrir snertu ekki á með töngum, t.d. um það að vera ódópaður og með fullri rænu og reynandi við gellu sem vill frekar vera með hinum útúrstónd Hippí Johnny í hinu geðsjúklingslega frábæra lagi I'm straight. Bandið tók upp stöff, bæði með John Cale og Kim Fowley, á árunum 71 og 72 en það kom ekki út á plötu fyrr en 1976 og smellpassaði þá við pönktíðarandann, enda varð Jonathan fyrst svalur þá. Þá var hann hins vegar byrjaður á tímabili 2, "barnalega og rómantíska tímabilinu", sem hann er búinn að vera á síðan. Sem sé, búinn að leggja rokkbandinu og kominn í trúbadorfíling. Ég keypti tvöfalda plötu á vinýl fyrir nokkrum árum, Live at the Longbranch and more, þar sem safnað er saman ML upptökum frá 71 og 72. Þar er m.a. þessi útgáfa af I'm straight þar sem hippinn heitir Hippie Ernie (bassaleikarinn í bandinu heitir Ernie Brooks - tilviljun?) og kannski er meira dýpt í flutningi textans því Jonathan er í miðjum klíðum að fást við þessi flóknu ástarmál. Textinn er miklu betri í þessari útgáfu, en svona er hann eins og hann var á stúdíóplötunni:

I'm Straight

I called this number three times already today
But I, I got scared, I put
It back in place, I put my phone back in place.
I still don't know if I
should have called up.
Look, just tell me why don't ya if I'm out of place.
'Cause here's your chance to make me feel awkward
And wish that I had
never even called up this place.
I saw you though today walk by with hippie Johnny.
I had to call up and say how I want to take his place.
So this phone call today conerns hippie Johnny.
He's always stoned, he's never straight.
I saw you today, you know, walk by with hippie Johnny.
Look, I had to call up and say, I want to take his place.
See he's stoned, hippie Johnny.
Now get this, I'm straight and I want to take his place.
Now look, I like him too, I like hippie Johnny.
But I'm straight
and I want to take his place.
I said, I'm straight
I said, I'm straight
I'm proud to say
Well I'm straight and I want to take his place.

Now I've watched you walk around here.
I've watched you meet these
boyfriends, I know, and you tell me how they're deep.
Look but, if these guys, if they're really so great,
tell me, why can't they at least take this place
and take it straight? Why always stoned,
like hippie Johnny is?
I'm straight and I want to take his place.
Oh I'm certainly not stoned, like hippie Johnny is.
I'm straight and I want to take his place.
I said, I'm straight
I said, I'm straight
I'm
I'm straight and I want to take his place
All right you Modern Lovers what do you say?
(I'm straight!)
Tell the world now
(I'm straight!)
I said
(I'm straight!)
Yeah I'm straight and I want to take his place.

Og hér er fréttatilkynningin:
Miðasala á Jonathan hafin.
Hann spilar á Kaffi Rósenberg 1. apríl.  Hús opnar kl. 20 og tónleikar byrja kl. 21.
Ólöf Arnalds hitar upp.
200 miðar í boði - bara 2000 kall inn! www.midi.is
Jonathan flytur sjálfan sig inn! Grímur Atlason hjálpar bara uppá gamlan kunningsskap...
Jonathan Richman er tónlistarmaður sem hefur haft gríðarleg áhrif tónlistarmenn frá því að hann kom fyrst fram með hljómsveit sinni The Modern Lovers í kringum 1970. Sveitir eins og Sex Pistols tóku lög eftir Jonathan og eru margir sem muna eftir Road runner í flutningi þeirra.
Frægastur er Jonathan Richman þó líklegast fyrir þátt sinn í kvikmyndinni There is Something about Mary frá árinu 1998. Þar sá hann um tónlistina og kom fram ásamt trommuleikaranum Tommy Larkins sem spilar með Jonathan á Íslandi.
Jonathan Richman þykir einstaklega skemmtilegur á sviði eins og fjölmargir Íslendingar sáu á Innipúkanum 2005 þegar Jonathan og Tommy slógu í gegn.

09.03.09 Ríkir karlar með skítinn upp á bak
Hvað heldurðu að maður nenni að hanga endalaust yfir þessum fréttum af ríkum körlum með skítinn upp á bak? Trilljón í mínus þar og skrilljón þar. Ég verð ekki áhugasamur um þetta fyrr en fréttirnar af fangelsun og almennri niðurlægingu fara að dynja yfir. Ég mun alveg nenna að horfa á þessa drjóla alla leidda út úr löggubílum í handjárnum. As if. Eva Joly er mál málanna. Hvað haldiði að þessi sérstaki saksóknari, strákurinn með gleraugun á Akranesi, geti í alla þessa hákarla? Auðvitað á að fara að ráðum Evu, búa til massa teymi hryllilegra snillinga til að taka á svíðingunum gráðugu. Fólk verður alveg spinnegal þegar það ræðir um þetta sín á milli. Afhverju þurfum við að borga skuldir óreiðumannanna, frussar það í réttmætri reiði. Best er því að sleppa alveg að ræða þetta. Blóðþrýstingurinn, sjáðu til. 
---
Fínt er að Ingibjörg sé hætt við. Hún var búin með allt gúddvill nema hjá þeim æstustu í aðdáendaklúbbnum. Ég vona samt innilega að henni batni. Hef ekkert á móti henni sem manneskju en hún var leiðinlegur stjórnmálamaður. Alltof glottandi sjálförugg eitthvað og mikið rugl á henni. Öryggisráðskjaftæði og ekki þjóðin. Er búinn að kjósa hjá Samfokk. Kaus bara nýtt lið og liðið sem hafði böggað mig minnst. Þetta er eins á indverska matsölustaðagötunni Brick Lane í London. Fyrir utan staðina standa karlar og reyna að fá mann inn með ömurlega leiðinlegu böggi. Við átum þar sem enginn var fyrir utan. Ég kaus líka í forvali VG, sem ég mun að öllum líkindum greiða vesælt atkvæði mitt á endanum, þó ekki nema vegna þess að flokkurinn var byrjaður að tala um Græðgisvæðingu áður en það var vinælt catchphrase hjá öllum öðrum flokkum líka. Á þeim tíma sagði Geir Haarde að hann missti ekki svefn þó einhverjir strákar væru að fá skrilljón á mánuði - "Þeir bera svo mikla ábyrgð, sjáðu til". Eh, einmitt. En ó, ég ætlaði ekki að ræða þetta. Blóðþrýstingurinn, sjáðu til. En VG, já. Ánægjulegt að sjá hressar konur raða sér í efstu sætin. Nú er kynjakvótinn frekar hlægilegur. Sérstaklega ef óspennandi menn eiga að fara að græða á honum á kostnað mun meira spennandi kvenna. 
---
Já sko! SATAN KONUNGUR APANNA, eitt af lögunum 18 af Dr. Gunni Inniheldur er komið í úrslit í Baráttu- og bjartsýnissöngvakeppni hins nýja lýðveldis - sönglagakeppni fólksins á Rás 2. Ég ætla rétt að vona að fólk verði duglegt að greiða þessu ótrúlega æðislega lagi atkvæði því vinningshafinn fær gjafabréf frá verslun ZO-ON ICELAND í Kringlunni að verðmæti 150.000,-. Ekki að mig vanti endilega útvistafatnað, en bara svona, þú veist... Gamla græðgin!

08.03.09 Eva María og finnsku tippin 
Mogginn hefur verið undirlagður af mér um helgina. Á að henda Dr. Gunna á haugana? stóð á baksíðunni í gær. Það var verið að ræða um plötulager Smekkleysu, en þar eru eflaust svona 700 Stórir hvellir óseldir. Það má alveg henda þeim mín vegna. Greinilegt offramboð á þeirri annars ágætu plötu. Ég held hún hafi selt 300 eintök topps. Í dag er ég með "myndaalbúmið". Mogginn hefur ákveðið að blörra tillana á Finnunum Keuhkot og Radikanen (trommara Radiopuhelimet) og er það dáldið fyndið. Ég hélt tillar væru ókei eins lengi og þeir væru ekki í bullandi standpínu og þar að leiðandi orðnir dónalegir og ógn við femínísk gildi. Til að bæta upp fyrir velsæmi Moggans koma hér tippin sem vantaði. Mjög listræn mynd, finnst mér:

---
Velvakandi er algjörlega undirlagður í umræðu um Evu Maríu. Ég tók eftir þessu fyrir mörgum dögum og ennþá í dag eru 3 af 5 lesendabréfum um hana. Hvaða andskotans smáborgarateprur eru að standa í því að dissa hana Evu? Svei attann! Ég tek undir allt sem "Greiðandi nefskatts" segir í sínu skemmtilega innleggi:

---
Fór með krakkana mína til Kef í gær að heimsækja Heiðu og kó. Alltaf finnst mér jafn exótísk að koma inn á gamla Varnarsvæðið. Fæ ekki nóg af því. Á markaði körfuboltaliðs Kef í Samkaupum voru tveir kassar með vinýl. Heiða komst í feitt og dró heim 10 plötur, nokkrar orginal David Bowie plötur og annan góðan skít. Sjálfur fékk ég Feline með Stranglers á 200 kall og hefði keypt fyrstu plötuna með Generation X líka ef það hefði ekki verið plata með Steve Miller band í nærbuxunum.

07.03.09 Gamla módelið vs. nýja
Það þarf fólk til að draga hlutina áfram. Framkvæmdamenn. Manni finnst þessir gömlu góðu krúttlegir. Maður vill fá nýja svona inn. Menn eins og Davíð Scheving í Sól, Halldór í Henson, Tomma í Búllunni, Guðfinn í Bílasölu Guðfinns, svo tekin séu ósamstæð dæmi. Gamla módel kapítalískra athafnamanna. Viðskiptamódel þeirra er skiljanlegt. Þeir meika sens. Jú jú, þeir kjósa eflaust XD og hafaða flott, safna kannski málverkum og eiga 2-3 kagga, en þeir eru ekki krepptir í framan af fyrrtri græðgi eins og nýja módelið sem kom þjóðinni á hausinn. Það lið skapaði ekki neitt - nema frauð sem fuðraði upp á endanum. Og eilífa skömm fyrir sjálfa sig.
---
Talandi um. Aumingja Sigrún Davíðsdóttir að standa í að greiða úr þessari flæktustu gítarsnúru Íslandssögunnar. Ætli sjálfur gamli skemmtanastjórahelmútinn viti jafn mikið um öll þessi skúffufyrirtæki sín og hún? Ég blakka út þegar þvælan um 18 skúffufyrirtæki í Cayman og Tortola og Lúxemborg og bla bla bla byrjar. Þótt það sé skýringarmynd.

06.03.09 - Viceroy
Fínt gigg í gær. Ég að rifja mig upp í Nýló. Ég hætti að rekja söguna 1999 með dauða Ununar. Upp úr því tók líf mitt nýja stefnu. Harkinu var endanlega lokið. Hokrinu líka. Kynntist Lufsunni, svo komu börnin og hinn svokallaði æðri tilgangur. Ég hef líkt þessu við að færast upp á borð 2 í tölvuspilinu Líf þitt. Maður nennir ekki aftur að spila borð 1 á borði 2. Samt gaman að kíkja á það annað slagið. Ég er nostalgískur. Hver er það ekki? Ég er enn að leita að tímaritinu Fréttir frá Sovétríkjunum. Þó ekki væri nema eitt tölublað. Hvorki Bókin né Gvendur Dúllari áttu þetta. Ég bind vonir mínar við dularfulla bóksalann á Hjarðarhaga, þessum í kjallaranum. Ég hef kíkt inn um gluggann, það er fullt af bókum þarna en aldrei opið. Miði í glugganum með opnunartíma hefur verið fjarlægður. Dó karlinn? Veit einhver eitthvað um þetta?!
---
Allt í gangi. Nóg að gera. Dr. Gunni inniheldur - hvíta albúmið mitt - er handan við hornið. Biggi situr sveittur við mix as ví spík. Sjálfur sit ég sveittur við skriftir á túristabókinni Top 10 Reykjavík and Iceland (útg, maí). Svo voru tvær stelpur úr Elektra hér í heimsókn. Ég hef samið handa þeim næsta hittara. Við vorum að berja saman texta. Lagið heitir kannski "Klifurjurt". Svo er ég víst kominn (aftur) á Feisbúkk en skil minnst í því hvernig það fúnkerar. Mér finnst það svo flókið fyrirbæri. Ég geng undir nafninu Gunnar Larus Hjalmarsson og á 67 vini. Það er ekki mikið miðað við Hemma Gunn. Ég hitti Hemma í fyrragær þegar ég fór í viðtal við Harmageddon. Hemmi gaf mér rettu. Hemmi reykir Viceroy. Hemmi er frábær. Ég heyrði Krókudílamanninn í gær á Xinu. Djöfull er það æðislegt lag, eða æðislegur texti öllu heldur. 

05.03.09 Nýló í kvöld / Höllin í maí
Ég minni vitanlega á Sýna og sjá í kvöld kl. 20 í Nýló. Ókeypis inn. Ég fer yfir feril minn í máli og myndum, eða eins og segir í fréttatilkynningu:

(úr Þjóðviljandum 8/9/84 - viðtal Össur Skarphéðinsson)

SÝNA OG SJÁ MEÐ DR. GUNNA
Á fimmtudagskvöldið 5. mars klukkan 20 verður fyrsta kvöldið í Sýna og sjá seríu Nýlistasafnsins. Þar munu þekktir tónlistarmenn og spekúlantar koma saman einu sinni í viku næstu tvo mánuði og fjalla um sköpunarverk sín, hljómsveitir og óháðar útgáfur, hugsjónir og tónleikahald í kringum 10. áratuginn.
Dr. Gunni, öðru nafni Gunnar Lárus Hjálmarsson, er landsþekktur fyrir hljómsveitir sínar S.H. Draum, Bless, Unun og sólóferil sinn sem og útgáfuna Erðanúmúsík sem gefið hefur út óháða íslenska tónlist síðan 1983. Gunni á einnig að baki rit um tónlistarsögu landans; "Eru ekki allir í stuði" og áralöng skrif og umfjallanir um tónlist í tímarit, útvarp og sjónvarp.
Í Nýlistasafninu mun Dr. Gunni fara yfir feril sinn í mynd og tóndæmum, útgáfur, sýna plaköt og dreifimiða og skella nokkrum velvöldum upptökum í vídeótækið.
Á eftir Dr. Gunna munu ma Maggi Strump, F.I.R.E hópurinn, Arnar Eggert, Saktmóðígur, Yúkatan, Bag of Joys, Á Túr og fleiri stíga á stokk og fara yfir feril sinn. Búast má við mega flassbakki og andans fjöri.
---
Svo minni ég á Rúnars Júl tribjútið í Höllinni 2. maí. Miðasala hefst kl. 10 í dag. Ég verð þarna með Heiðu og húsbandinu en Helgi Björns fer í skó Rúnna og tekur Hann mun aldrei gleymenni. Heiður að fá að vera með í þessu. Og að því tilefni:

Hljómur - Byrjun Heyrðu mig góða öfug
Hljómar - Æsandi fögur
Dusty Springfield - Little by little
Fyrsta LP platan sem Rúnni söng inn á hefst á sækadelísku afturábaki sem leiðir inn í "Heyrðu mig góða". Sé þessum búti snúið við fæst leyndarmálið leyst ("telja inn í þetta, telja inn í þetta"). Á plötunni eru mörg æðisgengin lög eins og "Miðsumarsnótt" e. Þóri Baldursson og "Peningar" e. Rúnar Gunnarsson. Eitt lag er beintengt lífssögu minni: Æsandi fögur er lagið okkar Lufsunnar. Það var spilað eftir að pastorinn í Las Vegas var búinn að gefa okkur saman í kirkjunni. Það var undursamlega heimilislegt að heyra Rúnna í Vegas. Þetta er lag sem Dusty Springfield söng fyrst, en Hljómaútgáfan er miklu betri. Umslag Hljómaplötunnar er e. Þorstein Eggertsson og er algjör snilld. Einhver snillingur hefur sett allar útgáfur SG á wiki, þ.á.m. Hljómaplötuna.

04.03.09 - Smáskilaboð:
Ég á Xinu 977 í dag kl. 15:05 - um "ferillinn"
---
Sá athyglisverða danska heimildamynd í gær um höfundarétt, sömpl og kjaftæði, Good copy bad copy. Þarna sést meistarinn Girl Talk og tékkað er á fyndinni músikstefnu frá Brasilíu sem heitir techno brega. Þessa mynd má sjá frítt hér.
---
Við Lufsan vorum að eta á Hótel Holti. Þríréttað í hádeginu á 2900 á mann. Alveg fínt en hefði mátt vera betur útilátið. Fyrir 2900 kall vil ég helst að mér líði illa þegar ég er búinn að snæða. Sá engan ríkan og frægan. En einhver burtrekinn bankakarl úr LÍ var að tala við einhvern gaur á frönsku. Örugglega eitthvað fissí. 
---
Pönkið lifir á Akureyri. Hljómsveitin Nálgunarbann á pabba er að gera góða hluti. 16-18 ára strákar í hressandi pönkfílingi. Ég mæli eindregið með að þeir fari í MT.
---
Annars er ég bara að hlusta á Clash. London calling.

03.03.09 - Froskahúðarmelóna
Það er ekki hlaupið að því að fá góðar melónur. Margar tegundir eru í boði og maður gerist oft lost. Lendir á óþroskuðu og vondu stöffi. Eftir tilraunastarfssemi get ég nú mælt með rosalega góðum melónum, sem að minnsta kosti eru á góðu tímabili núna. Sætar, safaríkar og algjört nammi. Hér sést Elísabet með nýjustu PIEL DE SAPO melónuna sem var keypt inn um helgina. Hún er úr Bónus þar sem hún kostaði 198 kr/kg. Piel de sapo þýðir "froskahúð", og er melónan nefnd eftir froskahúðarlegum berkinum. Þessi tegund er frá Spáni.

Við Elísabet tökum eina svona saman á þremur kvöldum, en Dagbjartur er ekkert hrifinn af melónum.Við fórum hins vegar á fína mynd í bíó, Ævintýri Despereaux (The Tale of Despereaux). Við vorum einir í öllu bíóinu í Háskólabíó kl. 18 í gær. Þessi mynd kom á óvart. Þetta var ævintýri um fyrirgefninguna. Mun dýpri barnamynd en þessar venjulegu Disney sem virðast allar eins. Dagbjarti fannst gaman líka.
---
Sé fólk í pönkstuði má horfa á þýska heimildarmynd, Punk in London 1977. Einnig Punk Rock Movie, sem er frægari og eftir Don Letts.
---
Fátt er betra en að byrja daginn á Accidents will happend með Elvis Costello en djöfull er Wings at the speed of sound leiðinleg plata.

01.03.09 - Raggas
Okursíðan hefur fengið nýtt heimili á blogspot. Tveir kostir: Miklu minna mál fyrir mig að halda utan um þetta og neytendur geta kommentað á færslur. Það virkar oft vel. Þannig verður til umræða, oft upplýsandi. Þetta sistem hefur gefist vel á neytendahorni mínu á Vísi. 
---

Raggi Bjarna - Meinfreyjublús
Megas var með þá frábæru hugmynd að semja og pródúsera heila plötu ofan í meistara Ragga Bjarna. Eitt lag var tekið upp áður en hugmyndin var sett á ís vegna 75 ára afmælis Ragga á árinu. Það er heilmikið Raggafár framundan en samt vonandi að "Raggas" komi líka seinna. Það er gaman að heyra Ragga syngja um að "ó-día". Af Megasi er hins vegar það að frétta að einhverjar þreyfingar eru um nýja plötu en heimasíðan Megas.is, sem alltaf var alveg að bresta á, er horfin af öldum netvakans. (Þessi glæsilega ljósmynd af Ragga er Copyright:: Geir Ragnarsson og fengin héðan).

28.02.09 - Powerpoint
Einhvern tímann hefði ég nú verið með drulluna í buxunum dögum saman fyrir giggið sem ég tók í gær fyrir framan markaðs og auglýsingafólk á Ímarki á Nordica. Ég hefði legið andvaka í kvíða og veseni. Ekki lengur. Maður er orðinn svo sjóaður í að "koma fram fyrir fólk". Þarna var bransinn mættur. Einhver svaka enskur dúdd með tölu á undan mér. Flestir í salnum alveg ekta markaðsfólk. Rex 2007. Karlarnir með design gleraugu, konurnar tveir metrar á hæð. Ég var búinn að gera fyrsta powerpoint sjóið mitt ever og rúllaði þessu náttúrlega upp. Helv gott forrit þetta powerpoint. Og það er ekkert lát á að ég "komi fram fyrir fólk". Á fimmtudagskvöldið verð ég í Nýló með eitthvað show & tell dæmi þar sem ég fer yfir "tónlistarferil" minn í máli og myndum. Nánar auglýst síðar.
---
Sá The Wrestler. Ég gef henni fullt hús. Hún er svo skýr. Maður man eftir henni. Svo sem ekkert öðruvísi en Rocky 2 í grunninn en bara svo mannleg eitthvað þótt Mickey Rourke líti frekar út eins og eitthvað dýr en maður. Vanskapað dýr þá. Eða geimvera.
---

Helgi Hrafn Jónsson - Digging up a tree
Ég vissi nú ekki að þessi strákur væri til en svo var bara að koma út plata nr. 2, For the rest of my childhood, og hún er bara svona ljómandi fín. Hann gerði víst plötuna Glóandi 2005 en hefur svo verið að blása í lúður á túrum Sigur Rósar. Þrátt fyrir hrottalega "SigurRósað" umslag (enda gert af "kærasta Jónsa") er tónlistin ekki Sigur Rósum nema að hluta. Þetta er meira popp og jarðbundnara. Helgi er að gera góða hluti í útlöndum, gefur plötuna út víðsvegar og er á massífum túr. Tékk itt á mæspeis. 

27.02.09 - You Tube: Kinks á Íslandi 1965
Sænsk fréttamynd komin í leitirnar á YouTube. Stórfengleg heimild um gríðarmikinn poppatburð:

You Tube: Kinks á Íslandi 1965

Magnað fjör. Tempó og Bravó lika með bítl. Undarlega gott sánd á þessu. Kinks byrja með trukki, beint í You really got me. Helvíti voru Bravo hráir og góðir. Gefa Sjálfsfróun í Rokk í Rvk lítið eftir. Mikið tyggjójórtrandi pönk, eins og einhver er búinn að skrifa í kommentum.

Svo eru það Leddarar á Íslandi 1970 (en því miður bara einhver hryllingsmúsik eftir Jón Leifs eða eitthvað)...

26.02.09 - Undirtónar
Bragi er algjör snilld í Kiljunni. Það mætti vera klukkutíma-spesíal með honum á viku. Ég myndi horfa. Þegar ég fór í bókabúðina hjá honum fannst mér vörusvik að hann væri ekki á svæðinu. Það var bara einhver allt annar karl og ekkert hress. 
---
Helvíti skítt með hann Cosser. Fær hann bara ekkert að kaupa fyrir alla peningana sína? Er nú svo víst að hann sé með hárkollu? Jæja, þjóðin getur þá allavega fengið smá kikk út úr því að gera grín að honum og sent hann heim til sín með skottið á milli lappanna og milljallanna enn í veskinu.
--- 
Enginn stjórnmálaflokkur hefur enn falast eftir mér á lista. Þetta er til háborinnar skammar. Hér er hins vegar yfirlýsing: Ég mun ekki lýsa yfir opinberum stuðningi við neinn í prófkjöri að þessu sinni. Engan. Svo það þýðir ekkert að kvabba í mér. Bara svona að hafa þetta á hreinu áður en síminn byrjar að hringja.
---
Þú átt skilið eitthvað gott og skemmtilegt lag til að sparka þér inn í daginn. Upplífgandi. Er það ekki bara gamli skrækur Feargal Sharkey og vinir hans í norður írska popppönkbandinu The Undertones sem eru mættir til að bjarga deginum. Alveg bullandi unglingagraðir á fyrstu plötunni sinni 1979. Samkvæmt Wiki kom hún út í tvennskonar umslögum, þessu:

sem ég átti í gamla daga en seldi eins og algjört fífl ásamt mörgu öðru, og svo þessu:

sem ég keypti núna aftur í Lundúnarferðinni. Á fyrra umslaginu eru strákarnir gríðarlega lúðalegir í úlpum og gallabuxum með uppbrotum, en á umslagi nr. 2 eru þeir orðnir meira kúl og búnir að redda sér leðurjökkum. Á seinni útgáfunni er líka búið að bæta "Teenage Kicks" inn á en það er ein fallegasta saga poppsögunnar af tónlistarástríðu þegar John Peel heyrði lagið í fyrsta skipti og þurfti að keyra út í kant til að gráta af gleði. Fyrsta plata Undertones er tímalaus snilld en svo fer þetta hnignandi. Allar plöturnar eiga reyndar fína spretti. 
The Undertones - Girls don't like it

25.02.09 - Davíð í Kastljósi
Stöð 2 virðist vera að sýna úr Simpsons seríu nr. 11 í sinni endalausu, en fínu, Simpsons-upprifjun. Í gær var þáttur #240 á dagskrá, þegar Maude Flanders deyr. Mér fannst ég vera að sjá þáttinn í fyrsta skipti, en það þýðir líklega að ég hafi bara séð hann svona einu sinni áður. Sería 11 er nýkomin út á dvd, en ég ekki búinn að fá mér. Ég á hina 10. Af þessum, og nokkrum þáttum úr 11 seríu, sem Stöð 2 hefur verið að sýna, get ég ráðið að sería 11 sé lélegasta serían. Ég hef þó ekkert meira fyrir mér í því. Það getur verið að aðrir árgangar séu með alveg jafn slappt efni innan um. Lélegt Simpsons efni má ráða af því að manni finnst eins og höfundar Family guy séu farnir að skrifa það. Hómer er alltof mikill fáviti og á neikvæðan hátt, ekki þennan jákvæða eins og við þekkjum hann. Þættirnir eru alltof flippaðir (á leiðinlegan og pirrandi þunnan hátt) og alltof mikið er af slöppu og jafnvel fyrirsjáanlegu gríni.
---
Simpsons eru annars komnir á 20 seríu. Í nýjasta þættinum, nr. 430, er komin ný byrjun. Hana má sjá hér á Þúskjá. 
---
Síðasti Conan á gamla tímanum var á föstudaginn. White Stripes spiluðu og Conan hjó niður hluta af sviðsmyndinni og gaf áhorfendum búta. Þetta gerði hann alla síðustu viku. Conan kvaddi með því að segja að hann myndi ekki "grow up" við mikinn fögnuð áhorfenda. Conan í LA í slotti Jay Leno hefst svo 1. júní. Hin æpandi spurning er: Kemur þá Conan loksins aftur á Skjá einn?! Og hvað verður um "gítarnegra" Lenos?
---
Sá ástralskan trilljóner í fréttum og vá, hvað tippið var uppi á honum. "Ég er ríkari en allir þessir íslensku bjánar (sem bráðum verður hægt að pissa á á skemmtistaðnum Sódóma Reykjavík) til samans og bara klósettið heima hjá mér er verðmætara en Mogginn. Ég ætla að kaupa Esjuna og Akureyri og útgáfuréttinn á verkum Insols og bla bla bla." Cosser heitir hann. Maður ætti kannski að láta hann gefa sig út? Hann þyrfti varla að reiða meira fram en eina naflaló þvílíkt æðislega geðveikt magnaður sem hann er. Voru ekki allir á Íslandi búnir að fá hundleið á svona gaurum? Þarf nú að fara að flytja þetta inn líka? 
---
Ég er á markaðsdegi Ímark, EKKERT HELV VÆL: Dr.Gunni mun koma með sýn neytandans sem tekur á móti skilaboðunum og segja sína skoðun.

24.02.09 - Smáfuglar fagrir
Þrestir og sterrir (sterrir? Vá, hvað ég er skrifblindur) og hvað þetta heitir, smáfuglarnir sem sagt, voru í geðveiku stuði fyrir utan eldhúsgluggann þegar ég mallaði morgunkaffið. Sungu eins og moðerfokkers. Eins og þeir viti eitthvað. Kannski að vorið sé að koma. Helvítis stuð að heyra svona kröftugan söng í morgunsárið. Smáfuglar hlusta sem betur fer aldrei á fréttir og vita ekkert hvernig stemningin er í þjóðfélaginu. Vita ekki að þeir eiga að vera svartsýnir og helst á bömmer. Vissu ekki heldur að þeir áttu að vera geðveikt bjartsýnir fyrir svona 18 mánuðum þegar var geðveikt góðæri og meiri hagvöxtur í dag en í gær. "Landsbankinn skilaði 59 milljörðum í hagnað á fyrsta ársfjórðungi" - manstu eftir þessu? En þú alltaf með geðsjúka yfirdráttarvexti á yfirdrættinum þínum. Jæja, kannski fékkstu teppi. En ekki smáfuglarnir. Þeir syngja bara eins og fífl. Var ekki Jesús eitthvað að minnast á þetta í Biblíunni?

23.02.09 - Uppbyggilegt á mánud
Jamm. Ef maður væri ekki svona bjartsýnn og léttur á því þá væri maður kannski farinn að bogna aðeins. Vegna fréttaflutningsins, sjáðu til. Allir atvinnulausir. Allir að spá í að flytja til Kanada. Allir sem í fangelsum íbúðanna sinna. "Þetta verður erfitt. Framtíðin er svört". Hryllilegt. Hræðilegt. Martröð. Kreppa. Kviksyndi. Vonleysi. Svartnætti. Depurð. Skuldir. Botnlaust. Dauði. Djöfull.
---
Eða bara: Hey, fokk jú. Ertu ekki líkamlega í þokkalegu standi? Eru ekki krakkarnir sem þú átt bestu krakkar í heimi? Er ekki vorið að koma? Góði besti ekki taka mark á svartsýnisþruglinu. Og ef ekkert annað gengur skaltu bara hætta að hlusta á fréttirnar. Gísla á Uppsala-þig í gegnum þennan moðreyk. Og fáðu þér rjómabollu druslan þín.

22.02.09 - Játningar glæpahunds
Kolaportið fitnar í kreppunni. Þar hefur sjaldan verið eins feitt úrval og í gær. Fann tvær örlí 80s plötur á 200 kall stk: Magazine - The correct use of soap og The Sound - From the lions mouth. Ekki ónýtt það. The Sound var með ekki ósvipað kuldarokk og Echo & The Bunnymen og Joy Division, en fékk aldrei þá athygli sem hún þótti eiga skilið. Adrian Borland aðaldúdd kálaði sér 1999, henti sér fyrir lest á Wembley-lestarstöðinni. 
---
Ég keypti líka dúkku handa Elísabetu sem þarf að fara í sótthreinsun. Nú þarf að fara aftur í portið í dag og kaupa eitthvað handa Dagbjarti. Hann varð ekki hress þegar hann komst að þessu með dúkkuna. Alls ekki hress. Þá veit maður það. Systkinin verða alltaf að fá jafnt. Það sem eftir er. Líka í innflutningsgjafir og allt. Skrapp einnig í Smekkleysubúðina á Laugavegi sem ég hafði aldrei komið í áður eins undarlega og það hljómar. Hefði keypt singul Amiinu og Hazlewoods ef hún hefði kostað minna en 999 kr. Þúsund kall er nú full bratt fyrir eina sínglu finnst mér. Rótaði aðeins hjá Braga í Bókvörðunni. Er að leita að tímaritinu Fréttir frá Sovétríkjunum. Ekkert komplít safn bara nokkur blöð, svo ef einhver er með eintök í reiðuleysi sem þarf að losna við...
---
Ókei ég viðurkenni það: Það er ég sem var að eitra fyrir Árna Johnsen. Nei djók. En hver skyldi það vera? Ef þetta er ekki bara einhver ímyndun í Árna, meina ég. Hver græðir á því að eitra fyrir Árna? Hverjum er svona ægilega í nöp við þennan söngelska dugnaðarfork? Ðe mænd boggöls, eins og sagt er.
---
Ég gafst upp á The Reader í gær og fór að sofa. Sá ekki alveg tilganginn með að horfa meir. Þýski unglingurinn var búinn að riðlast á Kate Winslet og lesa fyrir hana í hálftíma og ég sá ekki alveg hvert þetta stefndi. Það var engin spenna. Engin drift. Og svo var ég bara alltof syfjaður til að nenna þessu. Alltaf bjánalegt að heyra alla tala ensku í mynd sem á gerast í Berlín 1958. Fáránlegt. Samt finnst Könunum þetta ægilega merkilegt og myndin er með 5 óskarstilnefningar í kvöld. Annars er flakkarinn stútfullur. Síðustu Conan þættirnar, The Wrestler, Milk, Vicky Barcelona, ég veit ekki hvað og hvað. Brjálað að gera. Djöfulsins glæpahundur er maður.
---
Fyrst keyra á áfram byggingu tónlistarhússins með skattfé almennings finnst mér lágmarkskrafa að þegar pleisið verður vígt 2011 eða hvenær sem það verður, að valið verði í veisluna random úr þjóðskrá. Ekki að sama slegti og vanalega mæti með sína tilgerð og snobb, heldur Jói bolur og Sigga í Frón. Er þetta ekki hús fólksins? Þurfum við ekki að borga þetta fyrst Bjöggi gamli rann á rassgatið? Muna það. Og hvað á svo þetta helvítis hús að heita? Ég hef nú nokkrum sinnum bloggað um það enda var samkeppni og búið og velja nafn og allt. Ég var alltaf að reyna að komast að nafninu en það átti víst að tilkynnast við athöfn. Menn hljóta að hugsa það allt upp á nýtt núna. Það verður að vera kreppulegt nafn en ekki góðæris. Alþýðuhöllin frekar en, tja, Pelsa og kampavínshöllin. Það mætti fara að koma nafn á ferlíkið. "Tónlistar- og ráðstefnuhúsið á austurbakka Reykjavíkurhafnar" er ekkert spes!
---
Síðasta sumar hitti ég gamla Quarashi kónginn Sölva Blöndal á brettinu. Hann er orðinn eða að verða hagfræðingur, held ég. Við ræddum góðærið sem þá var aðeins farið að láta á sjá þótt blekkingin væri ekki öllum orðin ljós ennþá. "Þú átt bara að horfa á myndina Enron - the smartest guys in the room til að skilja þetta allt," sagði hann af innsæi. "Þetta er alveg eins hérna á Íslandi". Ég var með myndina á flakkaranum en nennti aldrei að horfa á hana. Betra að hafa íslenskan texta á svona flóknu stöffi. Eins gott að Rúv sýnir myndina á sunnudaginn eftir viku.

21.02.09 - En hvað með Focus?
Ég sá Liam Neeson drepa allavega 50 manns í Taken í gærkvöldi. Ég sá Óla Björn eins og kleinu á móti svakalega réttlátum og reiðum Magnúsi á Neii. Niður með Dominos! Ég fékk tvö æsandi tilboð um ritvélar. Ekkert í kerruna. Ég fór í Odda og bíð nú eftir verðtilboði. Myndbandavinnslan mun sjá um diskafjölföldunina.
---
Nokkur umræða varð um grein Egils Helgasonar um grein Arnars Eggerts í Mbl um ræðu Þorgerðar Ingólfsdóttur á Ístón. Ég sá ekki þessa ræðu, en ég las Arnar. Um er að ræða síbylju vs. þögn, kannski frekar en lág vs. hámenningu. Það er þó alltaf undirliggjandi þótt fólk þori harla að viðurkenna það. Svo endurbirti Egill gamla grein um popp og karlana með hnífina á Rúv. Plöturnar sem karlarnir "lagfærðu" eiga að fara á Þjóðminjasafnið. Í framhaldi af þessu öllu skrifa ég fjölmiðlapistil í Fbl í dag:

Við þetta er svo sem ekki miklu við að bæta. Nema:
* Í kommentakerfi skrifar Toggi í Ljótu hálfvitunum: Hversvegna reyna dr. Gunni og Ásgrímur Sverrisson ekki að stöða leiðinlega tónlist með handafli ef þeir eru svona hrifnir af því að aðrir geri það? - Einhver misskilningur. Það er enginn að tala um að stöðva eitt né neitt. Bara verið að fagna sterkum skoðunum um tónlist. Fólk verður að geta skilið á milli kaldhæðins absúrdisma (Karlar með hnífana vs. Óli Palli) og raunverulegra óska.
* Lesendur Egils virðast, miðað við kommentakerfið, hafa átt sinn blómatíma in ðe seventís og hafa tónlistarsmekk þar að lútandi.
* Egill þekkir vel innarlegan kopp í Bee Gees-búrinu. Bee Gees er mögnuð og frábær hljómsveit. Gott ef ekki geðveik líka. Robin Gibb er hugsanlega á leiðinni á Hótel Glym í október að taka þátt í Icefushion.
* Bæði ég (í Eru ekki allir í stuði) og Egill gerum ráð fyrir því að rispað hafi verið yfir Elskaðu náungann af fyrstu Trúbrots-plötunni vegna þess að mennirnir með hnífana (skrúfjárnir, naglana, whatever) hafi ekki líkað að poppskranlistamenn væru að riðlast á klassík. Tvær aðrar tilgátur koma nú fram, báðar jafn góðar:
Á þeim tíma sem organistinn á tónlistardeildinni rispaði Pílagrímakórinn á Trúbrotsplötunni sá ég um poppþátt í útvarpinu. Það er misskilningur að þetta hafi verið af “menningarlegum” ástæðum - þetta var trúarlegs eðlis. Hann kallaði mig einhverju sinni inn á skrifstofu til sín og flutti yfir mér dálitla ræðu um þau endalok kristinnar siðmenningar sem væru yfirvofandi ef drísildjöflar eins og Jimi Hendrix fengju að leika lausum hala. Minnisstæður pistill.
Annað verk sem hann lagði bann við að væri spilað var Jesus Christ Superstar - hann tók eintak útvarpsins úr umferð - en þá brá svo við Að Sigurbjörn biskup bað útvarpið sérstaklega um að þetta yrði nú spilað fyrir unga fólkið um páskana. Þá var nú sumum brugðið og öðrum skemmt, skrifar Freyr Þórarinsson og Arnþór skrifar: Útgáfa Trúbrots af Wagner var bönnuð vegna þess að höfundarnafn var ekki rétt skráð. Þeir sögðust víst hafa samið þetta sjálfir og skráðu verkið sem sína eigin tónsmíð. Svona svipað eins og að gefa út Gerplu án þess að minnast á Laxnes.
* Ánægjulegt er að sjá loksins umræðu um eitthvað annað en þessa endalausu sem hefur verið í gangi hérna síðan í okt.
---
Gamla drykkjuholan mín 22 er orðin Kafka. "Við viljum láta fólki líða eins það sé inni á stað í Prag í kringum 1900 þegar Kafka var á lífi," segir Nuno rekstrarstjóri. Gott og vel. Svo má líka einfaldlega fara á Mokka og láta sér líða eins og það sé 1960 og Dagur Sigurðarson sé enn á lífi. 

20.02.09 - Smáauglýsing:
Óska eftir að fá lánaða ritvél, órafmagnaða, í nothæfu ástandi. Til greina kemur leigugreiðsla, sé þess krafist. Tilboð sendist í emaili.
Á sama stað er til tvíburakerra, nógu góð til að skrölta með tvo krakka út í sjoppu, en varla mikið lengra. Kerran fæst gefins. Uppl í email.
---
Ritvélina hef ég hugsað mér að nota í plötuumslagagerðin v/ sólóplötunnar minnar sem nú er að skríða saman. Umslagið á nebblega að vera analóg. Platan sjálf er auðvitað digital. Hún verður gefin út á netinu og á disk í takmörkuðu númeruðu árituðu upplagi í afar veglegu umslagi. Þetta verður 18 laga masterpís. Ég var alltaf að vesenast með hvað hún ætti að heita. Nokkur ömurleg nöfn voru komin til greina:
Ungakaka
Til forna og í dag
Eins manns partí
Velkominn í gleðskapinn
Með öllum mjalla
Allt mjalla
Mjalla

Svo áður en ég fór í Expressflugvélina til London var ég búinn að ákveða að opna Expressblaðið blindandi og benda blindandi og að orðið sem ég benti á yrði titill plötunnar. Ég hefði náttúrlega hætt við ef það hefði verið eitthvað glatað eins og Ilmvatn eða Oslo. Þegar þotan hafði náð fullri hæð framkvæmdi ég þetta rítúal og benti blindandi þar sem ég opnaði. Og því mun platan heita

Dr. Gunni inniheldur

Sem er ljómandi gott nafn. Inniheldur. Nær m.a.s. að vera tvírætt: Inni heldur. Sá sem vill frekar vera inni. Sem passar vel við mig, eða gerði áður en ég var þessi útiheldur fjallamaður. Ah, gott að vera laus við þessa dilemmu.
---
Eftir hrunið var fólk sem lét á sér bera í "umræðunni" meira og minna óflokksbundið, sýndist manni. Sem lausar skrúfur í skúffu. Nú raðast fólkið í hólf. Hljóðmaðurinn Tryggvi Þór Herbertsson vill vera Sjall. Hvernig er þetta annars með hann. Fyrst eitthvað bull rétt fyrir hrun að allt sé í góðum málum og núna að við skuldum varla djakksjitt. Get ég fengið svona tölvukubb í hausinn eins og hann? Lilja Mósesdóttir vill vera VG. O.s.frv. Fólk verður sem sé að vera í skúffu til að hafa áhrif. Hvað með alla þessa nýju flokka sem áttu að koma? Verður sami lúserbragur á því eins og alltaf. Flokkur mannsins eitthvað. Æi, whatever. Ég hef ekki fengið nein tilboð um að fara í framboð sem er auðvitað móðgandi. Ekki að manni myndi langa til að verða þingmaður. Hanga allan daginn yfir grámóskuleiðindum og tryllingslega innantómu tuði. Þurfa alltaf að segja háttvirti og vera með bindi. Maður væri farinn að líta út eins og Birgir Ármannsson eða þarna barnarasssandlitið í Framsókn eftir viku. Djísús kræst. Og fá ekki einu sinni almennileg forréttindaeftirlaun fyrir ómakið. Skítt. Má vera með Ipod á Alþingi? Fartölvu? Það má skoða þetta ef það má.

19.02.09 - Marnie og Jói G
Í dag í Fbl geri ég undraheim plötubúða að umtalsefni. Þar á meðal þá beinu innspýtingu sem fæst með því að heyra eitthvað geðveikt í búðinni:


Marnie Stern - Prime

Óðmenn - Orð morð

Marnie er amerísk og svona líka ljómandi skemmtileg. Önnur platan hennar sem kom út í fyrra heitir því frámunalega langa nafni This Is it and I Am it and You Are it and so Is That and He Is it and She Is it and it Is it and That is That. Platan kom út 07 okt. Luke Haines á afmæli 07 okt. Ég á afmæli 07 okt. Er þetta eitthvað kosmískt? Nei. Það var hins vegar gríðarlega kosmískt að heyra Orð morð um leið og við stigum fæti inn í Rough Trade. Mögnuð tilviljun. Það er glæsilegt ef Óðmenn fá þá alþjóðlegu viðurkenningu sem þeir eiga skilið. Tvöfalda platan og sínglurnar eru alveg feykilega gott stöff. Allra tíma Topp 10 efni, ekki spurning. Safnplatan sem var verið að spila í RT er þessi, útg. Finders Keepers, nýlegt plötusafnaraleibel sem maður þarf að fylgjast með. Ég veit ekki hvort eitthvert endurútgáfumerkið hafi tekið Óðmenn upp á arma sína biggtæm, en það væri nú alveg rakið.
---
Ég er ekki fyrr búinn að játa á mig hreina samvisku í kókaínmálum en óskiljanleg samskipti Bjössa í Ný dönsk og einhvers dílers eru birt. Ás og einar og eitthvað bull. Þá veit maður það. Bjössi bara svona á kafi í ruglinu! Eða var einu sinni. Hvað er þetta, maðurinn er klín í dag svo haldiði kjafti. Ég óska Birni góðs andlegs bata ef hann þarf á því að halda. Mannskemmandi svona dóprugl. Hann var frábær í Bubbaþættinum og verður eflaust góður í Idol. Kannski mætti byrja alla Idolþættina á að Bjössi fer í lyfjapróf. Selma og Jón Ólafs líka. Hvað veit maður? Það væri a.m.k. miklu skemmtilegra en að horfa á alla þessa krakka syngja kóverlög.
---
Já og ég á bakþanka í dag. Fyrirgefðu. Ætlaði fyrst að kalla hann Annþór og Árni, en fannst það einum of.

18.02.09 - Fávita næntís

Keypti þrjár bækur í Lundúnum. Bad Vibes eftir Luke Haines lýsir 90s popplífi Lúks, sem var allt í öllu í The Auteurs, sem kom upp ásamt Suede sem fyrsta bylgja þess sem síðar var nefnt Britpop. Luke þolir ekki tímabilið og finnst flestir vera algjörir hálfvitar. Gaman! Hann er helvítis dópisti og fyllibytta næntís náttúrlega en virðist hafa séð ljósið og býr nú með konu og barni og er feitur og með skegg. Klassi. Hann hefði náttúrlega ekki efni á að vera með kjaft ef hann væri einhver lúser sem ekkert hefði gert að viti en þar sem hann hefur gert magnaða músik má hann allt. Ég hef reyndar aldrei tengt svakalega við The Auteurs en konsept plata hans um Baader Mainhof er snilld og fyrsta plata Black Box Recorder sömuleiðis. Ég er að verða búinn með bókina, hef lesið hana á þeysireið, enda er þetta svo mikið stuð.

The Fallen lýsir því þegar Dave Simpson hefur upp á öllum fyrrverandi meðlimum The Fall, en eins og menn vita skiptir Mark Edward um meðlimi í bandinu sínu oftar en nærbuxur. Mig hlakkar til að lesa bitrar sögur um óvættinn frá fúlum fyrrum meðlimum.

Kill Your Friends fjallar um A&R mann í London 1997. Ég ætti að kannast við þetta enda að reyna að meikaða með Unun á svipuðum tíma og maður komst í kynni við allskonar bjána í þessum bransa. Gott að menn eru farnir að gera næntís poppsenuna upp í skáldsögum. Ég er búinn að fletta bókinni og þarna er neimdroppið eins og moðerfokk. Gus Gus, Bellatrix og Ragga & The Jack Magnet Orchestra koma öll fyrir, enda að reyna meik. Kæmi ekkert á óvart ef Unun væri þarna þó við erum meira svona 1995 en 97. Bókin er löðrandi í kókaíni enda var allt löðrandi í kókaíni. Ég hef reyndar aldrei orðið svo frægur að komast í kók og aldrei verið þar sem fólk er að kóka. Ef ég hefði flutt út og búið í London eins og alltaf var verið að tala um hefði ég örugglega komist miklu oftar í partí og fengið að reyna á mér nasirnar. Við Biggi fórum meira að segja einu sinni að skoða ógeðslega íbúð í rassgati sem kostaði ógeðslega mikið og átti að vera íverustaður okkur á meðan meikinu væri velt yfir þröskuldinn. Sem betur fer varð ekkert úr því.  Það var samt alltaf eitthvað stuð í gangi í öll þessi skipti sem ég var í London til að spila og hitta einhverja A&R-kalla. Einu sinni var okkur boðið í opnun á einhverri nýrri afþreyingarbúð nálægt Oxford Circus. Þarna var handfylli af poppurum, strákarnir í Chemical Borthers man ég. Þór Eldon var alltaf að láta mig gera eitthvað rugl sem ég gerði náttúrlega enda tilbúinn að gera hvað sem er fyrir meikið. Hann ætti að kunna þetta hafandi verið í Sykurmolunum og svona. Eitt af því var að mingla. Ég er vonlaus minglari. Kannski ef ég er dauðadrukkinn en þarna var ég rétt orðinn kenndur. Ég get ekki minglað, vafra eitthvað um með glas og tala við alla. Bara get það ekki. Nema ofurölvi. Sem ég var ekki. En allavega. Við sjáum popparafífl og Þór hvetur mig til að gefa mig á tal við hann. Mingla við hann. Gæti verið gott fyrir seinni tíma sambönd. Svo ég nálgast aulann sem er umkringdur einhverjum breiðvöxnum vinum sínum. Veit ekkert hvað ég á að segja enda glápir hann bara á mig og spyr hranalega What d'ya want? What d'ya want? þegar ég stend fyrir framan hann eins og mállaus leigumorðingi. Breiðvöxnu vinirnir gera sig líklega til að rífa á mig nýtt rassgat svo ég hundskast í burtu. Líður eins og megafávita og hugsa glottandi Þór þegjandi þörfina. Helvítis popparafávitinn var þetta fífl: 

John Power í enn einu Britpoppvannabí bandinu Cast. Jæja, það má hlæja að þessu núna. En þetta var allt svona asnalegt. Næntísið og meikið. Kannski maður geri bók einn daginn.
---
Í kvöld verða ÍSTÓN-verðlaunin afhent. Ég er glataður að spá fyrir um úrslit, en ég vona að þessir sigri:
Bjartasta vonin - Retro Stefson
Plata ársins - Sígild og samtímatónlist - Fordlandia – Jóhann Jóhannsson 
Plata ársins – Popp/Rokk - Falcon Christ – Dr. Spock 
Rödd ársins  - Páll Óskar Hjálmtýsson 
Lag ársins  - Þú komst við hjartað í mér – Toggi og Páll Óskar (þetta hlýtur nú bara að vinna!)
Tónlistarflytjandi ársins  - Dr. Spock 
Höfundur ársins - Bragi Valdimar Skúlason (var gríðarlega duglegur 08)
Skiptir náttúrlega engu hvað mér finnst. Dómnefndin ræður.
---
Ég fór aðeins á Facebook. Fannst það svo tilgangslaust og tímaeyðandi að ég eyddi mér út af því. Það sama með Myspace. Ég nennti því ekki heldur. Þetta gamla góða html blogg er bara málið.

17.02.09
Eins og við var að búast var stórfenglega geðveikt að flækjast um eins og hver annar túristi í stórborginni London. Ég segi það satt: Ég las ekki staf, né heyrði orð, um Ísland og endalaust hrunatuðið í heila 4 daga og ég hef heldur ekki nennt að eltast við fréttirnar síðan ég kom heim. Í stað þess lapti ég upp borgina, frappuchinoa á Starbucks og hef ekki farið svona mikið í plötubúðir síðan ég var unglingur sem eyddi öllum peningunum sínum á ferðum erlendis í plötur. Gott ef maður var ekki í sömu plötubúðum núna og 1983. Við erum að tala um Berwick st í Soho þar sem sjoppur standa í röðum. Við erum að tala um Camden holurnar og Notting Hill stöffið. Einna best fannst mér Music & Goods exchange keðjan, sem hét Record Exchange í gamla daga. Maður fletti vinýlstæðunum sem óður en leit ekki á cda. Rogaðist svo heim með eitthvað smáræði:

Elvis Costello - Trust
Elvis Costello - My aim is true
Elvis Costello - This years model
Lene Lovich - Stateless
Rachel Sweet - Fool around
Wreckless Eric - The wonderful world of
The Undertones - fyrsta
M - New York London Paris Munich
XTC - White music
10CC - Bloody tourists
10CC - Look hear?
Fischer Z - Going deaf for a living
VA - Buddahs pop explosion (tyggjópopp safnplata frá 1969)
Bítlarnir - For sale / Rubber soul (á brakandi endurútgefnum vinýl frá Apple)

Vinýlsöfnunin hefur tekið á sig andlit frímerkjasöfnunar. Ég er að safna ákveðnum hlutum, komplítera línur. Costello er nú komplíteraður á vinýl þar til hann varð leiðinlegur. Lovich, Sweet og Eric er það sem mig vantaði í 5 platna lita-seríunni frá Stiff. Fyrstu þrjár með Undertones eru möst. Xtc er möst að eiga, 10cc er bara einhver kláði sem þarf að ná úr sér, annað er tilfallandi nema Bítlarnir náttúrlega. Það, "besta band í heimi", gerði 13 plötur (í Englandi sem sé), ef maður telur Yellow submarine og Magical mystery tour með – 15 taki maður báðar Past masters með, 18 með Anthology. Allt er þetta nýlega útgefið á nákvæmlega eftiröpuðu vinýlgáfum sem vænlegast er að stefna á enda gamla draslið allt á uppsprengdu verði. Ég sá t.d. Hvítalbúmið orginal númer #0002446 á ekki nema 500 Pund í hinni ágætu búð Intoxica. Nýju útgáfurnar kosta hins vegar svona 16 pund stk sem er nóg fyrir mig og rúmlega það.
---
Tilgangur ferðarinnar var að sjá Magazine á tónleikum í The Forum í Kentish town. Giggið uppfyllti allar vonir enda vorum við mættir fyrstir í röðina og gátum hlaupið beint í bestu sætin, upp á svölum fremst fyrir miðju. Howard Devoto, söngvari, sem einu sinni var ýkt kúl og leit svona út:

Lítur nú svona út:

Einna líkastur Pee Wee Herman. Það er ekki honum að kenna, fólk verður alltaf minna og minna kúl með aldrinum. Nema ég sem verð fallegri og meira kúl með hverju árinu eftir því sem ég verð þroskaðri og meira með allt á tæru. Því til sönnunar er hér mynd úr ameríkuferð Bless af facebooksíðu Péturs gítarleikara þar sem sjá má að ég var hreint ömurlega útlítandi árið 1990:

Hvað var málið með þessar hártæjur? Einhver skallaafneitun í gangi? Þetta er ekki félegt lið. Þessi í rauðu peysunni er John Henderson sem þýðir að þessi mynd er tekin í Chicago. Sá gaur var eitthvað að gefa út og var fyrir löngu búinn að lofa að gefa út S.H.Draum. Svo varð aldrei neitt úr neinu sem hann talaði um. Seinna átti hann eftir að sjá um Smekkleysu USA sem var álíka mikið rugl og allt annað. Ætli hann sé ekki að selja Herbalife í dag. 
---
En jæja, Magazine já. Þeim til upphitunar var kvennabandið Ipso Facto sem var alveg sæmó. Þær lúkka allavega:

Keypti reyndar eina singlu með þeim á vinýl. Þær hafa gert þrjár singlur só far. Þetta er sú nýjasta.
Ipso Facto - Six & three quarters
---
Þess má geta að hinn fallegi bakgrunnur sem nú er á síðunni er úr barnabókinni Rauði fiskurinn e. Rúnu (Sigrúnu Guðjónsdóttur), útg. 1972.